ޕާކިސްތާނުގެ ކޯޓަކުން އެޤައުމުގެ ޚާރިޖީ ވަޒީރު މަޤާމުން ދުރުކޮށްފި
26 އެޕްރީލު 2018 | ބުރާސްފަތި 14:02އާސިފްގެ ގޮނޑި ގެއްލިއްޖެކަމަށް ކަނޑައެޅީ ތެދުވެރިނުވެގެން ކަމަށް ބުނެ
ޕާކިސްތާނުގެ ޚާރިޖީ ވަޒީރު ޚަވާޖާ އާސިފް
ޕާކިސްތާނުގެ ޚާރިޖީ ވަޒީރު ޚަވާޖާ އާސިފްގެ ޤާނޫނު ހަދާ މަޖިލީހުގެ ގޮނޑި ގެއްލިފައިވާ ކަމަށް އެޤައުމުގެ ކޯޓަކުން ހުކުމްކޮށްފިއެވެ.
އާސިފްގެ ގޮނޑި ގެއްލިފައިވާ ކަމަށް އިސްލާމް އާބާދުގެ ހައިކޯޓުން ޙުކުމް ކުރީ އެމަނިކުފާނު ޤާނޫނު ހަދާ މަޖިލީހުގެ މެމްބަރު ކަމަށް ޝަރުތު ފުރިހަމަނުވާ ކަމަށެވެ. އާސިފް އާދި ދެކޮޅަށް ކޯޓަށް މައްސަލަ ހުށަހެޅުއްވީ އެމަނިކުފާނު ނިސްބަތްވެވަޑައިގަންނަވާ އިންތިޚާބީ ދާއިރާގެ ވާދަވެރި ސިޔާސީ ބޭފުޅެކެވެ. އެމައްސަލައަކީ އާސިފްގެ އަތްޕުޅުގައި ޔުނައިޓެޑް އަރަބް އެމިރޭޓްސްގައި މަސައްކަތް ކުރުމުގެ ވިސާ އޮންނަ ކަމަށާއި، އެކަން އިންތިޚާބަށް ކުރިމަތިލެއްވިއިރު ހާމަކޮށްފައިނުވާ ކަމަށް ބުނާ މައްސަލައެކެވެ.
ހައިކޯޓުން ކުރި ހުކުމްގައިވަނީ ޔޫއޭއީ ކުންފުންޏެއްގައި މަސައްކަތް ކުރައްވާކަން އާސިފް ހާމަކުރައްވާފައި ނުވާ ކަމަށާއި، އެހެން ކަމުން އެމަނިކުފާނު ޤާނޫނު ހަދާ މަޖިލީހަށް ޝަރުތު ފުރިހަމަނުވާ ކަމަށެވެ.
އާސިފްގެ ގޮނޑި ގެއްލިއްޖެ ކަމަށް ކޯޓުން ކަނޑައެޅީ ޕާކިސްތާނުގެ ޤާނޫން އަސާސީގެ 62ވަނަ މާއްދާއާއި ހަވާލާދީއެވެ. އެމާއްދާގައި ވަނީ ޤާނޫނު ހަދާ މަޖިލީހުގެ މެމްބަރުންނަކީ ތެދުވެރި ބަޔަކަށް ވާން ޖެހޭނެ ކަމަށެވެ. މިދިޔަ އަހަރުގެ ޖުލައި މަހު ޕާކިސްތާނުގެ ކުރީގެ ބޮޑުވަޒީރު ނަވާޒް ޝަރީފް މަޤާމުން ދުރުކުރުމަށް ވެސް ކޯޓުން ހުއްޖަތެއްގެ ގޮތުގައި ދެއްކީ ހަމަ އެމާއްދާއެވެ.
އާސިފް އަކީ އޭރު މުސްލިމް ލީގްގެ ފަރާތުން ނަވާޒަށް ފަހު ބޮޑުވަޒީރުކަމަށް ވަޑައިގަންނަވާނެ ކަމަށް ބެލެވުނު އެއް ބޭފުޅާއެވެ.
ނަވާޒް ޝަރީފާއި އާސިފް އާއި ދޭތެރޭ ކޯޓުން ކަންތައް ކުރި ގޮތުން މުސްލިމް ލީގުން ތުހުމަތު ކުރާ ގޮތުގައި ޕާކިސްތާނުގެ ޖުޑީޝަރީ އިން ދަނީ އާއްމު އިންތިޚާބު ކައިިރިވަމުން އަންނައިރު މުސްލިމް ލީގު ޕާޓީއާއި ޒާތީގޮތުން ޖައްސާލަމުންނެވެ. ނަވާޒް ޝަރީފް ވަނީ ކޯޓުތަކުން ކޮންމެ ގޮތަކަށް ކަންތައް ކުރިޔަސް، ކެމްޕޭން ހަރަކާތްތައް ކުރިއަށް ގެންދިޔުމަށް ސަޕޯޓަރުންނަށް ގޮވާލައްވާފައެވެ.
އާސިފް ވަނީ އެމަނިކުފާނުގެ ގޮނޑި ގެއްލުނު ކަމަށް ކުރި ހުކުމް ސުޕްރީމް ކޯޓުގައި އިސްތިއުނާފު ކުރައްވާނެ ކަމަށް ވިދާޅުވެފައެވެ.
