ބެންގަލޫރު ނުކުންނަނީ އުނދަގޫ މެޗަކަށް، އަމާޒަކީ ކޮލިފައިވުން

އޭއެފްސީ ކަޕްގައި ނިއު ރޭޑިއަންޓް ސްޕޯޓްސް ކްލަބާ ދެކޮޅަށް ގަލޮޅު ދަނޑުގައި ކުޅޭ މެޗަކީ ވަރަށް އުނދަގޫ މެޗެއް ކަމަށާއި އެހެން ނަމަވެސް ޓީމުގެ އަމާޒަކީ ދެން އޮންނަ ބުރަށް ކޮލިފައިވުން ކަމަށް އިންޑިއާގެ ބެންގަލޫރު އެފްސީ އިން ބުނެފިއެވެ.

މި މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ބެންގަލޫރުގެ ފަރާތުން ވާހަކަ ދެއްކީ އެ ޓީމުގެ ގޯލްކީޕިން ކޯޗު އެޑޫ ގޯސޭލްއެވެ. އޭނާ ނޫސްވެރިންގެ ބައްދަލުވުމަށް ހާޒިރުވީ އެ ޓީމުގެ ކޯޗު އަލްބާޓް ރޯކާ ސަސްޕެންޑްކޮށްފައި ވާތީއެވެ. އޭނާ ސަސްޕެންޑްކުރީ މި މަހުގެ 10 ވަނަ ދުވަހު މި ދެ ޓީމު އިންޑިއާގައި ކުޅުނު މެޗުގައި ރެފްރީގެ ނިންމުންތަކާއި ތަކުރާރުކޮށް ދެކޮޅު ހެދުމާ ގުޅިގެން އޭނާ ބެންޗުން ވެސް ފޮނުވާލުމާ އެކުއެވެ.

ބެންގަލޫރުގެ ފަރާތުން ވާހަކަ ދައްކަމުން އެޑޫ ގޯސޭލް ބުނީ މިއީ ލިބޭ އާ ފުރުސަތެއް ކަމަށާއި މެޗު ނަގާނީ އާ މެޗެއްގެ ގޮތުގައި ކަމަށެވެ. އޭނާ ބުނީ ބެންގަލޫރު އޮތީ މެޗަށް ވަރަށް ރަނގަޅަށް ތައްޔާރުވެގެން ކަމަށާއި އެހެން ނަމަވެސް މިއީ ވަރަށް އުނދަގޫ މެޗެއް ކަމަށް ގަބޫލުކުރާ ކަމަށެވެ. އޭނާ ބުނީ ނިއުގައި ހުރި ސްޕެއިންގެ ކޯޗާ އެކު އެ ޓީމުން ރަނގަޅު ނަތީޖާތަކެއް ހޯދަމުންދާ ކަމަށާއި އެކަން ވަރަށް ރަނގަޅަށް ފެންނަމުންދާ ކަމަށެވެ.

މި ދެ ޓީމު ކުޅުނު ފުރަތަމަ މެޗުގައި އެ ޓީމުގެ ކެޕްޓަން ސުނިލް ޗެތުރީ ކުޅެފައެއް ނުވެއެވެ. މާދަމާގެ މެޗުގައި އޭނާ ފެނިދާނެތޯ ނޫސްވެރިޔަކު ސުވާލުކުރުމުން ގޯސޭލް ބުނީ ވަރުގަދަ ސްކޮޑެއް ބެންގަލޫރަށް ލިބިފައިވުމަކީ ލިބޭ ވަރަށް ބޮޑު ހިތްހަމަޖެހުމެއް ކަމަށާއި މެޗުގައި ކުޅޭ ކުޅުންތެރިން ނަގާނީ ކޯޗިން ސްޓާފުން ކަމަށެވެ. އޭނާ ބުނީ ޗެތުރީ ނުކުޅުނު ނަމަވެސް އެއްވެސް މައްސަލައެއް ނެތް ކަމަށާއި ހުރިހާ ކުޅުންތެރިން ވެސް ތިބީ ފުރިހަމައަށް ތައްޔާރުވެގެން ކަމަށެވެ.

ބެންގަލޫރު މި މެޗަށް ނުކުންނައިރު އެ ޓީމުން ވަނީ އިންޑިއަން ސުޕާ ކަޕްގެ ތަށި މިދިޔަ ހުކުރު ދުވަހު އުފުލާލާފައެވެ. އެކަމާ ގުޅޭ ގޮތުން ވާހަކަ ދައްކަމުން އެ ޓީމުގެ ޑިފެންޑަރު ޖޮއިނެއާ ލޮރެންކޯ ބުނީ ޓީމުގެ މެދުގައި ރޫހު އޮތީ ވަރަށް ރަނގަޅަށް ކަމަށާއި މާދާމާގެ މެޗުގައި ހުރިހާ ކުޅުންތެރިން ވެސް އެންމެ ރަނގަޅު ކުޅުން ދައްކަން ތައްޔާރަށް އޮތް ކަމަށެވެ.

މާދާމާގެ މެޗަށް ނުކުންނައިރު ބެންގަލޫރަށް ލިބިފައިވާ އެންމެ ބޮޑު ހިތްހަމަޖެހުމަކީ ރާއްޖޭގެ ޓީމެއް އަތުން އެ ޓީމު މިހާތަނަށް ބަލިވެފައިނުވުމެވެ. މި ދެ ޓީމު ބައްދަލުކުރާ މެޗު ފަށާނީ މާދަމާ ހަވީރު 04:00 ގައެވެ.