ކްލަބް ޓީޓީ ޗެމްޕިއަންޝިޕްގައި ބައިވެރިވުމަށް އެމްއެސްއާރްސީ ބަންގާޅަށް

ދެކުނު އޭޝިއާގެ ކްލަބް ޓޭބަލް ޓެނިސް ޗެމްޕިއަންޝިޕްގައި ބައިވެރިވުމަށް އައިލެންޑް އޭވިއޭޝަން ސާވިސަސްގެ މޯލްޑިވިއަން ސްޕޯޓްސް އެންޑް ރެކްރިއޭޝަން ކްލަބް (އެމްއެސްއާރްސީ) ބަންގްލަދޭޝްއަށް ފުރައިފިއެވެ.

ބަންގްލަދޭޝްގެ ޗިޓަގޮންގްގައި ކުރިޔަށްދާ މި މުބާރާތުގައި ތިން ކުޅުންތެރިޔަކު ހިމެނެއެވެ. އެ ކުޅުންތެރިންގެ ތެރޭގައި ހިމެނެނީ އަލީ އާދަމް މަނިކް އަދި މުހައްމަދު މައިޒަރު އާދަމް ޒާހިރުގެ އިތުރުން އިސްމާއިލް ޝުޖާއުއެވެ. މި ޓީމުގެ މެނޭޖަރެއްގެ ގޮތުގައި އަހުމަދު އާސިފް ދަތުރުގައި ބައިވެރިވިއިރު އޭނާގެ އިތުރުން ޓޭބަލް ޓެނިސް އެސޯސިއޭޝަނުގެ އެކްސްކޯ މެމްބަރު އިބްރާހިމް ޝިއުރީ ވެސް ވަނީ މި ދަތުރުގައި ޓީމާއެކު ބައިވެރިވެފައެވެ.

މިއީ ކްލަބް ފެންވަރުގައި މި ސަރަހައްދުގައި ބާއްވާ ފުރަތަމަ ޓޭބަލް ޓެނިސް މުބާރާތަށްވާއިރު މި މުބާރާތް ކުރިޔަށްދާނީ މި މަހުގެ ހަތްވަނަ ދުވަހުން ފެށިގެން ނުވަވަނަ ދުވަހަށެވެ. މުބާރާތުގެ ކުޅުން ނިންމާލުމަށްފަހު ޓީމު މާލެ އެނބުރި އަންނަން ހަމަޖެހިފައިވަނީ މި މަހުގެ 11 ވަނަ ދުވަހުއެވެ.