ރާއްޖޭގެ ފިލްމީ ދާއިރާގެ މަޝްހޫރު ތަރި ނިއުމާ މުހައްމަދުގެ އެންމެ ފަހުގެ ފިލްމު ނިވައިރޯޅީގައި ހިމެނޭ ތަރިން އިއުލާންކޮށްފިއެވެ.

ރޭ ރާނބާ ރެސްޓޯރެންޓުގައި އޮތް ޚާއްސަ ހަފްލާއެއްގައި ފިލްމުގައި ހިމެނޭ ތަރިން އިއުލާން ކޮށްފައިވާއިރު މި ފިލްމަކީ ނިއުމާގެ ވަދާއީ ފިލްމެވެ.

ފިލްމުގެ ފައިނަލް ކާސްޓުންގެ ތެރޭގައި ހިމެނެނީ އައިމިނަތު ރިޝްފާ، އަހްމަދު ޒިޔާ، އަހްމަދު ސައީދު، އަހްމަދު އަޒްމީން (އަޒޭ)، ނާޝިދާ މުހައްމަދު (ނާއްކޮ)، އަހްމަދު އާސިފް، އައިމިނަތު އިޝާލް ރަޝީދު، އަޖްނާޒް އަލީ، އިސްމާއިލް ޒާހިރު ، އައިމިނަތު ރަޝީދާ (އައިންތު)، މަރިޔަމް ޝަކީލާ، މަރިޔަމް ހަލީމް، ޔޫސުފް ޝަފީއު (ޔޫއްޕެ)، ފާތިމަތު ޒީނަތު (ޒީތު)، އަދި ނިއުމާ މުހައްމަދެވެ.

ފިލްމީ ދާއިރާއިން ރިޓަޔާ ވެއްޖެކަމަށް ނިއުމާ ނިންމާފައިވަނީ އޭނާގެ 40 ވަނަ އުފަންދުވަހުގައެވެ. ހަމަ އެރޭގައި އޭނާ ވަނީ ނިވައިރޯޅި ފިލްމަކީ އޭނާގެ އެންމެ ފަހުގެ ފިލްމު ކަމަށް ބުނެ ފިލްމުގެ ޓީޒާ ލޯންޗު ކޮށްފައެވެ.

މޫމިން ފުއާދުގެ ސްކްރިޕްޓެއްގެ މައްޗަށް އުފައްދާ މި ފިލްމު ޑައިރެކްޓު ކުރަނީ މުހައްމަދު އަލީ (މޮގާ) އެވެ.އަދި ޕްރޮޑިއުސް ކުރަނީ ނިއުމާއެވެ.

މި ފިލްމާއި ބެހޭގޮތުން ނިއުމާ ރާއްޖޭގެ ބައެއް މީޑިއާތަކަށް ދީފައިވާ އިންޓަވިއުތަކުގައި ބުނެފައިވަނީ މި ފިލްމުން އޭނާ އާއިއެކީގައި އާ ތަރިންތަކެއް ފެންނާނެ ކަމަށެވެ. އަދި ފިލްމުގެ ޝޫޓިންއަށް ތައްޔާރުވުމަށް އޭނާ ފަލަވުމަށް މަސައްކަތް ކުރަމުންދާކަމަށް ވަނީ ބުނެފައެވެ. މި ފިލްމު ރިލީޒް ކުރުމަށް ހަމަޖެހިފައިވަނީ މިއަހަރުގެ އޮކްޓޯބަރު މަހުގެ ތެރޭގަ އެވެ.

1995 ވަނަ އަހަރު ދިވެހި ފިލްމީ ދާއިރާއިން ފެނިގެންދިޔަ ނިއުމާ ވަނީ 1000 އަށް ވުރެ ގިނަ ލަވައިގައި ހަރަކާތްތެރިވެފައެވެ. އަދި އޭގެ އިތުރުން އެތަކެއް ޑްރާމާ ސީރީޒް އަކާއި އެތަކެއް ފިލްމެއްގައި ވަނީ ހަރަކާތްތެރި ވެފައެވެ. ނިއުމާ ކުޅެފައިވާ ފިލްމު ތަކުގެތެރޭގައި 1998 ވަނަ އަހަރު ނިކުތް ޑައިރެކްޓަރ ޢީސާ ޝަރީފްގެ "ފަތިސް ހަނދުވަރު"، 1999 ވަނަ އަހަރު ނިކުތް ފަރިވާ ފިލްމްސްގެ "ބަދަލު"، 2002 ވަނަ އަހަރު ނިކުތް ޑައިރެކްޓަރ ފީރޯޒް އައިޝަތު ގެ "ހިތް އެދެނީ"، 2003 ވަނަ އަހަރު ނިކުތް ޑައިރެކްޓަރ ޢީސާ ޝަރީފްގެ "ގިނި ހިލަ"، 2004 ވަނަ އަހަރު ނިކުތް ޑައިރެކްޓަރ ފާތިމަތު ނަހުލާގެ "ކަލާޔާ ނުލާ"، 2005 ވަނަ އަހަރު ނިކުތް ޑައިރެކްޓަރ އަޙުމަދު ނިމާލް ގެ "ދަރިންނަށްޓަކައި"، 2006 ވަނަ އަހަރު ނިކުތް ޑައިރެކްޓަރ އަހުމަދު ނިމާލް ގެ "ހިޔަނި"، އަދި 2008 ވަނަ އަހަރު ނިކުތް ޑައިރެކްޓަރ ފާތިމަތު ނަޙުލާގެ "ޔޫސުފް" ފަދަ ފިލްމްތައް ހިމެނެއެވެ.