ސްރީ ލަންކާގެ 18 ވަޒީރަކު ހުވާކުރައްވައިފި

ސްރީ ލަންކާގެ ކެބިނެޓްގެ 18 ވަޒީރަކު ރައީސް މައިތިރިޕާލާ ސިރިސޭނާގެ ކުރިފުޅުމަތީގައި އަންގާރަ ދުވަހު ހެނދުނު ވަޒީރުކަމުގެ ހުވާކުރައްވައިފިއެވެ.

މިއީ މި އަހަރުގެ ފުރަތަމަ ހަތަރުމަހުގެ ތެރޭގައި ކެބިނެޓަށް ބަދަލު ގެނެވުނު ދެވަނަ ފަހަރެވެ.

މީގެ އިތުރުން އޭޕްރީލްމަހުގެ 12 ވަނަ ދުވަހު އެކްޓިންގ މިނިސްޓަރުންގެ ގޮތުގައި ހަތަރު ބޭފުޅަކު އައްޔަން ކުރައްވާފައިވެއެވެ. އެ ބޭފުޅުން އައްޔަން ކުރެއްވީ އެސްއެލްއެފްޕީއަށް ނިސްބަތްވެ ވަޑައިގަންނަވާ ހަ ވަޒީރަކު އިސްތިއުފާދެއްވުމުންނެވެ.

އަންގާރަ ދުވަހު ކެބިނެޓަށް ގެންނެވި ބަދަލުތަކުގެ ތެރެއިން އެންމެ ފާހަގަވެގެންދިޔައި މިދިޔަ އަހަރުގެ އޯގަސްޓްމަހު ޖަސްޓިސް މިނިސްޓަރުކަމުން ވަކިކުރި ވިޖެޔަދާސަ ރާޖަޕަކްޝެ މިނިސްޓަރ އޮފް ހަޔަރ އެޑިއުކޭޝަން އެންޑް ކަލްޗަރަލް އެފެއަޒްގެ މަގާމަށް އައްޔަން ކުރެއްވުމެވެ.

ހަޔަރަ އެޑިއުކޭޝަން މިނިސްޓަރގެ މަގާމު ކުރިން އަދާކުރެއްވީ އަންގާރަ ދުވަހު މިނިސްޓަރ އޮފް ހައިވޭސް އެންޑް ރޯޑް ޑިވެލޮޕްމަންޓްގެ މަގާމަށް އައްޔަންކުރެއްވި ކަބީރް ހާޝިމްއެވެ.

ރީޖަނަލް ޑިވެލޮޕްމަންޓް މިނިސްޓަރ ސަރަތު ފޮންސެކާވަނީ މިނިސްޓަރ އޮފް ސަސްޓެއިނަބަލް ޑިވެލޮޕްމެންޓް، ވައިލްޑްލައިފް އެންޑް ރީޖަނަލް ޑިވެލޮޕްމަންޓްގެ މަގާމަށް އައްޔަން ކުރައްވާފައެވެ.

ފިޝަރީޒް މިނިސްޓަރގެ މަގާމުގައި ހުންނެވި ޔޫޕީއެއެފްއޭގެ ޖެނެރަލް ސެކްރެޓަރީ މަހިންދަ އަމަރަވީރަ ވަނީ އެގްރިކަލްޗަރ މިނިސްޓަރގެ މަގާމަށް އައްޔަން ކުރައްވާފައެވެ.އަދި ކުރިން އެގްރިކަލްޗަރ މިނިސްޓަރުގެ މަގާމުގައި ހުންނެވި އެސްއެލްއެފްޕީގެ ޖެނެރަލް ސެކްރެޓަރީ ވަނީ މިނިސްޓަރ އޮފް އިރިގޭޝަން އެންޑް ވޯޓަރ ރިސޯސް މެނޭޖްމަންޓް އެންޑް ޑިޒާސްޓަރ މެނޭޖްމަންޓްގެ މަގާމަށް ބަދަލުކުރައްވާފައެވެ.

މީގެ ކުރިން ޔޫޕީއެފްއޭއަށް ނިސްބަތްވެ ވަޑައިގަންނަވާ ވަޒީރުން ތިއްބެވި ސޯޝަލް އެމްޕަވަރމެންޓް އަދި ލޭބަރ ރިލޭޝަންސް ވަނީ ޔޫއެންޕީއަށް ނިސްބަތްވެ ވަޑައިގަންނަވާ ވަޒީރުންނާއި ހަވާލުކުރައްވާފައެވެ.