އާޖެންޓީނާއަށް ވޯލްޑްކަޕްގެ ޖާގައެއް ގެއްލިދާނެ ކަމުގެ ބިރުހީވެއްޖެ

އަންނަ އަހަރު ރަޝިއާގައި އޮންނަ ފިފާ ވޯލްޑްކަޕަށް ކޮލިފައިވުމަށް އާޖެންޓީނާއިން ކުރަމުންދާ މަސައްކަތަށް އިތުރު ހުރަސްތަކެއް ކުރިމަތިވެއްޖެއެވެ.

ކޮމްބެލްގެ ވޯލްޑްކަޕް ކޮލިފައިންގައި އަމިއްލަ ގައުމުގައި ޕެރޫއާ ދެކޮޅަށް އާޖެންޓީނާއިން ކުޅުނު މެޗު އެއްވަރުވެފައިވަނީ 0-0 ގެ ނަތީޖާއަކުންނެވެ. ބޮކަ ޖޫނިއާސްގެ "ލަ ބޮމްބޮނޭރާ" ސްޓޭޑިއަމްގައި ބައިލައްކަ ސަޕޯޓަރުންގެ ފަހަތުގައި ކުޅުނު އާޖެންޓީނާގެ ޓީމަށް މި މެޗުގައި މާ އެދެވޭ ކުޅުމެއް ދެއްކިފައި ނުވާއިރު އެ ޓީމަށް ލިބުނު ފުރުސަތުތަކުގެ ބޭނުން ވެސް ހިފިފައެއް ނުވެއެވެ.

މި މެޗުގައި ވެސް އާޖެންޓީނާގެ ފޯވާޑުން ގިނަ ފުރުސަތުތަކެއް ބޭކާރު ކޮށްލިއިރު އެ ޓީމަށް ލަނޑު ޖެހުމަށް ލިބުނު އެންމެ ރަނގަޅު ފުރުސަތު ލިބިފައިވަނީ ކެޕްޓަން މެސީއަށެވެ. ޕެރޫގެ ކީޕަރު ދިފާއުކުރި ބޯޅައެއް ރީބައުންސްގައި އޭރިއާ ތެރެއަށް ނުކުތުމުން މެސީ ފޮނުވާލި ހަމަލާ އަމާޒުވީ ޕެރޫގެ ގޯލުގެ ދަނޑިއާއެވެ. މެސީ ތަނަވަސްކޮށްދިން ގިނަ ފުރުސަތުތަކުގައި އާޖެންޓީނާގެ ފޯވާޑް ލައިނުން އަލަށް ފެނިގެން ދިޔަ ޑާރިއޯ ބެންޑޭޓޯ ފޮނުވާލި ހަމަލާތައް ޕެރޫގެ ކީޕަރު ވަނީ ހުށިޔާރު ކަމާއެކު ދިފާއުކޮށްފައެވެ.

ދެކުނު އެމެރިކާގެ ކޮލިފައިން ބުރުގައި ޗިލީން ވަނީ 2-1 އިން އިކުއެޑޯ ބަލިކޮށްފައެވެ. ގައުމުން ބޭރުގައި 2-1 އިން ކޮލަމްބިއާ އަތުން ޕެރަގުއޭ މޮޅުވިއިރު އުރުގުއޭ އާއި ވެނެޒުއޭލާ އަދި ބްރެޒިލް އާއި ބޮލީވިއާ ކުޅުނު މެޗުތައް ނިމިފައި ވަނީ އެއްވަރު ވެގެންނެވެ.

ދެކުނު އެމެރިކާގެ ކޮލިފައިންގައި 10 ގައުމު ވާދަކުރާއިރު ވޯލްޑްކަޕަށް އޮޓަމެޓިކްކޮށް ކޮލިފައިވަނީ ގަދަ ހަތަރު ޓީމެވެ. ފަސް ވަނައަށް ދާ ޓީމު ކޮލިފައިވާނީ ޕްލޭއޮފް މެޗުގައި ނިއުޒިލޭންޑް ބަލިކޮށްގެންނެވެ.

މި މެޗު އެއްވަރު ވުމާ ވިދިގެން އާޖެންޓީނާ ވަނީ ކޮލިފައިންގެ ޕޮއިންޓް ތާވަލުގެ ހަ ވަނައަށް ވެއްޓިފައެވެ. އަދި 38 ޕޮއިންޓާއެކު އެއްވަނައިގައި އޮތް ބްރެޒިލްއިން ވޯލްޑްކަޕްގެ ޖާގައެއް ކަށަވަރު ކޮށްފައިވާއިރު ދެވަނައިގައި އޮތް އުރުގުއޭއަށް ލިބިފައިވަނީ 28 ޕޮއިންޓެވެ. ޗިލީ އާއި ކޮލޮމްބިއާއަށް އެއްވަރަކަށް ޕޮއިންޓް ލިބިފައިވީ ނަމަވެސް ލަނޑުގެ ތަފާތުން ކުރި ލިބެނީ ޗިލީއަށެވެ. ފަސް ވަނައިގައި ޕެރޫ އޮތީ އަޖެންޓީނާ އާއި އެއްވަރަކަށް ޕޮއިންޓް ހޯދައިގެން އެ ޓީމަށް ވުރެ އިތުރަށް ފައިދާ ލަނޑު ހޯދައިގެންނެވެ.

އާޖެންޓީނާއަށް ވޯލްޑްކަޕްގެ ޖާގައެއް ކިރިޔާ ވެސް ލިބެން އޮތީ އަންނަ ބުދަ ދުވަހު އިކުއެޑޯއާ ދެކޮޅަށް އެ ޓީމު ކުޅޭ މެޗު ކާމިޔާބުކޮށްގެންނެވެ. ކޮލިފައިންގެ ފުރަތަމަ ބުރުގައި އަމިއްލަ ދަނޑުގައި އިކުއެޑޯ އަތުން އާޖެންޓީނާ ބަލިވިއިރު އިކުއޭޑޯގައި އާޖެންޓީނާއިން ކުޅެފައިވާ ވޯލްޑްކަޕް ކޮލިފައިންގެ މެޗުތަކުގެ ތެރެއިން އެ ޓީމު އެންމެ ފަހުން މޮޅުވެފައި ވަނީ 2001 ވަނަ އަހަރުއެވެ.