ނަން ބަދަލުކޮށްގެން އުޅޭ ގުރުރާޖްގެ ބަންދަށް 13 ދުވަސް ޖަހައިފި
ހައްޔަރުކޮށްފައިވަނީ އަންގާރަ ދުވަހު އައްޑޫއިން
ބާސްކަރު ސްރިވަސްތާއަށް ނަން ބަދަލުކޮށްގެން ރާއްޖެއައިސް މަސައްކަތްކުރަމުންދިޔަ ގުރުރާޖް ކިޝޯރް
ނަން ބަދަލުކޮށް، ޝަޚްސު އޮޅުވާލައިގެން ރާއްޖެ އައިސް އައްޑޫ ސިޓީގައި މަސައްކަތް ކުރަމުންދަނިކޮށް ހައްޔަރުކުރި އިންޑިއާ މީހާގެ ބަންދަށް 13 ދުވަސް ޖަހައިފިއެވެ.
ބާސްކަރު ސްރިވަސްތާއަށް ނަން ބަދަލުކޮށްގެން ރާއްޖެއައިސް އައްޑޫސިޓީގައި ލެބް ޓެކްނީޝަނެއްގެ ގޮތުގައި މަސައްކަތް ކުރަމުންދިޔަ ގުރުރާޖް ކިޝޯރް ހައްޔަރު ކޮށްފައިވަނީ އަންގާރަ ދުވަހުއެވެ. އޭނާގެ ބަންދާއިމެދު ގޮތެއް ނިންމުމަށް ހާޒިރުކޮށްފައިވަނީ އައްޑޫ ސިޓީ މަރަދޫ މެޖިސްޓްރޭޓް ކޯޓަށެވެ.
ގުރުރާޖް ކިޝޯރުގެ ބަންދަށް ކޯޓުން މުއްދަތު ޖަހައިދިން ނަމަވެސް، އޭނާ ހައްޔަރު ކޮށްފައިވަނީ ކޮން މައްސަލައެއްގައި ކަމެއް ފުލުހުން ހާމައެއް ނުކުރެއެވެ. ފުލުހުން ބުނީ އޭނާ ހައްޔަރުކުރީ ފުލުހުން ތަޙުޤީޤު ކުރަމުންދާ މައްސަލައަކާއި ގުޅިގެން ކަމަށެވެ.
މަޢުލޫމާތު ލިބިފައިވާ ގޮތުގައި 2014 ވަނަ އަހަރު ބާސްކަރު ސްރިވަސްތާގެ ނަމުގައި އޭނާ ރާއްޖެ އައިސްފައި ވަނީ އައްޑޫ ސިޓީ ހިތަދޫގައި ހިންގާ އައިއެމްޑީސީ ކްލިނިކްގެ ލެބްގައި މަސައްކަތް ކުރުމަށެވެ. އޭގެ ފަހުން 2016 ވަނަ އަހަރު އޭނާ ވަނީ އައްޑޫސިޓީ ފޭދޫގައި ހުންނަ އެއިމްސް ކްލިނިކަށް ބަދަލުވެފައެވެ.
ބާސްކަރު ސްރިވަސްތާ (ގުރުރާޖް ކިޝޯރް) ރާއްޖެއަށް ގެނައި އައިއެމްޑީސީއާ ހަވާލާދީ އޭއޯނިއުސްގައި ބުނެފައި ވަނީ، އޭނާ އައިއެމްޑީސީއަށް ވަޒީފާއަށް ގެނެސްފައި ވަނީ ވަޒީފާއަށް މީހުން ގެންނަ އާންމު އުސޫލުގެ ދަށުން، އެއްވެސް މައްސަލައެއް ނެތި، ސަރުކާރުގެ ކަމާ ބެހޭ ފަރާތްތަކަށް ހުށަހަޅަން ޖެހޭ ހުރިހާ ލިޔެކިޔުންތަކެއް ފުރިހަމައަށް ހުށަހަޅައިގެން ޤަވައިދުގެ ދަށުން ކަމަށެވެ. އަދި އޭނާ އެއިމްސް ކްލިނިކަށް ބަދަލުވީ އަމިއްލައަށް އެދިގެން ކަމަށް ވެސް އެ ކްލިނިކުން ވަނީ ބުނެފައެވެ.
އިންޑިއާގެ ނޫސްތަކުގައި ތަފްޞީލް ކޮށްދީފައި ވާގޮތުން 2006 ވަނަ އަހަރުގެ ޖުލައި މަހުގެ 26 ވަނަ ދުވަހު، މަރާލައި އެއްލާލާފައި އޮއްވައި ފެނުނު އުމުރުން 32 އަހަރުގެ ތާނިޔާ ބެނަރޖީ މަރާލިކަމުގެ ތުޙުމަތުގައި ގުރުރާޖް ހައްޔަރުކޮށްފައި ވަނީ ޖެހިގެން އައި ދުވަހުއެވެ. އަދި އޭރު އޭނާ ވަނީ ތާނިޔާ މަރާލިކަމަށް އެއްބަސްވެ، އެކަން ކުރި ގޮތް ވެސް ފުލުހުންނަށް ކިޔައިދީފައެވެ.
