އެކްސިޑެންޓުގައި އަނިޔާވި ބިދޭސީ މީހާ މަރުވެއްޖެ
19 އެޕްރީލު 2018 | ބުރާސްފަތި 17:07އެޑީކޭ ހޮސްޕިޓަލްގައި ފަރުވާދެމުން ދަނިކޮށް މަރުވީ ލޯންޗުގެ ފަޅުވެރިއެއް
ކ. ގުޅީގެ ހުޅަނގުން ހަ މޭލު ބޭރުން ހިނގި އެކްސިޑެންޓްގައި އަނިޔާވި ބައެއް މީހުން މާލެ ގެނެސްފައި
ކ.ގުޅީ ބޭރުން ދެ ލޯންޗެއް ޖެހި ހިނގި އެކްސިޑެންޓްގައި އަނިޔާވި މީހުންގެ ތެރެއިން އޭޑީކޭ ހޮސްޕިޓަލްގައި ފަރުވާދެމުން ދިޔަ ބަންގްލަދޭޝް މީހާ މަރުވެއްޖެއެވެ.
ފުލުހުން ބުނީ ކ އަތޮޅު ގުޅީ ބޭރުން ދެ ލޯންޗެއް ޖެހި އެކްސިޑެންޓުގައި އަނިޔާވި ބިދޭސީ މިހާ އޭޑީކޭ ހޮސްޕިޓަލްގައި ފަރުވާދެމުން ދަނިކޮށް މަރުވެފައިވާ ކަމަށެވެ. މަރުވި ބިދޭސީ މީހާ އަކީ އެކްސިޑެންޓްވި ލޯންޗެއްގެ ފަޅުވެރިޔެއް ކަމަށް ފުލުހުން ބުންޏެއެވެ.
މި އެކްސިޑެންޓް ހިނގީ އިތާފުށި 3 އަދި އިތާފުށި 5 ނަމަކަށް ކިޔާ ދެ ލޯންޗު ޖެހިގެންނެވެ. އެކްސިޑެންޓުގައި އަނިޔާލިބުނު ފަސް މީހަކަށް މިހާރު ވެސް އޭޑީކޭ ހޮސްޕިޓަލުގައި ދަނީ ފަރުވާދެމުންނެވެ. މިކަމާއި ގުޅިގެން އޭޑީކޭގެ ރަސްމީ ބަހެއް ވަނީ ލިބޭ ގޮތް ނުވެފައެވެ.
ކ. ގުޅީގެ ހުޅަނގުން ހަ މޭލު ބޭރުން ހިނގި މި އެކްސިޑެންޓުގައ އެއް ލޯންޗުގެ ކައްޕި ވަނީ ގެއްލިފައެވެ. މައުލޫމާތު ލިބިފައިވާ ގޮތުގައި ގެއްލިގެން ހޯދަނީ ދ. ކުޑަހުވަދޫ އަހްމަދު މުހައްމަދެވެ. އެމްއެންޑީއެފްގެ ކޯސްޓްގާޑުން ދަނީ މި އެކްސިޑެންޓުގައި ގެއްލުނު ލޯންޗު ކެޕްޓަން ހޯދުމުގެ މަސައްކަތް ކުރަމުންނެވެ.
