އަނިޔާގެ ސަބަބުން މިރޭގެ މެޗުގައި އަގުއޭރޯ ނުކުޅޭނެ
އަގުއޭރޯއަށް އަނިޔާވީ އިންޓަނޭޝަނަލް ބްރޭކްގެ ކުރިން
ސާޖިއޯ އަގުއޭރޯ
އެންފީލްޑުގައި ކުޅޭ މި މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ގާޑިއޯލާ ވަނީ ސްކޮޑާއެކު އަގުއޭރޯ ލިވަޕޫލްއާ ދަތުރުނުކުރާކަން ކަށަވަރުކޮށްދީފައެވެ. އޭނާ މެންޗެސްޓާގައި މަޑުކޮށްފައިވަނީ އިންޓަނޭޝަނަލް ބްރޭކްގެ ކުރިން އޭނާއަށް ލިބުނު އަނިޔާއަކަށް އިތުރު ފަރުވާ ހޯދުމުގެ ގޮތުންނެވެ.
މަ މަހުގެ ހަތަރު ވަނަ ދުވަހު ޗެލްސީ އަތުން 1-0 ގެ ނަތީޖާއަކުން ސިޓީ މޮޅުވި މެޗުގެ ފަހުން އެ ޓީމަށް އަގުއޭރޯ އެއްވެސް މެޗެއް ކުޅެދީފައެއް ނުވެއެވެ. ރަށުން ބޭރުގައި ސްޓޯކް ސިޓީ އަދި އެވަޓަންއާ ދެކޮޅަށް ކުޅުނު މެޗުތަކަށް ނެގި ސްކޮޑުގައި ވެސް އޭނާ ހިމަނާފައެއް ނުވެއެވެ. ހަމައެހެންމެ އާޖެންޓީނާގެ ގައުމީ ޓީމު ސްޕެއިން އަދި އިޓަލީއާ ދެކޮޅަށް ކުޅުނު ރަހުމަތްތެރިކަމުގެ މެޗުތަކުގައި ވެސް އޭނާ ފެނިގެން ގޮސްފައެއް ނުވެއެވެ.
ނޫސްވެރިންނާއި ވާހަކަ ދައްކަމުން ގާޑިއޯލާ ބުނީ އޭނާ ހުރީ މެންޗެސްޓާގައި ކަމަށާއި އަދިވެސް އޭނާ ފިޓުނުވާ ކަމަށެވެ. އޭނާ ބުނީ މެންޗެސްޓާ ޔުނައިޓެޑާ ދެކޮޅަށް ކުޅޭ މެޗުގައި އޭނާ ފެނިދާނެ ކަމަށާއި މިހާރު އޭނާގެ އަނިޔާ ވަރަށް ބޮޑަށް ރަނގަޅުވެފައިވާ ކަމަށެވެ. ހަމައެހެންމެ ޑޮކްޓަރުންނާއި ވެސް ވާހަކަ ދެކެވުމުންދާ ކަމަށާއި އަގުއޭރޯ އޭނާއާ ވެސް ވާހަކަ ދެއްކި ކަމަށް ގާޑިއޯލާ ބުނެފައިވެއެވެ.
މެންޗެސްޓާ ޔުނައިޓެޑްގެ ދަނޑުގައި ހޮނިހިރު ދުވަހު ކުޅޭ މެޗުން ސިޓީ މޮޅުވެއްޖެނަމަ އެ ޓީމަށް އިނގިރޭސި ޕްރިމިއާ ލީގުގެ ތަށި ޔަގީންވެގެންދާނެއެވެ.
ލިވަޕޫލްއާ ދެކޮޅަށް އަގުއޭރޯއަށް ނުކުޅެވޭނެކަން ކަށަވަރުވެފައިވާއިރު އޭނާގެ ބަދަލުގައި އެ ޓީމުގެ ފޯވާޑް ލައިން މިރޭ ބަލަހައްޓާނީ ގެބްރިއެލް ޖީސަސްއެވެ. މި ސީޒަނުގެ މިހާތަނަށް ސިޓީ ބަލިކުރި ހަމައެކަނި ޓީމަކީ ލިވަޕޫލްއެވެ.
