ރާއްޖޭގައި އުޅޭން ދަތިވެއްޖެ ކަމަށް ގަބޫލު ކުރެވޭ ޒުވާނުންގެ އަދަދު އިތުރުވެފައިވާ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު އެހެން ވިދާޅުވީ އެމްޑީޕީގެ މެނިފެސްޓޯގައި ޒުވާނުންނަށް އަމާޒު ހިފަންޖެހޭ ކަންތައްތަކާ ގުޅޭ ގޮތުން، އެމަނިކުފާނު ދެކިވަޑައިގަންނަވާ ގޮތް ހިއްސާކުރުމަށް ހޯމަ ދުވަހު އާންމު ކުރެއްވި އޯޑިއޯއެއްގައެވެ.
ރައީސް ނަޝީދުގެ ވާހަކަފުޅު ފެއްޓެވީ ޒުވާން ކުއްޖެއްގެ ވާހަކައަކުންނެވެ. މަދުރަސީ ތައުލީމު ނިންމައި ކައިވެނިކޮށްގެން ދަރިއަކު ހޯދާފައިވާ ޒުވާނެއްގެ ވާހަކައަކުންނެވެ. ޒަމާނީ ފެޝަނަށް ލޯބިކުރާ އެ ޒުވާނާ އާމްދަނީ ހޯދުމަށް ގަދައަޅާ މަސައްކަތް ކުރި ނަމަވެސް، އޭނާއަށް ގޮންޖެހުމެއް ކުރިމަތިވެފައިވާ ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ ރާއްޖޭގައި ދިރިއުޅޭ ކިތަންމެ ޒުވާނެއްގެ ދިރިއުޅުން ވަރަށް އުނދަގޫވެފައިވާ ކަމަށެވެ. ވަކިން ހާއްސަކޮށް މާލޭގައި ނޫޅެވޭ ދަރަޖައަށް ކަންތައްތައް ގޮސްފައިވާ ކަމަށް އެމަނިކުފާނު ވިދާޅުވިއެވެ. އަދި ވިދާޅުވީ މަގުމައްޗަށް ނުކުންނަ ޒުވާނާއަކީ ދިވެހި މުޖުތަމައުގެ މީހެއް ނޫން ކަން ދެއްކުމަށް މަސައްކަތް ކުރާ މީހުން ވެސް ގިނަވެފައިވާ ކަމަށެވެ.
"ކިތަންމެ ޒުވާނެއްގެ ދިރިއުޅުން ވަރަށް އުނދަގޫވެއްޖެ. ރާއްޖޭގައި ވަކިން ހާއްސަކޮށް މާލޭގައި ނޫޅެވޭ ދަރަޖައަށް ކަންތައްތައް ހިނގައްޖެ. ޒުވާނުންނަށް ނޫޅެވޭ ދަރަޖައަށް ކަންތައްތައް ހިނގައްޖެ،" ރައީސް ނަޝީދު ވިދާޅުވިއެވެ.
"ވަރަށް ގިނަ ޒުވާނުންނަށް ރާއްޖޭގައި އުޅޭން ދަތިވެއްޖެ ކަމަށް ހިތަށް ވަންނަ އަދަދު ގިނަވެއްޖެ. އެ ޒުވާނުންނަކީ ވަރަށް ގިނަ ފަހަރަށް ތަންދޮރު ދަންނަ، މަސައްކަތްތެރި ޒުވާނުން. ރާއްޖޭގެ އިގުތިސާދު އަދި މުސްތަގުބަލް ބިނާ ކުރުމުގައި އެ ޒުވާނުންގެ އެހީތެރިކަން، އަދި ފުރިހަމަ ބައިވެރިވުން އިންތިހާއަށް ބޭނުންވާނެ. އެ މީހުން ބާކީކޮށް ވަކި ދެން ބިނާކުރާނެ ރާއްޖެއެއް ނެތް،" ރައީސް ނަޝީދު ވިދާޅުވިއެވެ.
އެމްޑީޕީގެ މެނިފެސްޓޯ ހެދުމުގެ މަސައްކަތް ފަށާފައިވާ ކަމަށް ފާހަގަ ކުރައްވައި، ރައީސް ނަޝީދު ވިދާޅުވީ ޕާޓީގެ މެނިފެސްޓޯގެ، އެއް އަމާޒަކަށް ވާންޖެހޭނީ ހުރިހާ އެންމެންނަށް ވެސް އަމާންކަމާއެކު އެކުވެރިކަމާއި އުފަލުގައި އުޅެވޭނެ މާހައުލެއް އުފެއްދުން ކަމަށެވެ.
އެ މީހަކު އެދޭ ގޮތަށް އެ މީހެއްގެ އާއިލާއާއެކު ރާއްޖޭގައި ދިރިއުޅެވެން ޖެހޭނެ ކަމަށާއި ބުރުގާ އެޅި ކުދިންނަށް ވެސް އަދި ބުރުގާ ނާޅާ ކުދިންނަށް ވެސް އުފުލާއި ރައްކާތެރިކަމާއެކު ރާއްޖޭގައި އުޅެވެންޖެހޭނެ ކަމަށް ރައީސް ނަޝީދު ވިދާޅުވިއެވެ.
"ބުރުގާ އެޅި ކުދިންނަށް ވެސް، އަދި ބުރުނާ ނާޅާ ކުދިންނަށް ވެސް އުފަލާއި ރައްކާތެރިކަމާއެކު އުޅެވޭނެ ރާއްޖެއެއް ހޯދުން،" ނަޝީދު ވިދާޅުވިއެވެ.
އެމަނިކުފާނު ވިދާޅުވީ އުފާވެރި ދިރިއުޅުމެއްގެ އުންމީދުގައި ދައްކާ ކޮންމެ ވާހަކައަކީ ލާދީނީ ވާހަކައެއްގެ ގޮތުގައި މަރުކާޖެހިދާނެ ކަމުގެ ބިރުގައި ސިޔާސީ ލީޑަރުން ފަހަތަށް ޖެހިވަޑައިގެން ނުވާނެ ކަމަށެވެ.
"މަޖާކުރުމާއި މުނިފޫހިފިލުވުމާއި އުފަލުގައި އުޅުމުގެ ފުރުސަތުތައް ހޯދައި ދިނުމަކީ ވަކި ސިޔާސީ ޕާޓީއެއްގެ އެކަނި މަސައްކަތަކަށް ވެގެން ނުވާނެ. އުފާވެރި ދިރިއުޅުމެއްގެ އުންމީދުގައި ދައްކާ ކޮންމެ ވާހަކައަކީ ލާދީނީ ވާހަކައެއްގެ ގޮތުގައި މަރުކާޖެހިދާނެ ކަމުގެ ބިރުގައި ރާއްޖޭގެ ސިޔާސ ލީޑަރުން ފަހަށް ޖެހިވަޑައިގެން ނުވާނެ،" ރައީސް ނަޝީދު ވިދާޅުވިއެވެ.
