ނިމިގެންދިޔަ އަހަރުގެ އޮކްޓޯބަރު މަހު ޕެރިހުގައި ހިނގި ހާދިސާއަށް ފަހު ސޯޝަލް މީޑިއާ ދުރުވި، ހޮލީވުޑްގެ މަޝްހޫރު ރިއަލިޓީ ތަރި ކިމް ކާޑޭޝިއަން ސޯޝަލް މީޑިއާގައި އަލުން ހަރަކާތްތެރިވާން ފަށައިފިއެވެ.
އަންގާރަ ދުވަހުގެ ރޭ ކިމްވަނީ އިންސްޓަގްރާމް އަދި ޓްވިޓަރ މެދުވެރިކޮށް އޭނާގެ އާއިލާގެ ފޮޓޯއެއް އާންމުކޮށްފައެވެ. ކިމް އާންމު ކުރި ފޮޓޯއިން ފެންނަނީ ކިމްް އާއި ފިރިމީހާ، މަޝްހޫރު ރެޕް އާޓިސްޓް ކާންޔޭ ވެސްޓް އާއި އެމީހުންގެ ކުދިން، ތިން އަހަރުގެ ނޯތު ވެސްޓާއި އެއް އަހަރުގެ ސެއިންޓް ވެސްޓެވެ.
އަދި ފޮޓޯ ޝެއާ ކުރުމަށް ފަހު، ޓްވިޓަރ މެދުވެރިކޮށް ބައެއް ފޭނުންނާ ކިމްވަނީ މުއާމަލާތްކޮށްފައެވެ.
ފޮޓޯގެ ކެޕްޝަނަކަށް "ފެމިލީ" ޖެހުމަށް ފަހު ކިމް ފޮޓޯއެއް ޝެއާކޮށްފައި މިވަނީ އޭނާއާއި ކާންޔޭއާ ދެމެދު މައްސަލަ ޖެހި، ވަރިއަށް ދަނީކަމަށް ގިނަ މީޑިއާ ތަކުން ރިޕޯޓްކޮށްފައިވަނިކޮށެވެ.
އޮކްޓޯބަރ މަހު، ޕެރިސް ފެޝަން ވީކް ބެލުމަށް ކިމް ފްރާންސަށް ކުރި ދަތުރުގައި، އޭނާ ހުރި ހޮޓަލް ރޫމަށް ފުލުހުންގެ ޔުނިފޯމް އަޅައިގެން ތިބި ބަޔަކު ވަދެ، ކިމް ބަނުމަށްފަހު އެތައް މިލިއަން ޑޮލަރުގެ ގަހަނާވަނީ ވަގަށް ނަގާފައެވެ. އަދި ކިމްއާ ދިމާލަށް ބަޑި ދިއްކޮށް ބިރު ދައްކާފައިވާ ކަމަށް ވެސް ރިޕޯޓްތަކުގައި ވެއެވެ.
އޮކްޓޯބަރު މަހުން ފަށައިގެން ކިމްގެ ހަރަކާތެއް ސޯޝަލް މީޑިއާއިން ފެނިފައި ނެތް ނަމަވެސް، ކިމްގެ ފޮޓޯތައް އާއިލާއާއި އެކުވެރިންވަނީ ޝެއާކޮށްފައެވެ. އަދި އެއަށް ފަހު ކިމް ނިންމާފައިވާ ބައެއް ޕްރޮޖެކްޓްތައް އާންމުކޮށްފައިވާއިރު، އޭނާގެ އެޕްވެސް ދިޔައީ ބަރާބަރަށް އަޕްޑޭޓްވަމުންނެވެ.
ކާޑޭޝިއަން އާއިލާއިން ބުނެފައިވަނީ ކިމްއަށް ދިމާވީ ކުޑަ ކަމެއް ނޫންކަމަށާއި "އޯކޭވާން ދުވަސްކޮޅެއް ނަގާނެ"ކަމަށެވެ. އަދި، މިއީ ސޯޝަލް މީޑިއާގައި ބަލައިގެން އުޅެން ދަސްކޮށްދިން ފިލާވަޅެއް ކަމަށް ވެސް އެމީހުން ބުނެފައި ވެއެވެ.
