ފަސް އަހަރަށް ޖަލަށް ލުމަށް ހުކުމް ކުރުމަށް ފަހު ކަފާލާތުގެ ދަށުން މިނިވަން ވެފައިވާ ބޮލީވުޑްގެ ތަރި، ސަލްމާން ޚާނާއި ކުރީގެ ލޯބިވެރިޔާ ކެޓްރީނާ ކައިފްއާ އަލުން ގުޅުނީތޯ ގިނަ ބަޔަކު ސުވާލު އުފައްދަން ފަށައިފިއެވެ.
ދެ ދުވަސް ޖަލުގައި ހޭދަ ކުރުމަށް ފަހު، މިނިވަން ވުމާ އެކު ސަލްމާން ވަނީ ވަގުތުން މުމްބާއީ އަށް ދަތުރުކޮށްފައެވެ. އަދި އޭނާ ދިރިއުޅޭ ގެލްކްސީ އެޕާޓްމަންޓަށް ގިނަ ތަރިންތަކެއް ވަނީ ޒިޔާރަތް ކޮށްފައެވެ. އޭގެ ތެރޭގައި އެންމެ ފާހަގަ ކުރެވުނު ފަރާތަކީ ކެޓްރީނާއެވެ.
ސަލްމާނަށް ގެއަށް ދެވުނުތާ މާ ގިނަ އިރުތަކެއް ނުވަނީސް ކެޓްރީނާ ކާރެއްގައި ގެލެކްސީ އެޕާޓްމަންޓަށް ވަންނަތަން ފެނެއެވެ. ނަމަވެސް މިއީ ސަލްމާނާއި ކެޓްރީނާ އަލުން ގުޅުނު ކަމުގެ ވާހަކަތައް ފެށުނު ހިސާބެއް ނޫނެވެ. އެއީ 2017 ވަނަ އަހަރުގެ އޮކްޓޯބަރު މަހުން ފެށިގެން ދެކެވޭ ވާހަކަތަކެކެވެ.
ސަލްމާނާއި ކެޓްރީނާ އެންމެ ފުރަތަމަ ރަށްޓެހިވެފައި ވަނީ 2003 ވަނަ އަހަރެވެ. ގިނަ ދުވަސްތަކެއް ވަންދެން އެކުގައި ހޭދަކުރުމަށް ފަހު ވަކިވެފައި ވަނީ 2010 ވަނަ އަހަރެވެ. އޭގެ ފަހުން މިހާތަނަށް އަށް އަހަރު ވެފައިވާ އިރު، ނިމިގެން ދިޔަ އަހަރު ދެ މީހުން އެކުގައި ފެންނަ ހަ ވަނަ ފިލްމް، "ޓައިގަރ ޒިންދާ ހޭ"ގެ މަސައްކަތް ފެށިއެވެ.
ޝޫޓިންގ ފެށުމަށް ފަހު ކެޓްރީނާގެ ސޯޝަލް މީޑީއާ އެކައުންޓްތަކުން ދެ މީހުންގެ ފޮޓޯތައް ފެންނަން ފެށިއެވެ. އަދި ސަލްމާން ވެސް ވަނީ ކެޓްރީނާގެ ފޮޓޯތައް އިންސްޓަގްރާމް މެދުވެރިކޮށް ޝެއާކޮށްފައެވެ. ނަމަވެސް ދެ މީހުން ވެސް ޝެއާ ކޮށްފައި ވަނީ ހަމައެކަނި ފިލްމްގެ ޕްރޮމޯޝަން ފޮޓޯތަކެއް ނޫންކަން ފާހަގަ ކުރެވެއެވެ. މީގެ އިތުރުން، ކެޓްރީނާގެ އާއިލާގެ ފަރާތްތަކަށް އުފަންދުވަހުގެ ތަހުނިޔާ ފޮނުވައި، ސަލްމާން ވަނީ ފޮޓޯތައް ޝެއާކޮށްފައެވެ.
ދެ ބްލެކްބަކް މަރާލިކަމުގެ ކުށް ސާބިތުވެ، ސަލްމާން ފަސް އަހަރަށް ޖަލަށްލުމަށް ބުރާސްފަތި ދުވަހު ހުކުމް ކޮށްފައިވާ އިރު، އޭގެ ދުވަސް ކޮޅެއް ކުރިން ސަލްމާން ވަނީ ރާއްޖެއަށް ދަތުރުކޮށްފައެވެ. އަދި އެ ދުވަސް ކޮޅު، ސަލްމާންގެ ކޮއްކޮ އަރްޕިތާ އާއި ދަރިފުޅު އާހިލްއާ އެކު ކެޓްރީނާ ވަގުތު ހޭދަ ކުރިއެވެ.
