ބޮލީވުޑްގެ ތަރިންގެ ތެރެއިން ސޯނަމް ކަޕޫރު މިއަހަރު ކައިވެނި ކުރަން އުޅޭ ވާހަކައަކީ ވަރަށް ބާރަށް ދެކެވެމުންދާ ވާހަކައެކެވެ.
ސޯނަމް ކަޕޫރާއި އޭނާގެ ދުވަސްވީ ލޯބިވެރިޔާ އާނަންދު އަހޫޖާ ކައިވެނި ކުރަން އުޅޭ ވާހަކަތައް ގަދަވެފައިވަނިކޮށް އެންމެ ފަހުން އެ ދެ މީހުންނާ ބެހޭ ގޮތުން ދެކެވުނު ވާހަކައަކީ ކައިވެނި ކުރާނީ މިއަންނަ މެއި މަހު ކަމަށެވެ. އަދި އެކައިވެނި ކުރަން އުޅެނީ ސްވިޒަލޭންޑުގެ ޖެނީވާގައި ކަމަށާއި އެ ކައިވެންޏަށް ދެ މީހުން ވެސް ތައްޔާރުވަމުން ދާކަމަށް ޚަބަރުތައް ބުނެއެވެ. ބައެއް މީޑިއާތަކުން ރިޕޯޓް ކޮށްފައި ވަނީ ސޯނަމް ކައިވެނި ކުރާނީ އަންނަ މެއި މަހުގެ 11 ނުވަތަ 12 ގައި ކަމަށެވެ. ރިޕޯޓްތައް ބުނާ ގޮތުން ހިންދޫންގެ އާދަކާދަތަކާ އެއްގޮތަށް ޖެނީވާގައި ބާއްވާ، މި ކައިވެނީގެ ހަފްލާގެ ހެދުންތައް ފަރުމާކުރަނީ އިންޑިއާގެ މަޝްހޫރު ފެޝަން ޑިޒައިނަރުން ކަމަށްވާ އަބޫ ޖާނީ-ސަންދީޕް ކޯސްލާއި އާއި އިނގިރޭސިވިލާތުގެ ޓަމާރާ ރާލްފް އާއި މައިކަލް ރުސޯއެވެ.
އެ ދުވަހަށް ތައްޔާރުވުމުގެ ގޮތުން ސޯނަމްގެ ބައްޕަ އަނިލް ކަޕޫރު އަވަދި ނެތި އުޅެމުންދާ ކަމަށް ވެސް ބައެއް މީޑިއާތަކުގައި ވަނީ ރިޕޯޓް ކޮށްފައެވެ.
ކޭންސް ފިލްމު ފެސްޓިވަލް އޮންނަނީ މެއިމަހުގެ 8 އިން 16 އަށް ކަމަށްވާއިރު ސޯނަމް ކައިވެނި ކުރަނީ 11 ނުވަތަ 12 ވަނަ ދުވަހުގައި ކަމަށް ވުމުން ކޭންސް ފިލްމު ފެސްޓިވަލްގައި ސޯނަމް ބައިވެރި ނުވެ ކައިވެނި ކޮށްފާނެތޯ ވެސް މީޑިއާތަކުގައި ވަނީ ސުވާލު އުފައްދާފައެވެ. ސޯނަމްއަކީ ވޭތިވެ ދިޔަ ހަތް އަހަރު ލޯރިއާލްގެ ބްރޭންޑް އެމްބެސެޑަރުގެ ގޮތުގައި އެ ފެސްޓިވަލްގައި ބައިވެރިވާ ތަރިއެކެވެ.
ސޯނަމްގެ ކައިވެންޏާ ބެހޭ ގޮތުން އޭނާ ވެސް އަދި އޭނާގެ އާއިލާ އިން ވެސް އެއްވެސް ވާހަކައެއް މީޑިއާއާ މިހާތަނަށް ހިއްސާކޮށްފައެއް ނުވެއެވެ. އެހެން ކަމުން މިޑިއާގައި ރިޕޯޓްކޮށްފައި ވަނީ ތުންތުންމަތިން ދެކެވޭ ވާހަކަތަކާއި ސޯނަމްގެ ގާތް މީހުންނާ ހަވާލާދީއެވެ.
