އަވީޗީ މަރުވެއްޖެ

އަވީޗީގެ ނަމުން މަޝްހޫރުވެފައިވާ މަޤުބޫލު، ޒުވާން އީޑީއެމް ޑީޖޭ އަދި މިއުޒިކް ޕްރޮޑިއުސަރ ޓިމް ބަރގްލިންގް މަރުވެއްޖެއެވެ.

ސުވިޑެންއަށް އުފަން އަވީޗީގެ ތަރުޖަމާނަކު ނެރުނު ބަޔާނެއްގައި ބުނެފައިވަނީ އުމުރުން 28 އަހަރުގެ އަވީޗީ މަރުވެފައިފައި އޮއްވައި ފެނިފައިވަނީ ހުކުރު ދުވަހުގެ މެންދުރުފަހު އޮމާންގެ މަސްކެޓްގައި ކަމަށެވެ. މައުލޫމާތު ލިބިފައިވާ ގޮތުގައި އޭނާ އޮމާންއަށް ދިޔައީ ޝޯއެއް ދިނުމަށެވެ.

އަވީޗީ މަރުވި ސަބަބު އަދި ހާމަކޮށްފައި ނުވާއިރު، މި ދަނޑިވަޅުގައި މީޑިއާއަށް އިތުރު މަޢުލޫމާތެއް ދޭން އޭނާގެ އާއިލާއިން ބޭނުން ނުވާކަމަށް އޭނާގެ ތަރުޖަމާނު ނެރުނު ބަޔާނުގައިވެއެވެ.

އީޑީއެމްގެ އެންމެ މަޤުބޫލު އެއް ޕްރޮޑިއުސަރގެ ގޮތުގައި ރޭންކުރެވިފައިވާ އަވީޗީ ދުނިޔޭގެ ސަމާލުކަން ހޯދީ 2011 ވަނަ އަހަރު އޭނާ ނެރުނު ލަވަ، "ލެވެލްސް" އިންނެވެ. އޭގެ ދެ އަހަރުފަހުން އޭނާ ނެރުނު "ވޭކް މީ އަޕް" އަށްވުރެ ބައިނަލްއަޤުވާމީ ފެންވަރުގައި ވަނީ ބޮޑު ތަރުހީބެއް ލިބިގެން ގޮސްފައެވެ.

2012 ވަނަ އަހަރުން ފެށިގެން މިހާތަނަށް އަވީޗީ ވަނީ 40 އަށްވުރެ ގިނަ އެވޯޑަށް ނޮމިނޭޓްވެ، އޭގެ ތެރެއިން ގިނަ އެވޯޑްތަކެއް ކާމިޔާބުކޮށްފައެވެ.