ގިނަ  ދުވަސްތަކަކަށް ފަހު ރައްޔިތުންގެ ޙައްޤުތަކަށް ގޮވާލައި، މާލޭ މަގުމައްޗަށް މުޒާހަރާއަށް ނުކުމެއްޖެއެވެ.

ގިނަ އަދަދެއްގެ މީހުންނާއެކު ގުޅިފައިވާ ޕާޓީތަކުން ސީދާ ހަރަކާތަށް ނުކުމެފައިވަނީ އެމްޑީޕީގެ ހަރުގޭގެ ހުރިމަތީގައބޭއްވި ސައިފޮދަށް ފަހު އެވެ.

ހަރުގެއިން ފަށައިގެން، މަޖީދީ މަގުން ހުޅަނގަށް ރައްޔިތުން ހިނގައިގަތުމާއިއެކު، ފުލުހުން ވަނީ މުޒާހަރާއަށް ހުރަސްއަޅައި، އަނިޔާވެރިކަމާއިއެކު ބާރުގެ ބޭނުންކޮށް، މުޒާހަރާގައި އިސްކޮށް ހުންނެވި ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެންބަރު އަލީ އާޒިމު ހައްޔަރުކޮށްފައެވެ.

މީހުން މަގުމައްޗަށް ނުކުތުމާއެކު ފުލުހުންގެ ބޮޑު ފައުޖެއް ގޮސް މަގު ބަންދުކޮށް، ޕެޕާ ސުޕްރޭ ޖެހުމަށް ފަހު އެއްވުމުގެ ބައިވެރިންނަށް އަނިޔާކުރި މަންޒަރު ފެނުނެވެ.

އާޒިމްގެ އިތުރުން އަދާލަތު ޕާޓީގެ ނައިބު ރައީސް އަލީ ޒާހިރު ވެސް ހައްޔަރުކުރި އެވެ.

ފުލުހުން ބުނި ގޮތުގައި މިއަދުގެ ހަރަކާތުން ހައްޔަރުކުރީ ޖުމުލަ ހަތަރު މީހުންނެވެ. ނަމަވެސް އެއަށްވުރެ ގިނަ މީހުން ފުލުހުންގެ ވެހިކަލަށް އަރުވައިގެން ގެންދިޔަ މަންޒަރު ފެނުނެވެ.

މިއީ ޤާނޫނުއަސާސީގެ 27، 28 އަދި 32 ވަނަ މާއްދާ އާއި ޚިލާފަށް، ޤާނޫނު ނަންބަރު 1/2013 (ޞުލްޙަވެރިކަމާއެކު އެއްވެއުޅުމުގެ މިނިވަންކަމުގެ ޤާނޫނު) އަށް 1 ވަނަ އިޞްލާޙު ގެނައުމުގެ ޤާނޫނު ފާސްކުރިފަހުން، މިފަދަ ގޮތަކަށް، މިހާ ގިނަ ބަޔަކު މާލޭގައި މުޒާހަރާއަށް ނުކުތް ފުރަތަމަ ފަހަރެވެ.