މޭޑޭގެ މުޒާހަރާއާ ގުޅިގެން ޖަލަށްލި ނާސިރާ ޝަރުތުތަކަކާ އެކު ދޫކޮށްލައިފި

އިދިކޮޅު ފަރާތްތަކުން 2015 ވަނަ އަހަރުގެ މެއި މަހުގެ އެއްވަނަ ދުވަހު ބޭއްވި ބޮޑު މުޒާހަރާގެ ތެރެއިން ކޯކު ފުޅިއަކުން ފުލުހެއްގައި ގައިގައި ޖެހި ކަމަށް ބުނެ ޖަލަށްލާފައިވާ ލ. ގަން، އެއްގަމުގޭ ނާސިރާ އަލީ ޝަރުތުތަކަކާ އެކު ހޯމަ ދުވަހު ދޫކޮށްލައިފި އެވެ.

މޭޑޭގެ މުޒާހަރާގެ ތެރެއިން ކޯކު ފުޅިއަކުން ފުލުހަކަށް ހަމަލާދިން ކަމަށް ބުނެ ފަސް އަހަރަށް ޖަލަށްލާފައިވާ ނާސިރާ ދޫކޮށްލާފައި ވަނީ ކްލެމެންސީ ބޯޑުންނެވެ.

ނާސިރާ ދޫކޮށްލާފައިވާކަން ކަރެކްޝަނުގެ މީޑިއާ އޮފިޝަލް ވަނީ ރާއްޖެއެމްވީއަށް ކަށަވަރުކޮށް ދެއްވާފަ އެވެ. ނަމަވެސް، ނާސިރާއަށް ކޮށްފައިވަނީ ކޮން ޝަރުތުތަކެއް ކަމެއް އޮފިޝަލް ވިދާޅެއް ނުވި އެވެ.

މާލޭ ޖަލު ބޭރުގައި ނާސިރާ

ރާއްޖެއެމްވީއަށް މައުލޫމާތު ލިބިފައިވާ ގޮތުގައި ނާސިރާއަށް ދީފައިވަނީ މައާފެއް ނޫނެވެ. ޝަރުތުކޮށްފައި ވަނީ ހުކުމުގެ މުއްދަތުގައި އެއްވެސް މައްސަލައެއްގައި ފުލުހަށް ހާޒިރުކުރަންޖެހޭ ފަދަ ކަމެއް ނުކުރުމަަށާއި އެފަދަ ކަމެއްގައި ފުލުހަށް ގެންގޮސްފި ނަމަ އަނބުރާ ޖަލަށް ގެންދާނެ ކަމަށެވެ.

މޭޑޭގެ މުޒާހަރާގެ ތެރެއިން ބަޔަކު ފުލުހަކަށް ހަމަލާދިން އިރު، އެ ސަރަހައްދުގައި ހުރި ނާސިރާ ފުލުސް މީހާއާ ދިމާއަށް ކޯކު ފުޅިއެއް އެއްލާ މަންޒަރު ވީޑިއޯތަކުން ފެނެއެވެ. ނަމަވެސް، އެ ފުޅި ފުލުސް މީހާގެ ގައިގައި ޖެހިފައެއް ނުވެއެވެ.

އެ މައްސަލައިގައި ނާސިރާއާ އެކު އިތުރު ފަސް މީހެއްގެ މައްޗަށް ހަތިޔާރު ބޭނުންކޮށްގެން މާރާމާރީ ހިންގުމުގެ ކުށުގެ ދައުވާކޮށް ޖަލަށްލާން ހުކުމްކުރީ މިދިޔަ އަހަރުގެ ޖުލައި 25 ވަނަ ދުވަހު އެވެ. އެ ހަ މީހުންގެ އިތުރުން، އިތުރު ދެ މީހަކު ހަތް އަހަރަށް ޖަލަށް ލުމަށް ވެސް ހުކުމް ކޮށްފައި ވެއެވެ.