އެކެއް ފެބްރުއަރީގައި ސުޕްރީމް ކޯޓުން ނެރުނު އަމުރުގެ ސަބަބުން ދައުލަތް ހިންގަން ދަތިވެއްޖެ ކަމަށް ވިދާޅުވެ، ގާނޫނާ ހިލާފަށް ފަނޑިޔާރުން ހައްޔަރު ނުކުރެވޭނެ ކަމަށް ރައްޔިތުންގެ މަޖިލީހުގެ މައްޗަންގޮޅި އިތުރު ދާއިރާގެ މެމްބަރު މާރިއާ އަހުމަދުދީދީ ވިދާޅުވެއްޖެއެވެ.
ގުޅިފައިވާ ސިޔާސީ ޕާޓީތަކުން ބުދަ ދުވަހުގެ ރޭ މ. ކުނޫޒުގައި ބޭއްވި "ދެފަނޑިޔާރުން ހުރަގޭގައި: ޕެނަލް ޑިސްކަޝަން"ގައި ވާހަކަ ދައްކަވަމުން ގާނޫނީ ވަކީލް މާރިއާ އަހުމަދުދީދީ ވިދާޅުވީ ދިވެހި ދައުލަތަކީ ތިން ބާރުގެ މައްޗަށް އެކުލެވިގެންވާ ދައުލަތެއް ކަމަށްވާއިރު، ގާނޫނުއަސާސީގައި ދައުލަތުގެ ތިންބާރު ހިންގަންޖެހޭ ގޮތް ވަރަށް ސާފުކޮށް އެބަ އޮތް ކަމަށެވެ. އަދި އެއީ އެއްބާރުން އަނެއް ބާރުގެ މައްޗަށް އަރައިގަނެ، ގާނޫނާ ހިލާފަށް ކަންކަންކުރުމުގެ ބަދަލު އެއްބާރުން އަނެއް ބާރަށް ފާރަވެރިވެ، ގާނޫނާ އެއްގޮތަށް ދައުލަތް ހިންގުން ކަމަށް ވެސް މާރިޔާ ވިދާޅުވިއެވެ.
މާރިޔާ ވިދާޅުވީ ދިވެހި ދައުލަތުގެ އެންމެ ބޮޑު ބާރަކީ ދިވެހި ރައްޔިތުން ކަމަށެވެ. ދިވެހި ރައްޔިތުންގެ ހައްގުތައް ރައްކާތެރިކޮށް ކަށަވަރުކޮށް ދިނުމަކީ ދައުލަތުގެ ތިންބާރު ކަމަށްވާ ރައީސުލްޖުމްހޫރިއްޔާއަށާއި ރައްޔިތުންގެ މަޖިލީހަށާއި އަދި ސުޕްރީމް ކޯޓަށް ވެސް ލާޒިމް ކަމެއް ކަމަށެވެ.
"ކޯޓަކުން ނެރޭ ހުކުމަކާއި ގުޅިގެން ދައުލަތް ހިންގުން، މުޅި ދައުލަތަކީ ރައީސުލްޖުމްހޫރިއްޔާއެއް ނޫން. މުޅި ދައުލަތަކީ ތިން ބާރު އެކުވެގެން އޮންނަ ބާރެއް އެއީ. އެހެންވީމާ ޝަރުއީ ކޯޓުން ޝަރީޢަތް ހިންގުމާއި އަދުލްއިންސާފު ގާއިމު ކުރުމުގެ ބާރުން ހުކުމެއް ކުރީމާ އެއީ ދައުލަތް ހިންގަން ދަތިވެއްޖެއޭ ވިދާޅުވެ، ގައުމީ ސަލާމަތަށް ނުރައްކާތެރި ވެއްޖެއޭ ވިދާޅުވާ ހާލަތެއް އައިކަން ސާބިތު ކުރުން އެއީ އެބޭފުޅުން (ސަރުކާރުން) ކުރައްވަންޖެހޭނެ ކަމެއް. ކުއްލި ނުރައްކަލުގެ ހާލަތު ހިންގާފައި އޮތްއިރު، އެފަދަ ނުރައްކާތެރި ހާލަތެއް ނެތް،" މާރިޔާ ވިދާޅުވި އެވެ.
މާރިއާ ވިދާޅުވީ އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދު ހައްޔަރުކޮށްފައި ވަނީ ގާނޫނާ ހިލާފަށް ކަމަށާއި އަދި ހައްޔަރުކޮށްގެން ޖަލުގައި އެކަހެރިކޮށް ބައިތިއްބާފައި ވަނީ ގާނޫނާއި ބައިނަލްއަގުވާތީ މުއާހަދާތަކާއި އަދި އުސޫލްތަކާ ވެސް ހިލާފަށް ކަމަށެވެ.
މާރިޔާ ވިދާޅުވީ އެ ދެ ފަނޑިޔާރުންނަށް ޖަލުގައި އަނިޔާދެމުން އެގެންދަވަނީ އެ ބޭފުޅުން ކުރެއްވި ހުކުމެއްގެ ސަބަބުން ކަމަށް ބުނާއިރު، ހުކުމް ކުރުމަކީ ޝަރުއީ ކޯޓުތަކުން ކުރާ ކަމެއް ކަމަށާއި އެއީ އެބޭފުޅުންނަށް އަނިޔާކޮށް ޖަލަށްލާން ޖެހޭނެ ކަމެއް ނޫން ކަމަށެވެ.