ޕްރިންސް ހެރީއާއި މެގަންގެ ކައިވެނީގެ ހަފްލާއަށް އޮބާމާއަށް ވެސް ދައުވަތެއް ނުދޭ!
28 އެޕްރީލު 2018 | ހޮނިހިރު 17:09ގިނައިން ދައުވަތު ދީފައިވަނީ ހިލޭ އެހީދޭ ޖަމްއިއްޔާތަކަށް ނިސްބަތްވާ ފަރާތްތަކަށް
ޕްރިންސް ހެރީ އަދި އޮބާމާ އަކީ ވަރަށް ގާތް ދެބޭފުޅުން
އިނގިރޭސި ވަލީއަހުދު ޕްރިންސް ހެރީއާއި މޭގަން މާކްލްގެ ކައިވެނި ހަފްލާގައި އެމެރިކާގެ ރައީސް ޑޮނަލްޑް ޓްރަމްޕާއި، ކުރީގެ ރައީސް ބަރާކް އޮބާމާ ބައިވެރިވެ ވަޑައިނުގަންނަވާނެކަން ހާމަވެއްޖެ އެވެ. އިނގިރޭސި ޝާހީ އާއިލާއިން ވަނީ ރަސްމީކޮށް އެކަން ހާމަކޮށްފައެވެ. އަދި ސިޔާސީ ފަރާތްތަކަށް ދައުވަތު ނުދިނުމުގެ ވިސްނުން ޝާހީ އާއިލާއިން ގެންގުޅެއެވެ. ޕްރިންސް ހެރީ އަދި މޭގަންގެ ކައިވެނީގެ ހަފްލާގައި އިނގިރޭސި ވިލާތުގެ އަދި އެހެން ގައުމުތަކުގެ ސިޔާސީ ލީޑަރުން ބައިވެރިވުމަކީ މުހިއްމު ކަމެއްގެ ގޮތުގައި ޝާހީ އާއިލާއިން ގަބޫލެއް ނުކުރޭ. އަދި ކައިވެނީގެ ހަފްލާގެ ދައުވަތު ފޮނުވާ ފަރާތްތަކުގެ ލިސްޓު މިހާރު ވަނީ އިނގިރޭސި ސަރުކާރާއި ވެސް ހިއްސާކޮށްފައި، އިނގިރޭސި ޝާހީ ގަނޑުވަރު ކެންސިންގްޓަން ޕެލެސްގެ ތަރުޖަމާނު ވިދާޅުވެފައިވެ އެވެ.
ކައިވެނީގެ މިހަފްލާގައި އިނގިރޭސި ވިލާތުގެ ބޮޑުވަޒީރު ތެރޭސާ މެއި ވެސް ބައިވެރިވެވަޑައެއް ނުގަންނަވާނެ އެވެ.
ޕްރިންސް ހެރީއާއި މޭގަންގެ ކައިވެނީގެ ހަފްލާއަށް ދައުވަތު އަރުވާފައިވާ ބައެއް ފަރާތްތަކުގެ ތެރޭގައި ގިނައިން ހިމެނެނީ ހިލޭ އެހީދޭ ޖަމްއިއްޔާތަކަށް ނިސްބަތްވާ ފަރާތްތަކާއި، އިނގިރޭސި ވިލާތުގެ އަސްކަރިއްޔާގައި ކުރިން މަސައްކަތް ކޮށްފައިވާ ފަރާތްތަކާއި، އާންމުންގެ ތެރެއިން ހޮވާލެވިފައިވާ ބައެއް ފަރާތްތަކާއި ބައެއް ފިލްމީ ތަރިންނެވެ.
ރާނީ އެލިޒަބަތް ދެވަނައިގެ މާމަ ދަރިކަލުން ޕްރިންސް ހެރީއާއި، އެމެރިކާގެ މަޝްހޫރު އެކްޓްރެސް މޭގަންގެ ކައިވެނި އޮންނާނީ އަންނަ މެއި މަހުގެ 19 ވަނަ ދުވަހު ވިންޑްސަރ ގަނޑުވަރުގަ އެވެ.
