2015 ވަނަ އަހަރު މޭޑޭ މުޒާހަރާއަށް ނުކުންނަންޖެހުނީ މިސަރުކާރުން މަސައްކަތްތެރިންނަށް ޚިޔާނާތްތެރިވީމައި ކަމަށް މަޑުއްވަރީ ދާއިރާގެ މެންބަރު މުހައްމަދު އަމީތު ވިދާޅުވެއްޖެއެވެ.

މަސައްކަތްތެރިންގެ ދުވަސް ފާގަހަގަކުރުމަށް ގުޅިގފައިވާ ސިޔާސީ ޕާޓިތަކުން މާފަންނު ކުނޫޒުގައި ބޭއްވި ޖަލްސާގައި ވާހަކަ ދައްކަވަމުން އަމީތު ވިދާޅުވީ، މަސައްކަތްތެރިންގެ ހައްގުތައް ހިމާޔަތް ކުރުމަށް ޕީޕީއެމްގެ މެނިފެސްޓޯގައި،ވަރަށް ގިނަ ވައުދުތައް ހުންނާނެ ކަމަށާއި، އެގޮތުން ޒުވާނުންނަށް ރިސޯޓް ހިއްސާއާއި، އަލަށް ކައިވެނިކުރާ ޒުވާނުންނަށް ފްލެޓް ދިނުމާއި، މަސްވެރިންނާއި ދަނޑުވެރިންނަށް ދޭން ބުނި 10000 ރުފިޔާގެ ވައުދަށް ރައީސް ޔާމީން ކަނޑައެޅިގެން ޚިޔާނާތްތެރިވެފައިވާކަމަށެވެ.

"މޭޑޭގައި މުޒާހަރާއަށް ނުކުންނަން ޖެހުނި މި ވައުދުތަކަށް ޚިޔާނާތްތެރިވީމައި، އެދުވަހު ޝެއިޚް އިމްރާން ނުކުންނެވީ އެ ހައްގުތައް ހޯއްދަވައި ދެއްވާށޭ ވިދާޅުވެ.އެދުވަހު އަޅުގަނޑުމެންނަށްވުރެ ކުރިން ޝެއިޚް އިމްރާންއަށް އެކަން އެނގިވަޑައިގަތީ، އެކަމު ޔާމީނު އެ އަޑެއް ނޭއްސެވި" އަމީތު ވިދާޅުވިއެވެ.

އަމީތު ވިދާޅުވީ، އެބޭފުޅުންނަށް މިއަދު ހިތްވަރު ލިބެނީ މޭޑޭގެ ބަތަލުންގެ ހިތްވަރުން ކަމަށާއި، އަދި އެ ހިތްވަރުން ހިތްވަރު ލިބިގެން ކުރިއަށްދާނެކަމަށެވެ.

"އެދުވަހުގެ ބަތަލުން މިނިވަން ކުރާނަން. މޭޑޭން އެނގުނު ހަގީގަތަކީ، ބިޑިއާއި ޖަލުން ބިރު ނުދެއްކޭނޭކަން، އެހިތްވަރުން ހިތްވަރު ލިބިގެން މިއަދު އުފެދިފައިތިބި އެތައް ބަތަލުންނެއް އެބަތިބީ" އަމީތު ވިދާޅުވިއެވެ.

މިއަދު ފާހަގަ ކުރާ ނޫސްވެރިކަމުގެ މިނިވަން ކަމުގެ ދުވަހާއި ގުޅިގެން ނޫސްވެރިންނަށް މަރުހަބާ ވިދާޅުވެ އަމީތު ވިދާޅުވީ، އަބުރުގެ ބިލުގައި ހުރި ކަންބޮޑުވުން ރައީސް ޔާމީނަށް އޭރު ހިއްސާކުރުމުންވެސް އެއަޑު ރައީސް ޔާމީން ނޭއްސެވިކަމަށެވެ. އަދި އެކަމުގެ ނަތީޖާއަށް ވެގެން ގޮސްފައިވަނީ ރައިސް ޔާމީން ވެރިކަމަށް ވަޑައިގަތްފަހުން ރާއްޖޭގެ ނޫސްވެރިކަން އަހަރުން އަހަރަށް ފަހަތަށް ދިއުންކަމަށެވެ. އަދި މިއަދު ނޫސްވެރިންނަކީ ރައީސް ޔާމީން ބިރުގަންނަ ބަޔަކަށް ވެ ނޫސްވެރިކަން ވަރަށް ބިރުވެރި ހާލަތަކަށް ދުއްވާލާފައިވާކަމަށެވެ.