ޔުއެފާ ޗެމްޕިއަންސް ލީގުގެ ފައިނަލުން ލިވަޕޫލްއަށް ޖާގަ ލިބުމަކީ ގަބޫލުކުރަން ދަތި ކަމެއް ކަމަށް އެ ޓީމުގެ ކޯޗު ޔާގެން ކްލޮޕް ބުނެފިއެވެ.
ލިވަޕޫލް ފައިނަލުގެ ޖާގައެއް ހޯދީ 7-6 ގެ އެގްރިގޭޓް ނަތީޖާއަކުން އިޓަލީގެ ރޯމާގެ މައްޗަށް ކުރި ހޯދައިގެންނެވެ. މިއަހަރުގެ ފައިނަލް ވެގެންދާނީ 11 އަހަރަށްފަހު ޗެމްޕިއަންސް ލީގުގެ ފައިނަލުން ލިވަޕޫލް ފެންނާނެ ފުރަތަމަ ފަހަރަށެވެ. އެ ޓީމު އެންމެފަހުން ކުޅުނު ފައިނަލްގައި 2007 ވަނަ އަހަރު ބަލިވީ އިޓަލީގެ އޭސީ މިލާން އަތުންނެވެ.
މެޗަށްފަހު ނޫސްވެރިންނާއި ވާހަކަ ދައްކަމުން ކްލޮޕް ބުނީ މެޗަކީ ވަރަށް ފޯރިގަދަ މެޗެއް ކަމަށާއި ރޯމާއިން ނުކުތީ ރިސްކް ނަގައިގެން ކަމަށެވެ. އަދި އެ ޓީމުން ނެގި ރިސްކްގެ ފައިދާ ފުރަތަމަ ކައުންޓާ އެޓޭކާއެކު ނެގުމަކީ އޭނާ ވަރަށް ހިތްހަމަޖެހުނު ކަމެއް ކަމަށް ކްލޮޕް ބުނެފައިވެއެވެ. އޭނާ ބުނީ ލިވަޕޫލްއަށް ރޭގެ މެޗަށްވުރެ މާ ރަނގަޅަށް ޑިފެންޑް ކުރެވޭނެ ކަމަށާއި ޑިފެންޑް ކުރުމުގައި ރަނގަޅު ކުރަން ޖެހޭ ވަރަށް ގިނަ ކަންކަން އެބަހުރި ކަމަށެވެ.
އޭނާ ބުނީ ލިވަޕޫލްއިން އުފެއްދި ކޮންމެ ކައުންޓާ އެޓޭކަކީ ވެސް ނުރައްކާތެރި ކައުންޓާއެއް ކަމަށާއި އެހެން ނަމަވެސް އެ ފުރުސަތުތަކުގެ ބޭނުން ނުހިފުމަކީ ޓީމުގައި ގޯސް ކަންކަން ހުރިކަން އެނގޭ ކަމެއް ކަމަށެވެ. ކުޅުންތެރިންގެ ފަރާތުން ކެތްތެރިކަން ރޭގެ މެޗުގައި ފެނިގެން ނުދިޔަ ކަމަށާއި ބައެއް ހާލަތްތަކުގައި މަޑުޖައްސާލަން ޖެހޭ ކަމަށް ވެސް ކްލޮޕް ބުނެފައިވެއެވެ. އޭނާ ބުނީ އެހެން ކަންކަން ހިނގީ މިއީ ގިނަ ކުޅުންތެރިންނަށް ފުރަތަމަ ސެމީ ފައިނަލަށްވުމާއެކު ކަމަށާއި އެއީ އެފަދަ ހާލަތެއްގައި ކަންކަން ހިނގާނެ ގޮތްކަން އެނގޭ ކަމަށެވެ.
މި ސީޒަނުގައި ކުޅުންތެރިންގެ ފަރާތުން ފެނިގެންދިޔަ ކުޅުމާއި މަސައްކަތަށް ފައިނަލްގެ ޖާގައެއް އެ ކުޅުންތެރިންނަށް ހައްގު ކަމަށާއި މިއީ ފުޓްބޯޅައިގެ އެންމެ "ސަޅި' މަންޒަރު ކަމަށް ކްލޮޕް ބުނެފައިވެއެވެ. އޭނާ ބުނީ އެހާ ތަފާތު ކުޑަ އެގްރިގޭޓަކާއެކު ފައިނަލްގެ ޖާގައެއް ލިބުމަކީ އޭނާއަށް ވަރަށް ހާއްސަ ކަމެއް ކަމަށާއި އަދިވެސް ފައިނަލްގެ ޖާގައެއް ލިބުނުކަން ގަބޫލުކުރަން ދަތި ކަމަށެވެ.
ކްލޮޕްގެ ކެރިއަރުގައި އޭނާ އެންމެފަހުން ވާދަކުރި ފަސް ފައިނަލުން ވެސް ވަނީ ބަލިވެފައެވެ. އެކަމާއި ގުޅޭގޮތުން ވާހަކަ ދައްކަމުން ކްލޮޕް ބުނީ އެންމެން ވެސް އޭނާއަށް އެ ފަސް ފައިނަލްގެ މަތިން ހަނދާން އާކޮށްދޭނެ ކަމަށާއި އެއީ ހަޔާތުގައި ކަން ހިނގާގޮތްކަން އޭނާ ގަބޫލުކުރާ ކަމަށެވެ. އޭނާ ބުނީ ފައިނަލަކުން މޮޅުވެވޭނީ މަސައްކަތްކޮށްގެން ކަމަށާއި އެ މަސައްކަތް ލިވަޕޫލްގެ ކުޅުންތެރިން ކުރާނެ ކަމަށެވެ.
މިއަހަރުގެ ފައިނަލް ވެގެންދާނީ ލިވަޕޫލް ޗެމްޕިއަންސް ލީގުގެ ފައިނަލުން ފެނިގެންދާނެ އަށްވަނަ ފަހަރަށެވެ. މި އަދަދަށް އިނގިރޭސިވިލާތަށް ނިސްބަތްވާ އެހެން އެއްވެސް ޓީމަކަށް ފައިނަލްގައި ވާދަކުރެވިފައެއް ނުވެއެވެ. ހަމައެހެންމެ ޗެމްޕިއަންސް ލީގުގެ ތަށި އެ ޓީމުން ވަނީ ފަސް ފަހަރު އުފުލާލާފައެވެ. މިދިޔަ ދެ އަހަރުގެ ވެން ޗެމްޕިއަނުން ކަމަށްވާ ރެއާލް މެޑްރިޑާއި ދެކޮޅަށް ލިވަޕޫލް ފައިނަލްގައި ނުކުންނާނީ މި މަހުގެ 26 ވަނަ ދުވަހު ޔޫކްރެއިންގެ ކިއޭވްގައި ހުންނަ އޮލިމްޕިކް ސްޓޭޑިއަމްގައެވެ.
