ބައްޕާފުޅު ފަސްދާނުލާފައިވާ ސަހަރާގައި މަރިޔަމް ސަޢީދު ފަސްދާނުލައިފި
27 އެޕްރީލު 2018 | ހުކުރު 10:25މަރިޔަމް ސަޢީދު އަވަހާރަވީ ބުރާސްފަތި ދުވަހު
މަރިޔަމް ސަޢީދު ފަސްދާނުލުމަށް ސަންދޯއް ކުއްޕިޔަވައްތަ ސަހަރާއަށް ގެންދަނީ
ކުރީގެ ރައީސް އިބްރާހިމް ނާސިރުގެ އަނބިކަނބަލުން މަރިޔަމް ސަޢީދު، އެކަމަނާގެ ބައްޕާފުޅު ހުސައިން ސަލާހުއްދީން ފަސްދާނުލާފައިވާ ސަހަރާގައި ފަސްދާނުލައިފިއެވެ.
އަވަށްޓެރި ސްރީލަންކާގެ ކުއްޕިޔަވައްތަ މުސްލިމް ބިއުރަލް ގްރައުންޑްސްގައި މަރިޔަމް ސަޢީދު ފަސްދާނުލާފައި ވަނީ މިއަދުގެ ހުކުރު ނަމާދަށްފަހުއެވެ.
މި ސަހަރާއަކީ މަރިޔަމް ސަޢީދުގެ ބައްޕާފުޅު އަދި މަޝްހޫރު އަދީބު އައްޝައިޚް ހުސައިން ސަލާޙުއްދީންގެ އިތުރުން އެކަމަނާގެ ބޭބޭފުޅު އިބްރާހިމް ޝިހާބްވެސް ފަސްދާނުލާފައިވާ ސަހަރާއެވެ. އެކަމަނާގެ ޖަނާޒާގައި އާއިލާގެ ބޭފުޅުންގެ ތެރެއިން މަޖިލީހުގެ ކުރީގެ ރައީސް އަބްދުﷲ ޝާހިދާއި، ހުސެން ޝިހާބާއި، އިބްރާހިމް ހުސެން ޝިހާބުގެ އިތުރުން މުއިއްޒު އަދުނާން އަދި އާއިލާގެ އެހެން ބައެއް ބޭފުޅުންގެ އިތުރުން ކުރީގެ ރައީސް މުހައްމަދު ނަޝީދާއި ކޮޅުނބުގައި ހުންނަ ދިވެހި އެމްބަސީގެ ބައެއް ބޭފުޅުން ބައިވެރިވެވަޑައިގަތެވެ.
މަރިޔަމް ސަޢީދު އަވަހާރަވީ ސްރީލަންކާގައި، ބުރާސްފަތި ދުވަހުއެވެ. އަވަހާރަވުމުގެ ދޮޅު މަހެއްހާދުވަސް ކުރިން އެކަމަނާއަށް ސްޓްރޯކެއް ޖެހުނު ކަމަށާއި، އަވަހާރަވީ އުމުރުފުޅުން ދުވަސްވުމުގެ ސަބަބުން ސިއްޙީ ހާލުކޮޅު ދެރަވުމުގެ ސަބަބުން ކަމަށްވެސް އާއިލާއިން ވަނީ މަޢުލޫމާތު ދީފައެވެ.
މަރިޔަމް ސައީދަކީ ރައީސް އިބްރާހިމް ނާސިރުގެ ދެވަނަ އަނބިކަނބަލުންނެވެ. ރައީސް ނާސިރާއި އެކަމަނާއަށް ދެ ބޭފުޅުން ލިބިލެއްވިއެވެ. އެއީ އަލްމަރުހޫމް އަލީ ނާސިރާއި އަލްމަރުހޫމް މުޙައްމަދު ނާސިރެވެ.
މަރިޔަމް ސައީދު ދީދީގެ ބައްޕާފުޅަކީ އައްޝައިހް ހުސައިން ސަލާހުއްދީނެވެ. މަންމާފުޅަކީ މެދުގަނޑުވަރު ތުއްތު ގޮމާއެވެ. އާއިލާގައި އެއްބަނޑު އެއްބަފާ ބޭފުޅުންގެ ގޮތުގައި ދެން ތިއްބެވީ ބޭބޭފުޅު އިބްރާހިމް ޝިހާބާއި އަދުނާން ހުސައިންގެ އިތުރުން ދައްތާފުޅު ފާތިމަތު ސައީދެވެ. އެއްބަފާ އިތުރު 4 ބޭފުޅުން ތިއްބެވެ. އެއީ ހައްވާ ސައީދާއި، ޚަދީޖާ ސައީދާއި، އައިޝަތު ސައީދާއި މުޙައްމަދު ސައީދެވެ.
މަރިޔަމް ސައީދަކީ އަދަބީ ރޮނގުން ފާހަގަކޮށްލެވޭ ޚިދުމަތްތަކެއް ކޮށްދެއްވާފައިވާ ބޭކަނބަލެކެވެ. އެގޮތުން ޚާއްސަކޮށް ޅެންވެރިކަމުގެ ދާއިރާއިން ގިނަ ޚިދުމަތްތަކެއް ކުރައްވައި، ރީތި ދިވެހި ގިނަ ޅެންތަކެއް ހެއްދެވިއެވެ. މީގެ އިތުރުން އޭރުގެ މާފަންނު މަދަރުސާ ކަމަށްވާ މަދަރަސަތުލް ސަލާހިއްޔާގެ މުދައްރިސްކަންވެސް ކުރެއްވިއެވެ.
