ގޯމޭޒް ބޭނުން ވަނީ ބާސާގައި މަޑުކުރަން

އަންނަ ހޫނު މޫސުމުގެ ޓްރާންސްފާ މާކެޓުގައި އެހެން ޓީމަކަށް ބަދަލުނުވާނެ ކަމަށާއި މަޑުކުރާނީ ބާސެލޯނާގައި ކަމަށް އެ ޓީމަށް ކުޅެމުން އަންނަ ޕޯޗުގަލްގެ މިޑްފީލްޑަރު އަންދްރޭ ގޯމޭޒް ބުނެފިއެވެ.

ވެލެންސިއާ ދޫކޮށް 2016 ވަނަ އަހަރު 35 މިލިއަން ޔޫރޯގެ ފީއަކަށް ބާސާއަށް ބަދަލުވުމަށް ފަހު ގޯމޭޒްއަށް އެންމެ އެދެވޭ ކުޅުން ދެއްކިފައެއް ނުވެއެވެ. ބާސާގައި އޭނާއަށް އެންމެ އެދެވޭ ކުޅުން ނުދެއްކުމާ ގުޅިގެން އެހެން ޓީމަކުން އޭނާ ފެނިދާނެ ކަމަށް ރިޕޯޓުތައް އަންނަނީ ބުނަމުންނެވެ. އެގޮތުން އިނގިރޭސިވިލާތުގެ މެންޗެސްޓާ ޔުނައިޓެޑާއި އިޓަލީގެ އޭސީ މިލާނުން އޭނާ ހޯދުމަށް މަސައްކަތްކުރަމުންދާ ކަމަށް ރިޕޯޓުތައް ބުނެއެވެ.

ހޮނިހިރު ދުވަހުގެ ރޭ 3-1 އިން ލެގާނޭސް އަތުން ބާސާ މޮޅުވި މެޗުގައި އެ ޓީމުގެ ފުރަތަމަ އެގާރާގައި ހިމެނިގެން އޭނާ މޮޅު ކުޅުމެއް ދެއްކިއެވެ. ފުޓްބޯޅަ ދިރާސާކުރާ ފަރާތްތަކުން ބުނަމުންދާ ގޮތުގައި އެ މެޗަކީ ބާސާގެ ޖާޒީގައި ގޯމޭޒް ކުޅުނު އެންމެ ފުރިހަމަ މެޗެވެ. އެ މެޗަށް ފަހު ނޫސްވެރިންނާ ވާހަކަ ދައްކަމުން ގޯމޭޒް ބުނީ ހޫނު މޫސުމުގެ ޓްރާންސްފާ މާކެޓާ މެދު ނުވިސްނާ ކަމަށާއި ބާސާއަށް ކުޅުމަކީ އޭނާ ކުޑައިރުއްސުރެ ވެސް ދެކުނު ހުވަފެނެއް ކަމަށެވެ. އޭނާ ބުނީ މިއީ އޭނާ ވަރަށް ގަޔާވާ ޓީމެއް ކަމަށާއި ބާސާގައި ހޭދަކުރަމުންދާ ދުވަސްތަކުގައި އެ ޓީމާއެކު ގިނަ ކާމިޔާބުތަކެއް ހޯދަން ބޭނުންވާ ކަމަށެވެ.

ގޯމޭޒް ވަނީ މީގެ ކުރިން އޭނާއަށް ކުރިމަތިވަމުންދިޔަ ފާޑުކިޔުންތަކާ ގުޅިގެން ވެސް ވާހާކަ ދައްކާފައެވެ. އޭރު އޭނާ ބުނީ ފުރަތަމަ ހަ މަސްދުވަހު ކަންކަން ދިޔައީ ވަރަށް ރަނގަޅަށް ކަމަށާއި އެހެން ނަމަވެސް އޭގެ ފަހުން ބޮޑު ގޮންޖެހުންތަ ކުރިމަތިވެގެންދިޔަ ކަމަށެވެ. އޭނާ ބުނީ އަމިއްލަ ނަފްސަށް އޮންނަ އިތުބާރު ދަށްވެގެންދިޔަ ކަމަށާއި ފަރިތަކުރުންތަކުގައި އެކަން ވަރަށް ބޮޑަށް ދެއްކި ކަމަށެވެ. އޭނާ ބުނީ ގެއިން ނުނިކުމެ ވެސް ދުވަސްތަކެއް ހޭދަކުރި ކަމަށާއި މީހުންނާ ވާހަކަ ނުދައްކާ ވަގުތުތަކެއް ވެސް ހޭދަކުރި ކަމަށެވެ. އެހެން ނަމަވެސް ޓީމުގެ އެހެން ކުޅުންތެރިންގެ ފަރާތުން ވަރަށް ބޮޑު އެހީތެރިކަމެއް ލިބޭ ކަމަށް ގޯމޭޒް ބުނެފައި ވެއެވެ.

ގޯމޭޒްގެ އެ އިންޓަވިއުއަށް ފަހު ބާސާގެ ސަޕޯޓަރުން އަންނަނީ އޭނާއަށް ހިތްވަރުދިނުމުގެ ގޮތުން ގިނަ ހަރަކާތްތަކެއް ހިންގަމުންނެވެ. ލެގާނޭސްއާ ދެކޮޅަށް ކުޅުނު މެޗުގައި ގޯމޭޒްއަށް ފުރަތަމަ އެގާރައިން ފުރުސަތު ލިބުނީ އަނިޔާގެ ސަބަބުން ސާޖިއޯ ބުސްކެޓްސް ސްކޮޑުން ބާކީ ކުރުމާ ގުޅިގެންނެވެ. އެކަމާ ގުޅޭ ގޮތުން ވާހަކަ ދައްކަމުން ގޯމޭޒް ބުނީ އޭނާ ކުރަނީ މަސައްކަތް ކަމަށާއި ކޮންމެ ކުޅުންތެރިއެއް ނެތް ނަމަވެސް އެ މަގާމު އަދާކުރެވޭނެކަން ކޯޗަށް ހާމަކޮށްދޭން ބޭނުންވާ ކަމަށެވެ. އޭނާ ބުނީ ބާސާގައި އޭނާ އެންމެ ބޮޑު ރޯލެއްގެ ގޮތުގައި ދެކެނީ ބުސްކެޓްސް ނެތްތަން ފޫބެއްދުން ކަމަށެވެ.

ޕޯޗުގަލްއާ އެކު 2016 ވަނަ އަހަރުގެ ޔޫރޯ ކާމިޔާބުކުރުމަށް ފަހު ބާސާއަށް ބަދަލުވެ ގޯމޭޒް ވަނީ އެ ޓީމަށް 75 މެޗު ކުޅެދީ ތިން ލަނޑު ޖަހައިދީފައެވެ.