ރިޔާސީ އިންތިޚާބު ބޯމަތިވަމުން އަންނައިރު ރާއްޖޭގައި މިނިވަން ނޫސްވެރިކަމަށް އޮތް ބިރުވެރިކަން އިތުރުވަމުންދާނެކަމަށް އިންޓަރނޭޝަނަލް ފެޑެރޭޝަން އޮފް ޖާނަލިސްޓްސް އިން ބުނެފިއެވެ.

ދެކުނު އޭޝިއާގެ ސަރަހައްދުގެ ނޫސްވެރިކަމުގެ މިނިވަންކަމުގެ ޙާލަތާއި ގުޅޭ ގޮތުން ނޫސްވެރިކަމުގެ މިނިވަންކަމުގެ ދުވަހާއި ގުޅުވައިގެން އެޖަމްއިއްޔާއިން ނެރުނު ރިޕޯޓުގައިވަނީ ރާއްޖޭގެ ނޫސްވެރިކަމަށް ދިމާވެފައިވާ ގިނަ ގޮންޖެހުންތަކެއް ފާހަގަކޮށްފައެވެ. ޚާއްސަކޮށް ވެރިކަންކުރާ ޕާޓީއާއި، ސަރުކާރުގެ ފަރާތުން މިނިވަން ނޫސްވެރިކަމަށް ކުރިމަތިކޮށްފައިވާ ގޮންޖެހުންތައް ފާހަގަކޮށްފައިވެއެވެ.

އަދި 1 ފެބްރުއަރީގެ ސުޕްރީމް ކޯޓުގެ އަމުރަށްފަހު ރާއްޖޭގެ ނޫސްވެރިންނަށް، ޚާއްސަކޮށް ރާއްޖެ ޓީވީގެ ނޫސްވެރިންނަށް ދިމާވި ގޮންޖެހުންތައް ފާހަގަކޮށްފައިވެއެވެ. އެގޮތުން ރާއްޖެ ޓީވީގެ ނޫސްވެރިން ހައްޔަރުކޮށް، ބޮޑެތި ދައުވާތައް ކޮށްފައިވާކަމާއި، ކުއްލި ނުރައްކަލުގެ ޙާލަތުގެ ތެރޭގައި މިނިވަން ނޫސްވެރިކަމެއް ކުރާނެ މާހައުލެއް ނެތިގެން ރާއްޖެ ޓީވީގެ އާއްމު ކޮންޓެންޓް ބްރޯޑްކާސްޓްކުރުން ހުއްޓާލަން ޖެހުނުކަން ފާހަގަކޮށްފައިވެއެވެ.

މީގެ އިތުރުން ރާއްޖެ ޓީވީ ބަންދުކުރުމަށް ސަރުކާރާއި ވެރިކަންކުރާ ޕާޓީގެ އިސް ބޭފުޅުން އެކި ފަހަރުމަތިން ލައިވް ޕްރެސް ކޮންފަރެންސް ތަކުގައި ގޮވާލެއްވިކަމާއި، މީޑިއާތަކުން ގެނެސްދޭ ޚަބަރުތަކާއި ގުޅިގެން އެކި އިދާރާތަކުން އެ ޚަބަރުތައް ހުއްޓުވުމަށް ބަޔާންތައް ނެރެ، ފިޔަވަޅު އަޅާނެކަމުގެ އިންޒާރު ދެމުންދާކަން ފާހަގަކޮށްފައިވެއެވެ.

އަދި ސަރުކާރުގެ މުށުތެރޭގައި އޮތް ބްރޯޑްކާސްޓިންގ ކޮމިޝަނުން މިނިވަން މީޑިއާތައް ޖޫރިމަނާކުރަމުންދާކަމާއި، ކަމާއި ބެހޭ ސަރުކާރުގެ އިދާރާތަކުން ނޫސްވެރިކަމަށް ކުރާ ދުއްތުރާލުގެ ވާހަކަ ފާހަގަކޮށްފައިވެއެވެ. ހަމަ އެއާއިއެކު، މީޑިއާ ކޮމިޝަންގެ ޤާނޫނެއް މަޖިލީހަށް ހުށަހަޅައި، އެޤާނޫނުގެ ދަށުން ނޫސްވެރިކަމަށް އޮތް ހުރަސްތައް އިތުރުކުރުމަށް ވެރިކަންކުރާ ޕާޓީއިން މަސައްކަތްކުރަމުންދާކަމަށް އައި.އެފް.ޖޭ އިން ވަނީ ފާހަގަކޮށްފައެވެ.

މިއަހަރުގެ ސެޕްޓެމްބަރު މަހު ރިޔާސީ އިންތިޚާބު އޮންނައިރު، މިނިވަންކަމާއިއެކު އިންތިޚާބުގެ ކަންތައްތަކާއި ކެމްޕޭން ކަވަރުކުރުމަށް ނޫސްވެރިންނަށް ގޮންޖެހުންތަކެއް ކުރިމަތިވާނެކަމަށް އެޖަމާޢަތުން ވަނީ ބުނެފައެވެ. އަދި އިންތިޚާބު ކަވަރުކުރުމަށް ބައިނަލްއަޤްވާމީ މީޑިއާއަށް ފުރުސަތު ދޭނެކަމަށް އިލެކްޝަންސް ކޮމިޝަނުން ބުނިނަމަވެސް، ބޭރުގެ ނޫސްވެރިންނަށް ވިސާ ދިނުންފަދަ ކަންކަމުގައި ބޮޑެތި ދަތިތައް ހުރިކަން ފާހަގަކޮށްފައިވެއެވެ. އަދި ސިޔާސީ ހަލަބޮލިކަމުގައި އިންތިޚާބާއި ދިމާއަށް ދާއިރު، ނޫސްވެރިކަމުގެ މިނިވަންކަމަށް ބޮޑެތި ހުރަސްތަކެއް ކުރިމަތިވާނެކަމަށް އައި.އެފް.ޖޭ އިން ވަނީ ބުނެފައެވެ.