އއ. އުކުޅަހުގެ ރައްޔިތުންގެ ބަޔަކު ރާއްޖެޓީވީ އަށް ހާއްސަ ކެއުމެއް އަރުވައިފި އެވެ.
ދިވެހި އެކި ރަހަތައް ހިމެނޭ މެންދުރުގެ ކެއުން ރާއްޖެޓީވީއަށް ހަދިޔާ ކުރީ ހޮނިހިރު ދުވަހުގެ މެންދުރު ފަހު އެވެ. ރާއްޖެޓީވީގެ އޮފީހަށް މި ކެއުން ހިފައިގެން އައި މީހުން ބުނީ މިއީ ރާއްޖެޓީވީން ކުރާ ބުރަ މަސައްކަތް އެމީހުން ބަލައިގަންނާތީ ދިން ކެއުމެއް ކަމަށެވެ. އަދި ފުރާނަ އަތްމައްޗަށް ލައިގެން ބިރުވެރިކަމާއެކު ކުރަމުންދާ މަސައްކަތައް އެމީހުންގެ ފުރިހަމަ ލޯތްބާ ތާއީދު އޮތް ކަމަށް ވެސް އެމީހުން ބުންޏެވެ.
މި ކެއުން ރާއްޖެޓީވީން ބަލައިގަނެ، ރާއްޖެޓީވީގެ ނިއުސް ޑިރެކްޓަރު އަލީ ޔޫސުފް ވިދާޅުވީ ރާއްޖެޓީވީން ކުރާ މަސައްކަތް ބަލައިގަނެ ދޭ ހިތްވަރަކީ ރާއްޖެޓީވީގެ މަސައްކަތައް ލިބޭ އިތުރު ހިތްވަރެއް ކަމަށެވެ. އަދި ރާއްޖެޓީވީން އަބަދު ވެސް މަސައްކަތް ކުރަނީ އާންމުން ބޭނުންވާ ހަބަރާ މައުލޫމާތު ފެތުރުމަށް ކަމަށް ވެސް އޭނާ ވިދާޅުވި އެވެ.
އުކުޅަހުން ތައްޔާރުކޮށްގެން ގެނައި މި ތަކެތީގެ ތެރޭގައި އެންމެ ހާއްސަ އެކައްޗަކީ "އަޅިމާޑު" އެވެ. އުކުޅަހަށް ހާއްސަ މި ފޮނިކާއެއްޗަކީ ހާއްސަ ދުވަސްތަކުގައި ތައްޔާރުކުރާ އެއްޗެކެވެ.
