ޖޭޖޭ ބަލިކޮށް ފައިނަލްގެ ދެވަނަ ޖާގަ ޒެފްރޯލަށް

ޖޭޖޭ ސްޕޯޓްސް ކްލަބު 3-5 އިން ބަލިކޮށް ދެވަނަ ޑިވިޝަން ފުޓުބޯޅަ މުބާރާތުގެ ފައިނަލްގެ ފަހު ޖާގަ ކްލަބު ޒެފްރޯލުން ހޯދައިފިއެވެ.

ގަލޮޅު ރަސްމީ ބޯޅަ ދަނޑުގައި ބުދަ ދުވަހުގެރޭ ކުޅުނު މެޗުގައި ދެޓީމުގެ ފަރާތުންވެސް ވާދަވެރި ކުޅުމެއް ފެނިގެންދިޔަ މި މެޗުގެ ފުރަތަމަ މިނެޓުގައި ޒެފްރޯލުން ވަނީ ލަނޑެއްޖަހާ ލީޑު ނަގާފައެވެ. މިލަނޑު އެޓީމަށް ކާމިޔާބުކޮށްދިނީ ބިދޭސީ ފޯވަޑް އަބޫ ޑެސްމަން މަންސާރޭ އެވެ.

މިލަނޑަށްފަހު ޖޭޖޭއިން ކުޅުން ރަނގަޅުކުރި އިރު އެޓީމުން ވަނީ ލަނޑެއްޖަހާ ނަތީޖާ ހަމަހަމަކޮށްފައެވެ. މިލަނޑު 10 ވަނަ މިނެޓުގައި ކާމިޔާބުކޮށްދިނީ ޖެސްޕާ ވިލިއަމް އެވެ.

ޖޭޖޭ އިން ލަނޑެއް ކާމިޔާބުކޮށް މޮޅަށް ކުޅެމުންދަނިކޮށް ޒެފްރޯލްގެ އަހުމަދު ނިޝާން ވަނީ ފުރަތަމަ ހާފު ނިމުމުގެ ކުރިން އިތުރު ލަނޑެއްޖަހާ ލީޑު ހޯދައިދީފައެވެ.

މިނަތީޖާގައި އޮވެ ފުރަތަމަ ހާފު ނިމުނު އިރު ދެވަނަ ހާފު ފެށިގެންވެސް މޮޅު ކުޅުމެއް ފެނިގެންދިޔައީ ޒެފްރޯލުގެ ފަރާތުންނެވެ. އެގޮތުން ޖޭޖޭގެ ގޯލަށް ނުރައްކާ ކުރަމުންގޮސް އަހުމަދު ނިޝާން ވަނީ އިތުރު ލަނޑެއް ޖަހައި ޒެފްރޯލަށް ލީޑު ފުޅާކޮށްދީފައެވެ.

ޒެފްރޯލްގެ ގޯލަށްފަހު ޖޭޖޭ އިން ވަނީ އަނެއްކާވެސް ކުރިއަށްޖެހި މޮޅު ކުޅުމެއް ދައްކާފައެވެ. އެއާއެކު އެޓީމުން ވަނީ ދިހަ މިނެޓު ތެރޭ ދެ ގޯލު ކާމިޔާބުކޮށްފައެވެ. އެގޮތުން 60 ވަނަ މިނެޓުގައި އިސްމާއިލް މަމްދޫހު ގޯލެއް ކާމިޔާބުކުރި އިރު، ޖެސްޕާ ވިލިއަމް ވަނީ 70 ވަނަ މިނެޓުގައި ލަނޑެއްޖަހާ ނަތީޖާ ހަމަހަމަކޮށްފައެވެ.

އެހެން ނަމަވެސް އެޓީމަށް ނަތީޖާ ހަމަހަމަކޮށްލައިގެން ހިފަހައްޓާލެވުނީ އެންމެ އަށް މިނެޓަށެވެ. ޒެފްރޯލުން ކައުންޓަރ އެޓޭކެއްގައި ޖޭޖޭގެ ގޯލުގެ ކުރިމައްޗަށް ހުރަސްކޮށްލި ބޯޅައެއް ޖެސްޕާގެ ގައިގަ ޖެހިފައި ބައިކޮޅަށް ވަނުމާއެކު އަނެއްކާވެސް ޒެފްރޯލަށް ވަނީ ލީޑު ލިބިފައެވެ. އަދު އޭގެ ފަހުން 81 ވަނަ މިނެޓުގައި އިބްރާހިމް ޝަތިރު ވަނީ ލަނޑެއް ކާމިޔާބުކޮށް ލީޑު އިތުރަށް ފުޅާކޮށްދީފައެވެ.

މި މޮޅާއެކު މި މަހުގެ 14 ވަނަ ދުވަހު އޮންނަ ފައިނަލްގައި ޒެފްރޯލް ނުކުންނާނީ ކުޑަ ހެންވޭރާ ދެކޮޅަށެވެ.