އާހިލްގެ ދެވަނަ އުފަން ދުވަސް އަބޫ ދާބީގައި ފާހަގަކޮށްފައިވާއިރު، އެ ހަފްލާގައި ބައިވެރިވުމަށް ކެޓްރީނާއަށް ވެސް ވަނީ ދައުވަތު ދީފައެވެ. ނަމަވެސް މަސައްކަތް ހުރި ގޮތުން އޭނާއަށް އަބޫ ދާބީއަކަށް ދަތުރެއް ނުކުރެވުނެވެ. އެހެންކަމުން، މުމްބާއީއަށް އަނބުރާ ދިއުމަށް ފަހު އަރްޕިތާ އާއި ކެޓްރީނާ ބައްދަލު ކުރިއެވެ. އަރްޕިތާ އާއި ކެޓްރީނާއަކީ ވެސް ގާތް އެކުވެރިން ކަމަށް ރިޕޯޓްތަކުގައި ބުނެއެވެ. އަދި ހުކުމް ކުރުމުގެ އެއް ދުވަސް ކުރިން، ކެޓްރީނާ ވަނީ އަރްޕިތާއާ އެކު ސިދިވިނަޔަކް ޓެމްޕްލްއަށް ގޮސްފައެވެ.
ސަލްމާން އަދި ކެޓްރީނާ ވެސް މިކަމާ ގުޅޭ ގޮތުން މިހާތަނަށް ބަހެއް ބުނެފައެއް ނުވެއެވެ. މީގެ ކުރިން ވެސް ހަތް އަހަރު އެކީގައި އުޅުނު އިރު، ދެ މީހުންގެ ގުޅުމުގެ ވާހަކަ މިޑީއާގައި ދައްކާފައެއް ނުވެއެވެ. މީޑިއާގައި ތަފާތު ވާހަކަ ދެކެވުނު ނަމަވެސް އެ ދެ މީހުން އެކަން ހާމަކޮށްފައެއް ނުވެއެވެ. ސަލްމާންއާ އެކު "ސީރިއަސް" ރިލޭޝަންޝިޕެއްގައި އުޅުނު ވާހަކަ ކެޓްރީނާ ފުރަތަމަ ހާމަކުރީ ވެސް ރުޅިވިތާ އެއް އަހަރު ފަހުން، 2011 ވަނަ އަހަރެވެ.
ކެޓްރީނާ އާއި ރަށްޓެހިވުމުގެ ކުރިން ސަލްމާން އުޅުނީ 1994 ވަނަ އަހަރުގެ މިސް ވަރލްޑް، އައިޝްވާރްޔާ ރާއީއާ އެކުއެވެ. އެ ގުޅުން ވެސް އޭރު އޮތީ ސިއްރު ގުޅުމެއްގެ ގޮތުގައެވެ. އަދި ރުޅިވެފައި ވަނީ 2001 ވަނަ އަހަރުކަމަށް ބެލެވެއެވެ.
"ޓައިގަރ ޒިންދާ ހޭ" ޝޫޓިންގ ފެށުމުގެ ކުރިން، ސަލްމާނާއި އިއުލިއާ ވަންތޫރުއާ ރަށްޓެހިވެގެން އުޅޭ ވާހަކަތައް ވަނީ ފެތުރިފައެވެ. އޭނާ ވަނީ އާހިލްގެ ފުރަތަމަ އުފަންދުވަސް ފާހަގަ ކުރުމަށް 2017 ވަނަ އަހަރު މާޗް މަހު ސަލްމާނާ އާއިލާއާ އެކު ރާއްޖެއަށް ވެސް ދަތުރުކޮށްފައެވެ. އަދި އެ ނޫނަސް ދެ މީހުން އެކުގައި ގިނައިން ފެނިފައިވާ އިރު ސަލްމާންގެ އާއިލީ ހަފްލާތަކުގައި ވެސް އޭނާ ބައިވެރިކުރެއެވެ. ސަލްމާން މިނިވަން ވުމުން ޒިޔާރަތް ކުރި މީހުންގެ ތެރޭގައި އިއުލިއާ ވެސް ހިމެނެއެވެ. ނަމަވެސް "ޓައިގާ ޒިންދާ ހޭ"ގެ މަސައްކަތް ފެށުމާ އެކު އިއުލިއާ އަށް ވުރެ ސަލްމާނާއި ކެޓްރީނާގެ ވާހަކަ ވަނީ ގަދަވެފައެވެ.
