އެމެރިކާގެ 60 ޑިޕްލޮމެޓުން ފޮނުވާލައި، ރަޝިއާގައި ހުންނަ އެމެރިކާ ކޮންސިއުލޭޓެއް ބަންދުކޮށްފި
ފޮނުވާލުމަށް ނިންމާފައިވާ އެމެރިކާގެ އޮފިޝަލުންގެ ތެރޭގައި މޮސްކޯގައި ހުންނަ އެމެރިކާ އެމްބަސީގައި މަސައްކަތްކުރާ 58 މީހަކު ހިމެނޭ
އިނގިރޭސިވިލާތުގައި ނަރވް އޭޖެންޓްގެ ހަމަލާ ދިން ކަމަށް ބުނާ ރަޝިއާގެ ކުރީގެ އިންޓެލިޖެންސް އޮފިސަރ ސަރްގޭ ސްކްރިޕަލް އަދި އޭނާގެ ދަރިފުޅު
ރަޝިއާގައި ތިބި އެމެރިކާގެ ޑިޕްލޮމެޓިކް އޮފިޝަލުން އެގައުމުން ފޭބުމަށް އަންގައި، ރަޝިއާގެ ސެއިންޓް ޕީޓަރސްބަރގްގައި ހުންނަ އެމެރިކާގެ ކޮންސިއުލޭޓް ބަންދުކޮށްފިއެވެ.
ރަޝިއާގައި ތިބި އެމެރިކާގެ 60 ޑިޕްލޮމެޓެން އަންނަ އޭޕްރީލް މަހުގެ 5 ވަނަ ދުވަހުގެ ކުރިން އެގައުމުން ފޭބުމަށް އަންގާފައި ވަނީ، އެމެރިކާގައި ތިބި ރަޝިއާގެ 60 ޑިޕްލޮމެޓުން އެގައުމުން ފޭބުމަށް މިދިޔަ ހަފްތާގައި އެމެރިކާ އިން އެންގި އެންގުމަށް ރައްދު ދިނުމުގެ ގޮތުންނެވެ.
ރަޝިއާގެ ޚާރިޖީވުޒާރާ އިން ބުރާސްފަތި ދުވަހު ނެރުނު ބަޔާނެއްގައި ވަނީ، އެގައުމުން ފޭބުމަށް އަންގާފައިވާ އޮފިޝަލުންގެ ތެރެއިން 58 މީހުންނަކީ ވެރިރަށް މޮސްކޯގައި ހުންނަ އެމެރިކާގެ އެމްބަސީގައި މަސައްކަތް ކުރާ އޮފިޝަލުން ކަމަށާއި، ބާކީ ތިބި ދެ އޮފިޝަލުންނަކީ ޔެކަޓެރިންބަރގްގައި ހުންނަ އެމެރިކާ ކޮންސިއުލޭޓްގައި މަސައްކަތް ކުރާ ދެ މީހުން ކަމަށެވެ.
މީގެ އިތުރުން ރަޝިއާ އިން ވަނީ ސެއިންޓް ޕީޓަރސްބަރގްގައި ހުންނަ އެމެރިކާގެ ކޮންސިއުލޭޓްގެ ހުއްދަ ބާތިލްކޮށްފައެވެ.
ރަޝިއާގެ މިނިންމުމަށް އެމެރިކާގެ ސްޓޭޓް ޑިޕާޓްމަންޓުން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ސްޓޭޓް ޑިޕާޓްމަންޓްގެ ތަރުޖަމާނު ހީތަރ ނައުއަރޓް ވިދާޅުވީ، ރަޝިއާގެ އަމަލުތަކުން ދައްކައިދެނީ މަޝްވަރާ ކޮށްގެން ކަންކަން ހައްލު ކުރުމުގެ ޝައުގުވެރިކަމެއް ނެތް ކަން ކަމަށެވެ. އަދި އެމެރިކާ އިން ރަޝިއާގެ ޑިޕްލޮމެޓުން ބޭރު ކުރުމަށް ނިންމީ އިނގިރޭސިވިލާތުގެ ރައްޔިތަކާއި އޭނާގެ ދަރިފުޅަށް ދިން ނަރވް އޭޖެންޓްގެ ހަމަލާއާ ގުޅިގެން ކަމަށެވެ.
ނޭޓޯ އިން ވެސް ވަނީ ރަޝިއާގެ މިޝަންގައި މަސައްކަތް ކުރާ ހަތް އޮފިޝަލަކު ގައުމުން ފައިބަން ޖެހިފައިވާކަން ހާމަކޮށްފައެވެ.
ފާއިތުވި ހަފްތާގައި އިނގިރޭސިވިލާތުން ވަނީ އެގައުމުގައި މަސައްކަތް ކުރާ ރަޝިއާގެ 23 އޮފިޝަލަކު އެގައުމުން ބޭރުކޮށްފައެވެ.
އިނގިރޭސިވިލާތުގެ ބޮޑުވަޒީރު ތެރޭސަ މޭ ވަނީ، ރަޝިއާގެ ކުރީގެ އިންޓެލިޖެންސް އޮފިސަރެއް ކަމަށްވާ ސަރްގޭ ސްކްރިޕަލް އާއި އޭނާގެ ދަރިފުޅު ޔޫލިއާ އަށް އިނގިރޭސިވިލާތުގައި ވިހަ ދިނުމުގައި ރަޝިއާގެ ބައިވެރިވުން އޮތް ކަމުގެ ހެކި ލިބިފައިވާ ކަމަށް ވިދާޅުވެފައެވެ.
ޔޫލިއާގެ ހާލަތު މިހާރު ރަނގަޅު ވަމުން އަންނަ އިރު އޭނާގެ ހާލަތު ސީރިއަސް ނޫން ކަމަށް ޑޮކްޓަރުން ވަނީ ބުރާސްފަތި ދުވަހު ބުނެފައެވެ. އެހެންނަމަވެސް ސަރްގޭގެ ހާލު ސީރިއަސް ކަމަށް ޑޮކްޓަރުން ބުނެއެވެ.
