އޭއެފްސީ ކަޕްގެ ގްރޫޕް ސްޓޭޖުގައި މަޒިޔާ ސްޕޯޓްސް އެންޑް ރެކްރިއޭޝަނާ ދެކޮޅަށް ކުޅޭ މެޗަށް އިންޑިއާގެ ލީގު ޗެމްޕިއަން ބެންގަލޫރު އެފްސީ ރާއްޖެ އަތުވެއްޖެ އެވެ.

އާދިއްތަ ދުވަހުގެ ރޭ ޓީމް ރާއްޖެ އައިސްފައި ވާއިރު ޓީމުގެ ސީނިއާ ގިނަ ކުޅުންތެރިން ޓީމުގައި ހިމެނެ އެވެ. ނަމަވެސް އެންމެ ފަހުން ބެންގަލޫރު އެފްސީ ކުޅުނު މެޗްގައި އެޓީމްގެ ކޯޗު މާގިނަ ސީނިއާ ކުޅުންތެރިން ބޭނުން ކޮށްފައެއް ނުވެ އެވެ.

މާޒިޔާ އާއި ދެކޮށްށް ކުޅެ މެޗަށް ބެންގަލޫރު އެފްސީއިން ވަރަށް ރަނގަޅަށް ތައްޔާރުވަމުން އަންނައިރު އެޓީމު އެންމެ ފަހުން ކުޅުނު މެޗުން އެޓީމް ވަނީ ބަލިވެފަ އެވެ. އިންޑިއާގެ އައި ލީގުގެ މޯހަންބަގާންއާއި ދެކޮޅަށް ކުޅުނު މެޗުން އެޓީމް ބަލިވީ 3-0 ގެ ނަތީޖާއަކުންނެވެ.

މޯހަންބަގާންއަކީ ވެސް އޭއެފްސީ ކަޕުގައި މާޒިޔާ އަދި ބެންގަލޫރު އެފްސީއާ އެއް ގުރޫޕެއްގައި ހިމެނޭ ޓީމެކެވެ. މި ގުރޫޕުގައި ދެން ހިމެނޭ ޓީމަކީ ބަންގްލަދޭޝްގެ ޑާކާ އަބަހާނީ ލިމިޓެޑް އެވެ.

އޭއެފްސީ ކަޕްގެ ގުރޫޕް ސްޓޭޖުގައި މާޒިޔާ އާއި ބެންގަލޫރު އެފްސީ ބައްދަލުކުރާ މެޗް އޮންނާނީ އަންނަ އަންގާރަ ދުވަހު ހަވީރު ގަލޮޅު ރަސްމީ ފުޓުބޯޅަ ދަނޑުގައެވެ. މާޒިޔާ އަދި ބެންގަލޫރު އެފްސީ އަށް ވެސް އަންގާރަ ދުވަހުގެ މެޗަކީ ވަރަށް މުހިންމު މެޗެކެވެ. މި މެޗުން މޮޅުވާ ޓީމަކަށް ގުރޫޕް އީގެ ކުރި ލިބޭނެއެވެ. މިވަގުތު މާޒިޔާ ވެސް އަދި ބެންގަލޫރު އެފްސީ ވެސް އޮތީ ޕޮއިންޓްގެ ގޮތުން ހަމަހަމަ ކޮށެވެ.

ބެންގަލޫރު އެފްސީއަކީ އެންމެ ފަހުގެ އިންޑިއަން އައި ލީގުގެ ޗެމްޕިއަން ޓީމެވެ. އަދި ފާއިތުވި އަހަރުގެ އޭއެފްސީ ކަޕްގެ ރަނަރަޕް ޓީމުކަން ވެސް ފާހަގަ ކޮއްލެވެއެވެ.

މާޒިޔާ އާއި ބެންގަލޫރު އެފްސީ މި މުބާރާތުގެ ގުރޫޕު ސްތޭޖުގައި އެންމެ ފަހުން ބައްދަލު ކޮއްފައިވަނީ 2015 ވަނަ އަހަރު އެވެ. އެފަހަރު މާލޭގައި ކުޅުނު މެޗުން ވެސް އަދި ބެންގަލޫރުގައި ކުޅުނު މެޗުން ވެސް މާޒިޔާ ބަލިވީ 2-1 ގެ ނަތީޖާއަކުންނެވެ.