އެއްގަމު މަގުން ގުޅިފައިވާ ސަޢޫދީ ޢަރަބިއްޔާ އާއި ޤަތަރާ ދެމެދު ޗެނަލެއް ކޮނެ، ދެޤައުމު ވަކިކޮށްލުމަށް ސަޢޫދީ އިން ނިންމާފައިވާ ކަމަށް އެޤައުމުގެ ނޫހަކުން ބުނެފިއެވެ.

ސަޢޫދީގެ ނޫހެއް ކަމަށްވާ ސަބްޤުން ބުނީ ގުޅިފައިވާ މިދެޤައުމުގެ ސަރަހައްދީ އިމުގައި ޗެނަލެއް ކޮނެ، ދެޤައުމު ވަކިކޮށްލުމަށް ހަދާފައިވާ ޕްލޭން އަދި ފައިނަލްނުވާ ކަމަށެވެ. 

މިކަން ކުރުމަށްޓަކައި ސަޢޫދީ އާއި ޤަތަރު އެއްގަމު މަގުން ގުޅޭ 60 ކިލޯމީޓަރުގެ ސަރަހައްދު ކޮންނަން ޖެހޭނެއެވެ. އެ ނޫނުން ބުނީ ދެޤައުމު ވަކިކުރަން ކޮންނަ ޗެނަލްގެ ފުޅާމިނުގައި 200 މީޓަރު އަދި ފުން މިނުގައި 15 - 20 މީޓަރު ހުންނާނެ ކަމަށެވެ. މިޗެނަލް ކޮންނާނީ ޤަތަރު - ސަޢޫދީ ސަރަހައްދީ އިމުގެ ސަޢޫދީ ފަޅިން 1 ކިލޯމީޓަރު އެތެރޭގައެވެ. އެހެންކަމުން ޤަތަރު ވަކިކޮށްލި ނަމަވެސް ޗެނަލް އާއި ޤަތަރުގެ ސަރަހައްދީ އިމާއި ދެމެދު އޮންނަ 1 ކިލޯމީޓަރުގެ ބިމުގައި ސަޢޫދީގެ ބިން އޮންނާނެއެވެ. އަދި ޗެނަލްގެ ބޭނުން ޤަތަރަކަށް ނުކުރެވޭނެއެވެ. ސަޢޫދީ މީޑިއާ ރިޕޯޓްތައް ބުނާ ގޮތުގައި އެބިމުގައި ޤާއިމްކުރަނީ ސަޢޫދީ އަސްކަރީ ބޭސްއެކެެވެ. 

މި ޕްރިޮޖެކްޓުގެ އަގު ބިލިއަނެއްހާ ޑޮލަރަށް އަރާނެ ކަމަށް ރިޕޯޓްތައް ބުނެއެވެ. އަދި 1 އަހަރުތެރޭ އެމަސައްކަތް ނިންމޭނެ ކަމަށް ވެސް ރިޕޯޓްތައް ބުނެއެވެ.

ގިނަ ބައެއްގެ ފާޑުކިޔުންތައް އަމާޒުވެފައިވާ އާދަޔާ ޚިލާފު މިމަސައްކަތް ކުރަން ސަޢޫދީ އިން މަސައްކަތްކުރާއިރު، އެޤައުމުން ވަނީ ޤަތަރާ އެކު އޮންނަ ހުރިހާ ގުޅުމެއް ކަނޑާލާފައެވެ. ސަޢޫދީގެ އިތުރުން ގަލްފުގެ އެހެން ޤައުމުތަކަށްވާ ޔޫއޭއީ އާއި ބަޙްރައިން އަދި މިސްރުން ވެސް ވަނީ ޤަތަރާ އެކު އޮންނަ ގުޅުން މިދިޔަ އަހަރުގެ މެދުތެރޭގައި ކަނޑާލައި، އެޤައުމުތަކުގެ ރައްޔިތުން ޤަތަރަށް ދިޔުން މަނާކޮށް، ޤަތަރުގެ ރައްޔިތުން އެޤައުމުތަކަށް ދިޔުން މަނާކޮށްފައެވެ. 

ޤަތަރުން ޓެރަރިޒަމަށް ވާގިވެރިވާ ކަމަށާއި އަދި އީރާނާ އެކު ގާތް ގުޅުމެއް ބާއްވާ ކަމަށް އެޤައުމުތަކުން ދަނީ ބުނަމުންނެވެ. އެހެން ނަމަވެސް ޤަތަރުން އެތުހުމަތުތައް ދޮގުކުރެއެވެ. އަދި ޤަތަރުގެ އަމީރު ޝައިޚް ތަމީން ބިން ޙަމަދު އަލްޘާނީ ވިދާޅުވީ ޤަތަރުގެ އިސްތިޤްލާލު އަވަށްޓެރި ޤައުމުތަކަށް ވިއްކާނުލާނެ ކަމަށެވެ. ދުނިޔޭގެ އެންމެ މުއްސަނދި އެއް ޤައުމު ކަމަށްވާ ޤަތަރުން ގެންދަނީ އެޤައުމާ ދެކޮޅަށް އަވަށްޓެރި ޤައުމުތަކުން އެޅި ދަތިކުރުމުގެ ފިޔަވަޅުތަކުގެ ސަބަބުން ލިބޭ އިޤްތިޞާދީ ގެއްލުންތައް ފޫބެއްދުމަށް ތަފާތު އެކި ޕްލޭންތައް އެކަށައަޅަމުންނެވެ.