އަނުޝްކާ އާއި ވިރާތުގެ ކައިވެނީގެ ޕާޓީއަށް ބޮޑުވަޒީރު މޯދީއަށް ދައުވަތު އަރުވައިފި

ކްރިކެޓް ކުޅުންތެރިޔާ ވިރާތު ކޯލީ އާއި ބޮލީވުޑްގެ އެކްޓްރެސް އަނުޝްކާ ޝަރުމާ ކައިވެނިކޮށްފައި ވަނީ މިމަހުގެ 11 ވަނަ ދުވަހު އިޓަލީގައެވެ. ކައިވެނީގެ ހަފްލާއަށް ފަހު އެ ދެ މީހުން މިހާރު ވަނީ ހަނީމޫން ނިންމާލައި، އެނބުރި އިންޑިއާއަށް ގޮސްފައެވެ.

އެ ދެ މީހުންގެ ކައިވެނީގެ އުފަލުގައި އިންޑިއާގައި ދެ ޕާޓީއެއް ބޭއްވުމަށް ހަމައްސާފައިވާ އިރު އެއް ޕާޓީ އޮންނާނީ މިއަދު އިންޑިއާގެ ވެރިރަށް ދިއްލީގައެވެ. އަނެއް ޕާޓީ ބޭއްވުމަށް ހަމަޖައްސާފައި ވަނީ މުމްބާއީގައެވެ.

ކައިވެނީގެ އުފަލުގައި އިންޑިއާގެ ދިއްލީގައި ބާއްވާ ޕާޓީއަށް އިންޑިއާގެ ބޮޑުވަޒީރު ނަރެންދުރަ މޯދީ އަށް ވަނީ ދައުވަތު އަރުވާފައެވެ. ވިރާތާއި އަނުޝްކާއާ އެކު ނަގާފައިވާ ފޮޓޯއެއް ބޮޑުވަޒީރު މޯދީ ވަނީ ބުދަ ދުވަހު ޓްވީޓް ކުރައްވާފައެވެ. އަދި އެ މީހުންނަށް ކައިވެނީގެ މަރުހަބާ ވިދާޅުވެފައިވެއެވެ. ދިއްލީއަކީ ވިރާތުގެ އުފަން ސިޓީއެވެ. ދިއްލީގައި ކައިވެނީގެ ޕާޓީ ބޭއްވުމަށް ފަހު މުމްބާއީގައި ވެސް ޕާޓީ ބާއްވާނެއެވެ. މުމްބާއީގައި ޕާޓީ ބާއްވާނީ މިމަހުގެ 26 ގައެވެ.

ދިއްލީގައި ބާއްވާ ޕާޓީއަށް މޯދީ ވަޑައިގަންނަވާނެކަން އަދި ހާމަކުރައްވާފައެއް ނުވެއެވެ. ވިރާތާއި އަނުޝްކާ ކައިވެނިކޮށްފައި މިވަނީ ލޯބީގެ ގޮތުން ހަތަރު އަހަރު އެކުގައި އުޅުމަށް ފަހުގައެވެ. އެ ދެ މީހުން އެންމެ ފުރަތަމަ ދިމާވެފައި ވަނީ އެއްކޮށް ކުޅުނު އިޝްތިހާރަކުންނެވެ.

ޚަބަރުތައް ބުނާ ގޮތުގައި އަނުޝްކާއަށް ވިރާތު ދިން އަނގޮޓީގެ އަގު އެ ދެ މީހުންގެ ކައިވެނީގެ މުނާސަބަތުގައި ބޭއްވި ޕާޓީއަށް ވުރެ ވެސް ބޮޑެވެ. އަނގޮޓީގެ އަގު 10 މިލިއަން އިންޑިއަން ރުޕީސްއަށް އަރާ ކަމަށް ޚަބަރުތައް ވަނީ ބުނެފައެވެ.

އޮސްޓްރޭލިއާ މީހަކު ފަރުމާކޮށްފައިވާ މި އަނގޮޓި ފައިނަލް ކުރުމަށް ގާތްގަނޑަކަށް ތިން މަސް ދުވަސް ހޭދަވި ކަމަށް ވިރާތު ވަނީ ބުނެފައެވެ.

އިޓަލީގައި އެ ދެ މީހުން ކައިވެނި ކޮށްފައިވާއިރު ކައިވެނި ހަފްލާއަށް ދައުވަތު ދީފައި ވަނީ އަނުޝްކާ އާއި ވިރާތުގެ އާއިލާގެ މީހުންނާއި އެންމެ ގާތް މީހުންނަށް އެކަންޏެވެ.