އިނގިރޭސި ޝާހީ އާއިލާގެ ޕްރިންސް ވިލިއަމް އާއި އަނބިކަނބަލުން ކެތުރީން މިޑްލްޓަން (ކޭޓް) އަށް ލިބިވަޑައިގެންނެވި ދެވަނަ ފިރިހެން ބޭފުޅާއަށް ލުއީ އާތަރ ޗާލްސްގެ ނަމުން ނަން ދެއްވައިފިއެވެ.

ޕްރިންސް ވިލިއަމް އާއި އަނބިކަނބަލުން ކޭޓް އަދި ޕްރިންސް ހެރީ ދިރިއުޅުއްވާ ގަނޑުވަރު ކަމަށްވާ ކެންސިންގޓަން ޕެލަސްއިން ކުރި ޓްވީޓެއްގައި ވަނީ ޕްރިންސް ވިލިއަމް އަދި ކޭޓްގެ ތިންވަނަ ބޭފުޅާއަށް ލުއީ އާތަރ ޗާލްސްގެ ނަމުން ނަން ދިނުމަށް ނިންމާފައިވާ ކަމަށާއި އެ ބޭފުޅާގެ ޝާހީ ނަންފުޅަކީ ހިޒް ރޯޔަލް ހައިނެސް ޕްރިންސް ލުއީ އޮފް ކެމްބްރިޖް ކަމަށެވެ.

ލުއީ އަކީ އިނގިރޭސި ޝާހީ އާއިލާއާ މާ ބޮޑު ގުޅުމެއް ތާރީހީ ގޮތުން ވެސް އޮތް ނަންފުޅެއް ނޫނެވެ. މިއީ ފަރަންސޭސިވިލާތުގެ ޝާހީ އާއިލާގެ ބޭފުޅުންނަށް ކިޔައި އުޅޭ ނަންފުޅެއް ކަމަށް އިނގިރޭސި މީޑިއާތަކުން ވަނީ ރިޕޯޓުކޮށްފައެވެ. ލުއީއަކީ އިނގިރޭސި ރާނީ ކުއީން އެލިޒަބަތު ދެވަނައިގެ ފިރިކަލުންގެ ޑިއުކް އޮފް އެޑިންބަރާގެ އާއިލީ ބޭފުޅަކަށް ކިޔުނު ނަންފުޅެކެވެ.

ޕްރިންސް ލުއީ ދުނިޔޭގެ އަލިކަން ދެކެވަޑައިގަތީ ލަންޑަނުގައި ހުންނަ ސެއިންޓް މޭރީސް ހޮސްޕިޓަލުގައި މި ހަފްތާގެ ހޯމަ ދުވަހުއެވެ. އުފަންވެވަޑައިގަތް އިރު ބަރުދަނުގައި ހުރީ 8 ޕައުންޑެވެ.

ޕްރިންސް ލުއީ ވެގެންގޮސްފައިވަނީ މި ދެ ބޭފުޅުންނަށް ލިބިވަޑައިގެންނެވި ތިންވަނަ ބޭފުޅާއަށެވެ. ޕްރިންސް ވިލިއަމް އަދި ކޭޓްއަށް މީގެކުރިން ލިބިވަޑައިގެންފައިވަނީ ފިރިހެން ބޭފުޅަކާއި އަންހެން ބޭފުޅެއް. އެއީ  އުމުރުފުޅުން ހަތަރު އަހަރުގެ ޕްރިންސް ޖޯޖް އަދި އުމުރުފުޅުން އެންމެ ދެ އަހަރުގެ ޕްރިންސެސް ޝާލޮޓްއެވެ. ޕްރިންސް ލުއީ ވެގެންދާނީ އިނގިރޭސި ތަޚުތާއި ފަސްވަނައަށް އެންމެ ކައިރި ބޭފުޅާއަށެވެ.

ޕްރިންސް ވިލިއަމްއާއި ކޭޓް ކައިވެނި ބައްލަވައިގަތީ 2011 ވަނަ އަހަރުއެވެ. މި ދެ ބޭފުޅުންގެ ކައިވެންޏަށް މި މަހުގެ 29 ވަނަ ދުވަހު ހަތް އަހަރު ފުރޭނެއެވެ.