ދަރުބާރު ފެކްޝަނުގައި ތިއްބެވީ ބަރުބާދުވެފައިވާ ޔާމީންގެ އަޅުން: މުހައްމާ
27 އެޕްރީލު 2018 | ހުކުރު 18:11އެބޭފުޅުން މަސައްކަތް ކުރައްވަނީ ނުސީދާ މަގުން
މެމްބަރުން މުހައްމާ ޖަލްސާއެއްގައި ވާހަކަ ދައްކަވަނީ
ރައީސް އަބްދުﷲ ޔާމީންގެ ފަހަތްޕުޅުގައި މިވަގުތު ތިއްބެވި ދަރުބާރު ފެކްޝަންގެ މެމްބަރުންނަކީ ބަރުބާދުވެފައިވާ އެމަނިކުފާނުގެ އަޅުން ކަމަށް އިހަވަންދޫ ދާއިރާގެ މެމްބަރު މުހައްމަދު އަބްދުﷲ ވިދާޅުވެއްޖެއެވެ.
އއ. ރަސްދޫގައި ގުޅިފައިވާ ސިޔާސީ ޕާޓީތަކުން ބޭއްވި ޖަލްސާގައި ވާހަކަ ދައްކަވަމުން މެމްބަރު މުހައްމާ ވިދާޅުވީ ދަރުބާރު ފެކްޝަނުގައި މިވަގުތު ތިއްބެވި ބޭފުޅުންނަކީ ބަރާބަރަށް ބަރުބާދުވެފައިވާ ނުސީދާ މަގުން މަސައްކަތްކުރައްވާ ސީދާ ރައީސް ޔާމީންގެ އަޅުން ކަމަށެވެ. މުހައްމާ ވިދާޅުވީ އެބޭފުޅުންނާއެކު ރައީސް ޔާމީން ކުރައްވާ ކެމްޕެއިން ކާމިޔާބު ނުވާނެ ކަމަށާއި އެބޭފުޅުންނާއި ވަރަށް އަވަހަށް އިންސާފު ބައްދަލުކުރާނެ ކަމަށެވެ.
"ޔާމީންގެ ފަހަތްޕުޅުގައި، ދަރުބާރު ފެކްޝަނުގައި އެތިއްބެވި ބޭފުޅުންނަކީ ބަރާބަށް ބަރުބާދުވެފައިތިބި ނުނިޔަތުން ނުސީދާ މަގުން މަސައްކަތްކުރާ ސީދާ ޔާމީންގެ އަޅުންނޭ. އެބޭފުޅުން ލައިގެން ތިބޭފުޅާ ތިކުރައްވާ ކެމްޕެއިނެއް ކާމިޔާބެއް ނުވާނެ."
މި ޖަލްސާގައި އިތުރަށް ވާހަކަ ދައްކަވަމުން މުހައްމާ ވިދާޅުވީ ވޯޓަކާއި ހަމަޔަށްދާއިރު މިވަގުތު އިލެކްޝަންސް ކޮމިޝަނުގެ ރައީސްގެ މަގާމުގައި ހުންނެވި ޝަރީފާއެކު ބާއްވާ އިންތިހާބެއް މިނިވަން އިންސާފުވެރި ނުވާނެ ކަމުގެ ޔަގީންކަން އެބައޮތް ކަމަށެވެ. އެގޮތުން އެ މަގާމަށް ޝަރީފް އައްޔަނުކުރެވުން އެއީ އެމަގާމުގައި ރައީސް ޔާމީން ހުންނެވުން ފަދަ ކަމެއް ކަމަށް މުހައްމާ އަރިހު ވިދާޅުވި ކަމަށް މުހައްމާ މި ޖަލްސާގައި ވިދާޅުވިއެވެ.
"އަޅުގަނޑުމެން ވޯޓަކާ ހަމަޔަށްދާއިރު މިވަގުތު އިލެކްޝަންސް ކޮމިޝަންގެ ރައީސަކަށް ހުރި ޝަރީފް ބަހައްޓައިގެން ބާއްވާ އިންތިހާބެއް ހަމަ ސަތޭކަ ޕަސެންޓް މިނިވަން އިންސާފުވެރި އިންތިހާބަކަށް ނުވާނެ."
މި ޖަލްސާގައި ވާހަކަ ދައްކަވަމުން މުހައްމާ ވަނީ މި ސަރުކާރުން ހިންގާ ޖަރީމާތައް ހުއްޓުވައި އެ ޖަރީމާތަކަށް އިންސާފު ހޯދައިދޭނެ ކަމަށް ވިދާޅުވެފައެވެ.
