އިންޓަރ ސްކޫލް 3 އޮން 3 ޗެމްޕިއަންޝިޕްގައި ބައިވެރިވުމަށް ހުޅުވާލައިފި

ބާސްކެޓް ބޯލް އެސޯސިއޭޝަނުން އިންތިޒާމްކޮށްގެން މެއި މަހުގެ ފުރަތަމަ ދުވަހު ފެށުމަށް ހަމަޖެހިފައިވާ 6 ވަނަ އިންޓަރ ސްކޫލް 3 އޮން 3 ޗެމްޕިއަންޝިޕްގައި ބައިވެރިވުމުގެ ފުރުސަތު ހުޅުވާލައިފިއެވެ.

އަންގާރަ ދުވަހު ބާސްކެޓް ބޯލް އެސޯސިއޭޝަނުން ކުރި އިއުލާނެއްގައި ވަނީ އިންޓަރ ސްކޫލް 3 އޮން 3 ޗެމްޕިއަންޝިޕްގައި ބައިވެރިވުމަށް އެދޭ ސްކޫލްތަކުން 22 އޭޕްރިލް ވާ އާދިއްތަ ދުވަހުގެ މެންދުރުފަހު 2:00 ގެ ކުރިން ބައިވެރިވާ އުމުރުފުރާ އެނގޭ ގޮތަށް ލިޔުމަކުން އެ އެސޯސިއޭޝަނަށް ހުށަހެޅުށް އެދޭކަމަށެވެ. އަދި އަދި 23 އޭޕްރިލް ވާ ހޯމަ ދުވަހުގެ މެންދުރުފަހު 2:00 ގެ ކުރިން ޓީމް ލިސްޓް ހުށަހެޅުމަށްވެސް އެސޯސިއޭޝަނުން ވަނީ އެދިފައެވެ.

ބާސްކެޓް ބޯލް އެސޯސިއޭޝަނުން ބުނީ މިމުބާރާތުގެ ޤަވާއިދާއި ޓީމް ލިސްޓް ހުށަހަޅާ ފޯރމްގެ އިތުރުން، މުބާރާތާއި ބެހޭ މަޢުލާމާތު ހެންވޭރު ބޯޅަ ގޭގައި ހުންނަ އެ އެސޯސިއޭޝަނުން ލިބޭނެކަމަށެވެ.

އިންޓަރ ސްކޫލް 3 އޮން 3 ޗެމްޕިއަންޝިޕްގައި އުމުރުފުރާތައް ބަހާލެވިފައިވަނީ 14 އަހަރުން ދަށުގެ އަންހެން އަދި ފިރިހެން، މީގެ އިތުރުން 16 އަހަރުން ދަށުގެ އަންހެން އަދި ފިރިހެން ޑިވިޝަނެވެ.