މެރީބްރައުންއިން ފެށިގެން ހުޅުމާލެ ފެރީ ޓަރމިނަލާއި ހަމައަށް ބޭރުމަގުގައި ޕާކުރުން މަނާކޮށްފި
ޕާކިން މަނާކުރީ މަގުހެދުމުގެ މަސައްކަތް ކުރުމަށް
ބޮޑުތަކުރުފާނުމަގު ތަރައްޤީ ކުރުމަށް ކަމަށް ބުނެ އެ މަގުގައި ހުރި ގަސްތައް ކަނޑާލާފައި
މާލޭގެ ވަށައިގެންވާ ބޮޑުތަކުރުފާނު މަގުގެ ބޮޑު ބައެއްގައި ޕާކުކުރުން ހައުސިންގ މިނިސްޓްރީއިން މަނާކޮށްފިއެވެ.
އެ މިނިސްޓްރީން ނެރުނު އިޢުލާނެއްގައި ބުނެފައިވަނީ، ޗައިނާ މޯލްޑިވްސް ފްރެންޑްޝިޕް ބްރިޖްއަށް ދިއުމަށް ހަދާ ޚާއްސަ މަގު ހެދުމަށްޓަކައި ބޮޑުތަކުރުފާނު މަގުން ބޮޑު ބައެއް ބަންދު ކުރުމަށް ނިންމާފައިވާ ކަމަށެވެ. އެގޮތުން ބަންދު ކުރުމަށް ނިންމާފައިވަނީ، ބޮޑުތަކުރުފާނު މަގުގައި މިހާރު ތާރު އަޅާފައިވާ ހިސާބު، މެރީ ބްރައުން އިން ފެށިގެން ހުޅުމާލެ ފެރީ ޓަރމިނަލާއި ހަމައަށެވެ.
ހައުސިންގ މިނިސްޓްރީން ހާމަކޮށްފައިވާ ގޮތުގައި ބޮޑުތަކުރުފާނު މަގުގައި ޕާކު ކުރުން މަނާ ކުރުމަށް ނިންމާފައިވަނީ އެ މަގު ރަނގަޅު ފެންވަރަކަށް ހަދައި ނިމެންދެނެވެ. މި މައްސަކަތް ބާރު ސްޕީޑެއްގައި ކުރިއަށް ގެންގޮސް، ބްރިޖްގެ މަސައްކަތް ނިމުމުގެ ކުރިން ނިންމުމަށް ހަމަޖެހިފައިވާކަން ވެސް އެ މިނިސްޓްރީން ވަނީ ހާމަކޮށްފައެވެ.
ރަނގަޅު ފެންވަރަކަށް ތަރައްޤީ ކުރުމަށް ބޮޑުތަކުރުފާނު މަގުގައި ޕާކުކުރުން މަނާކޮށްފައިވާއިރު، އެ މަގު ބޮޑު ކުރުމަށްޓަކައި މަގުގެ އަރިމަތީގައި ހުރި ހުރިހާ ގަހެއް ކަނޑައި، މާލޭ އިރުމަތީ ފަރާތު އާޓިފިޝަލް ބީޗުގެ ސްޓޭޖާއި ފާރު ވެސް ވަނީ ނަގާފައެވެ.
ތޮއްޖެހިފައިވާ މާލޭގެ އެކި ހިސާބުތަކުގައި އެކިއެކި މަސައްކަތް ކުރުމަށް ޕާކުރުން މަނާކުރަމުންދާއިރު، މާލޭގައި ޕާކް ކުރާނެ ޖާގަ ނެތުމުގެ ޝަކުވާ ގިނަ ފަރާތްތަކަކުން ދަނީ ކުރަމުންނެވެ. ޕާކް ކުރަން ޖާގަ ނެތް ނަމަވެސް، ޤަވާއިދާ ޚިލާފަށް ޕާކް ކޮށްގެންކަމަށް ބުނެ ވެހިކަލްތަކުގައި ފުލުހުން ޖަހާ ޕާކިންގ ވަޔޮލޭޝަން ސްޓީކާ މެދުވެރިކޮށް ވެސް އަހަރެއްގެ މައްޗަށް ދައުލަތަށް އެތައް މިލިއަން ރުފިޔާއެއް ހޯދައެވެ، އަދި އަހަރު ފެށުމުގެ ކުރިން އެ އަހަރު ސްޓިކާ ޖަހައިގެން ލިބޭނެ ކަމަށް ލަފާކުރާ އަދަދު ދައުލަތުގެ ބަޖެޓުގައި ވެސް ހިމަނައެވެ.
