"ޓިއުބްލައިޓް" ގެ ޑިސްޓްރިބިއުޓަރުންނަށް ސަލްމާން ފައިސާ ދެނީ

ޖޫން މަހުގެ 23 ވަނަ ދުވަހު ސިނަމާތަކަށް އައިސްފައިވާ "ޓިއުބްލައިޓް" ގެ ޑިސްޓްރިބިއުޓަރުންނަށް ސަލްމާން ޚާން ފައިސާ ދޭން ނިންމައިފިއެވެ.

އިންޑިއާގެ ނޫސްތަކުގައި ބުނެފައިވަނީ ސަލްމާން ޑިސްޓްރިބިއުޓަރުންނަށް ދޭން ނިންމާފައިވަނީ 5.5 ބިލިއަން ރުޕީސް ކަމަށެވެ. ސަލްމާން އެގޮތަށް ނިންމާފައިވަނީ "ޓިއުބްލައިޓް" އަށް މާބޮޑު ތާއީދެއް ނެތި އެފިލްމުގެ އާމްދަނީ ދުވަހަކަށްވުރެ ދުވަހެއް ދަށަށް ދާތީ ޑިސްޓްރިބިއުޓަރުން އެ ފައިސާ އަނބުރާ ދޭން ގޮވާލާފައިވަނިކޮށެވެ.

ސަލްމާން ޚާން މިގޮތަށް ނިންމާފައިވަނީ ބައެއް ޑިސްޓްރިބިއުޓަރުން ސަލްމާނާއި އޭނާގެ ބައްޕައާއި ބައްދަލުކޮށް އެކަމާއި ބެހޭގޮތުން މަޝްވަރާކޮށްފައިވާތީ ކަމަށް ރިޕޯޓްތައް ބުނެފައިވެއެވެ. އަދި އެ މަޝްވަރާގައި ޑިސްޓްރިބިއުޓަރުންނަށް 5.5 ބިލިއަން ރުޕީސް އަނބުރާ ދޭން ނިންމާފައިވާކަމަށްވެސް އިންޑިއާގެ ނޫސްތަކުގައިވެއެވެ.

"ޓިއުބްލައިޓް" ކާމިޔާބު ނޫން ކަމަށް ބުނާ ސަބަބުތަކުގެ ތެރޭގައި ފިލްމުގެ ސްކްރިޕްޓް އެހާ ޝައުގުވެރިކަމެއް ނެތުން ހިމެނެ އެވެ. މި ފިލްމުގެ ސީންތަކުގައި ފޭކް އެމޯޝަންސް ހުރިކަމަށާއި އަސްލު އިހުސާސްތައް ދެއްކުމަށް އުނދަގޫވާ ކަން ދޭހަވާކަމަށް އެނަލިސްޓުން ބުނެފައިވެއެވެ.

"ޓިއުބްލައިޓް" ގެ އެންމެ ބޮޑު ނާކާމިޔާބީއަކީ އެހާ ރަނގަޅު ޓްރެއިލާއެއް ނުނެރެވުންކަމަށް އެނަލިސްޓުން ވަނީ ބުނެފައެވެ. މީގެ އިތުރުން ފިލްމުން އާންމުންނަށް ދޭން ބޭނުންވި މެސެޖް ނުދެވުނުކަމަށްވެސް ބުނެފައިވެއެވެ.

"ޓިއުބްލައިޓް" އެޅުވުމުގެ ކުރިން ސަލްމާން ޚާން ބުނެފައިވަނީ ފިލްމުން ވަރަށް ރަނގަޅު މެސެޖެއް އާންމުންނަށް ލިބޭނެކަމަށެވެ. އެހެން ނަމަވެސް އެ މެސެޖެއް ނުލިބޭކަމަށް އެނަލިސްޓުން ވަނީ ބުނެފައެވެ.