ޒްލާޓާން އިބްރަހިމޮވިޗް ނެތްތަން މެންޗެސްޓާ ޔުނައިޓެޑްއިން ދައްކާނެ ކަމަށް އެ ޓީމުގެ ޑިފެންޑަރު ފިލް ޖޯންސް ބުނެފިއެވެ.

އުމުރުން 36 އަހަރުގެ އިބްރަހިމޮޗް ވަނީ ޔުނައިޓެޑާ އެކު ހަދާފައިވާ ކޮންޓްރެކްޓް އުވާލުމަށް ފަހު އެމެރިކާގެ މޭޖަރ ލީގު ސޮކާގެ ޓީމެއް ކަމަށްވާ އެލްއޭ ގެލެކްސީއަށް ބަދަލުވެފައެވެ. މިދިޔަ ހޫނު މޫސުމުގެ ޓްރާންސްފާ ބާޒާރުގައި އިބްރަހިމޮވިޗް ހޯދުމަށް ގިނަ ކްލަބްތަކުން މަސައްކަތްކުރިއެވެ. އެހެންނަމަވެސް ޔުނައިޓެޑުން ވަނީ އިބްރާހިމޮވިޗް ދޫކޮށްލުމަށް ފަހު، އަލުން އަނބުރާ އޭނާއާ އެކު އެއްބަސްވުމަކަށް އައިސް ސޮއި ހޯދާފައެވެ.

އިނގިރޭސިވިލާތުގެ ބައިނަލްއަގްވާމީ ޑިފެންޑަރު ނޫސްވެރިންނާ ވާހަކަ ދައްކަމުން ބުނެފައި ވަނީ އިބްރަހިމޮވިޗްއަކީ އޭނާގެ ކެރިއަރުގައި އެކުގައި ކުޅުމުގެ ފުރުސަތު ލިބުނު ވަރުގަދަ ޝަހުސިއްޔަތެއް ކަމަށެވެ. އޭނާ ބުނީ އިބްރަހިމޮވިޗް މަތިން ވަރަށް ހަނދާންވާނެ ކަމަށާއި އޭނާއަކީ ދަނޑުމަތީގައި އެ ޓީމަށް ވަރަށް މުހިންމު ކުޅުންތެރިއެއް ކަމަށެވެ. ދަނޑުމަތީގައި އޭނާ ދައްކާ ކުޅުމާ އެއްވަރަށް އޭނާއަކީ ޑްރެސިން ރޫމްގައި ވެސް ވަރަށް މުހިންމު ކުޅުންތެރިއެއް ކަމަށާއި އުއްމީދަކީ އޭނާއަށް ކާމިޔާބު ލިބުން ކަމަށް ފިލް ޖޯންސް ބުނެފައިވެއެވެ.

ޔުނައިޓެޑް ދޫކޮށްލަން އިބްރަހިމޮވިޗް ނިންމީ އޭނާގެ ފިޓްނެސް ލެވެލް ދަށްވުމާ އެކު އެ ޓީމުގެ ކުޅުންތެރިއެއްގެ ގޮތުގައި ދެމިހުރުމަކީ އެންމެ ރަނގަޅު ގޮތް ކަމުގައި ނުދެކޭތީ ކަމަށެވެ. އިބްރަހިމޮވިޗް ވަނީ ޔުނައިޓެޑް ދޫކޮށްލުމަށް ފަހު އެ ޓީމުގެ ކުޅުންތެރިންނާއި ކޯޗު އަދި ސަޕޯޓަރުންނަށް ޝުކުރު އަދާކޮށް ހާއްސަ މެސެޖެއް ވެސް ފޮނުވާފައެވެ. ޔުނައިޓެޑް އިން ވެސް ވަނީ ކްލަބަށް އިބްރަހިމޮވިޗް ކޮށްދިން ހުރިހާ ކަމަކަށް ޝުކުރު އަދާކުރާ ކަމަށާއި އޭނާގެ މުސްތަގުބަލު ކާމިޔާބު ވާނެ ކަމަށް އުއްމީދުކުރާ ކަމަށް ބުނެފައެވެ. ޖޯންސް ބުނެފައި ވަނީ އިބްރަހިމޮވިޗް ނެތްތަން ޔުނައިޓެޑްގެ ސްކޮޑުން ދައްކާނެ ކަމަށާއި އެހެން ނަމަވެސް އެ ކްލަބާކީ އެއް ކުޅުންތެރިޔަކަށް ބިނާވެގެން ކުޅޭނެ ޓީމެއް ނޫން ކަމަށެވެ.

ޔުނައިޓެޑާ އިބްރަހިމޮވިޗް ގުޅިފައި ވަނީ 2016 ވަނަ އަހަރު ފްރާންސްގެ ޕީއެސްޖީގައި ބޮޑެތި ކާމިޔާބުތަކެއް ހޯދުމަށް ފަހުއެވެ. ޖޯންސްއަކީ އޭރުވެސް ޔުނައިޓެޑްގެ ފުރަތަމަ އެގާރައިން ޖާގަ ހޯދަމުންދިޔަ ކުޅުންތެރިޔެކެވެ. ޔުނައިޓެޑްގައި ހޭދަކުރި ދެ އަހަރުގައި އޭނާ ވަނީ އެ ޓީމަށް 53 މެޗު ކުޅެދީ 29 ލަނޑު ޖަހައިދީފައެވެ. ހަމައެހެންމެ ޖޯންސްއާއެކު އިބްރަހިމޮވިޗް ވަނީ ޔުނައިޓެޑަށް އިނގިރޭސި ލީގު ކަޕާއި އެފްއޭ ކޮމިއުނިޓީ ޝީލްޑް އަދި ޔުއެފާ ޔުރޮޕާ ލީގު ކާމިޔާބުކޮށްދީފައެވެ.