ވޭލްސްގެ ވިންގަރު ގެރެތު ބޭލް އަދި ސްޕެއިންގެ މިޑްފީލްޑަރު އިސްކޯ ނެތަސް ރެއާލް މެޑްރިޑަކީ ވަރުގަދަ ޓީމެއް ކަމަށް އެ ޓީމަށް ކުޅެމުން އަންނަ ކްރޮއޭޝިއާގެ މިޑްފީލްޑަރު ލޫކާ މޮޑްރިޗް ބުނެފިއެވެ.
ރެއާލް އެންމެފަހުން ކުޅުނު ހަތަރު މެޗުގެ ތެރެއިން އިސްކޯ ކުޅެފައިވަނީ އެންމެ މެޗެކެވެ. މިކަމާއި ގުޅިގެން އޭނާވަނީ ޓީމުގައި އަދާކުރުމަށް ޒިދާން ދީފައިވާ ރޯލާއި މެދު ހިތްހަމަނުޖެހުން ފާޅުކޮށް ވާހަކަ ދައްކާފައެވެ. އެހެން ނަމަވެސް ސީޒަނުގެ ކުރީކޮޅު ދިމާވި އަނިޔާގެ މައްސަލަތަކަށް ހައްލެއް ހޯދުމަށް ފަހު ބޭލް އަންނަނީ ރަނގަޅު ކުޅުމެއް ދައްކަމުންނެވެ. އޭނާ ވަނީ އެންމެފަހުން ކުޅުނު ހަ މެޗުގައި އެ ޓީމަށް ފަސް ލަނޑު ޖަހައިދީފައެވެ. މިކަމުގެ ސަބަބުން ރެއާލްގެ ފުރަތަމަ އެގާރައިން ފުރުސަތު ލިބޭނެ ކުޅުންތެރިޔަކާމެދު ވަނީ ސުވާލު އުފެދިފައެވެ.
މިކަމާއި ގުޅޭގޮތުން ވާހަކަ ދައްކަމުން މޮޑްރިޗް ބުނީ ބޭލް ކުޅުނަސް ނުވަސް އިސްކޯ ކުޅުނު ކަމުގައި ވިޔަސް ވާނީ އެއް ކަމެއް ކަމަށާއި އެ ދެ ކުޅުންތެރިންނަކީ ވެސް އެއްވަރަކަށް ޓީމަށް މުހިންމު ކުޅުންތެރިން ކަމަށެވެ. އޭނާ ބުނީ ދެ ކުޅުންތެރިންނާއެކު ވެސް ކުޅެވިދާނެ ކަމަށާއި އެންމެ މުހިންމު ކަމަކީ ދަނޑުމަތީގައި ދައްކާ މަސައްކަތް ކަމަށެވެ.
މޮޑްރިޗް ބުނީ މި ސީޒަނާއި މީގެ ކުރީ ސީޒަންތަކުގައި ޓީމުގެ ހުރިހާ ކުޅުންތެރިން ވެސް ދަނޑުމަތީގައި މަސައްކަތްކުރާ މަންޒަރު އެންމެނަށް ވެސް ފެނިފައިވާނެ ކަމަށާއި ހުރިހާ ކުޅުންތެރިން ވެސް އެންމެ ބޮޑު އިސްކަމެއް ދޭންޖެހޭނީ ޓީމެއްގެ ގޮތުގައި ކުޅެން ކަމަށެވެ.
އޭނާ ބުނީ ހުރިހާ ވެސް ނިންމުމެއް އޮންނާނީ ކޯޗުގެ އަތްމަތީގައި ކަމަށާއި މޮޑްރިޗް ބުނީ އިސްކޯ ނުކުޅުނު ކަމުގައި ވިޔަސް އޭނާގެ މުހިންމުކަން ޓީމަށް ވަރަށް ބޮޑު ކަމަށާއި އޭނާއަކީ ތަފާތު ދައްކާ ކުޅުންތެރިޔެއް ކަމަށެވެ. ބޭލްއާ ގުޅޭގޮތުން މޮޑްރިޗް ބުނީ އަނިޔާގެ ސަބަބުން މިއީ ބޭލްއަށް އުނދަގޫ ސީޒަނެއް ކަމަށާއި އެހެން ނަމަވެސް މިހާރު އޭނާ އަންނަނީ ރަނގަޅު ކުޅުމެއް ދައްކަމުން ކަމަށެވެ. އޭނާ ބުނީ އަނިޔާއިން ސަލާމަތްވެ ހުރެއްޖެނަމަ ބޭލް ލަނޑު ޖަހާނެކަން އެންމެން ވެސް ދަންނަ ކަމަށާއި އޭނާ ޓީމަށް ކޮށްދޭ މަސައްކަތަކީ ޓީމަށް ވަރަށް މުހިންމު މަސައްކަތެއް ކަމަށެވެ.
މޮޑްރިޗް ވަނީ މި އިންޓަވިއުގައި ކްރިސްޓިއާނޯ ރޮނާލްޑޯއާ ގުޅޭގޮތުން ވެސް ވާހަކަ ދައްކާފައެވެ. ރޮނާލްޑޯއާ ގުޅޭގޮތުން މޮޑްރިޗް ބުނީ އޭނާ ޖެހި ލަނޑުގެ އަދަދު ވެސް ނޭނގޭ ކަމަށާއި ރޮނާލްޑޯ ފޯމުގައި ހުރުމަކީ އެހެން ޓީމުތަކުގެ މައްޗަށް ރެއާލްއަށް ލިބޭ ބޮޑު އެޑްވާންޓޭޖެއް ކަމަށެވެ. އޭނާ ބުނީ އެންމެ މުހިންމު ކަމަކީ ތަޖުރިބާ ކަމަށާއި އަތުން ހެދޭ ގޯސްތައް މަދު ކުރެވިއްޖެނަމަ ޓީމު ދާނީ ކުރިޔަށް ކަމަށެވެ.
މި ސީޒަނުގެ ސްޕެނިޝް ލަލީގާ ކާމިޔާބުކުރުމުގެ ފުރުސަތު ރެއާލްއަށް ގެއްލިފައިވާއިރު އެ ޓީމަށް ޔުއެފާ ޗެމްޕިއަންސް ލީގު ކާމިޔާބުކުރުމުގެ ފުރުސަތު އަދިވެސް އެބައޮތެވެ.
