މިހާ ބިރުވެރި ވެރިކަމެއް ފަހުގެ ތާރީހުގައި ރައްޔިތުން ދެކިފައެއް ނުވޭ: އިންތި
ރެކޯޑް އަދަދަކަށް ގިނަ ރައްޔިތުންތަކެއް މަރާ ކޮށާލާފައިވޭ
ރައްޔިތުން މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ
މިހާ ބިރުވެރި ވެރިކަމެއް ފަހުގެ ތާރީހުގައި ރައްޔިތުން ދެކިފައިނުވާ ކަމަށް ރައްޔިތުން މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ (އިންތި) ވިދާޅުވެއްޖެއެވެ.
އއ. ރަސްދޫގައި ގުޅިފައިވާ ސިޔާސީ ޕާޓީތަކުން ހުކުރު ދުވަހުގެރޭ ބޭއްވި ޖަލްސާގައި ވާހަކަ ދައްކަވަމުން އިންތި ވިދާޅުވީ އެއް ސަރުކާރެއް އެއްވެރިކަމެއް ހިނގަމުންދާއިރު ރެކޯޑް އަދަދަކަށް ގިނަ ރައްޔިތުންތަކެއް މަރައި ކޮށާލާފައިވާއިރު ވެސް އެއިން އެއްވެސް ކަމަކަށް މިހާތަނަށް އިންސާފު ލިބިފައިނުވާ ކަމަށެވެ. އެގޮތުން އުނގޫފާރު ދާއިރާގެ ކުރީގެ މެމްބަރު މަރުޙޫމް ޑރ. އަފްރާޝީމް އަލީ އާއި ބްލޮގަރ ޔާމީން ރަޝީދުގެ އިތުރުން ވަގަށް ނަގާފައިވާ ނޫސްވެރިޔާ އަހުމަދު ރިލްވާން އަބްދުﷲ އަށް ވެސް މިއަދާ ހަމައަށް އައިރު އިންސާފު ލިބިފައިނުވާކަން އިންތި ފާހަގަކުރެއްވިއެވެ.
"އެއް ސަރުކާރެއްގައި އެއް ވެރިކަމެއްގައި ރެކޯޑު އަދަދަކަށް ރާއްޖޭގެ ރައްޔިތުން ގަސްތުން މަރުތަކުން މަރާ މަގުމައްޗަށް ކޮށާލާފައި ވަނީ. މިހާ ބިރުވެރި މިހާ ނާމާން ދިވެހިރާއްޖެއެއް އަޅުގަނޑުމެންގެ ދިވެހި ރައްޔިތުން މިފަހުގެ ތާރީހެއްގައި، އަޅުގަނޑުގެ ހަދާނަށް އަންނަ ގޮތުން ވެއްޖެއްޔާ ދުވަހަކު ވެސް ދެކިފައެއް ނުވޭ" އިންތި ވިދާޅުވިއެވެ.
ޖަލްސާގައި އިތުރަށް ވާހަކަ ދައްކަވަމުން އިންތި ވިދާޅުވީ ރައީސުލް ޖުމްހޫރީއްޔާ އަބްދުﷲ ޔާމީންގެ އަބްދުލް ޤައްޔޫމްގެ ވެރިކަމެއްގައި ދައުލަތް އޮތީ ސުންނާފަތިވެ، ވީރާނާވެ، ބީވެ ގޮސްފައި ކަމަށެވެ. އަދި އެކަމުގެ ފުރިހަމަ ޒިންމާ ރައީސް ޔާމީން ނަންގަވަން ޖެހިވަޑައިގަންނަވާނެ ކަމަށް އިންތި ވިދާޅުވިއެވެ.
ދައުލަތުގެ މުއައްސާގެ ހިމެނޭ ފަރާތްތައް އަލުން އެނބުރި ޤާނޫނުގެ ތެރެއަށް ރުޖޫއަވުމަށް އިންތި ވަނީ ގޮވާލައްވާފައެވެ. އަދި ރައީސް ޔާމީން ޖަވާބުދާރީ ކުރުވޭނެ ދުވަހަށް ވަރަށް އަވަހަށް އަންނާނެ ކަމަށް ވެސް އޭނާ ވިދާޅުވިއެވެ.
"ޖަވާބުދާރީ ކުރުވޭނެ ދުވަހެއް ވަގުތެއް އަންނާނެ. ޖަވާބުދާރީ ކުރުވާނަން. އަޅުގަނޑުމެންގެ ހަށި ފުރާނަ ހުރިހައި ދުވަހަކު އަޅުގަނޑުމެން މި މަސައްކަތެއް ދުލެއް ނުކުރާނަން. އަޅުގަނޑުމެން އެކޮޅުކޮޅުން އެލުވިޔަސް، އުމުރު ދުވަހަށް ޖަލަށް ފޮނުވި ކަމުގައިވީނަމަވެސް އަޅުގަނޑުން ކުރާނީ މި މަސައްކަތް އެނބުރި އައިސް ވެސް ކުރާނީ މި މަސައްކަތް. އިރާދުކުރެއްވިއްޔާ ދިވެހިރާއްޖޭގެ ރައްޔިތުން ކާމިޔާބު ހޯދާނެ" އިންތި ވިދާޅުވިއެވެ.
