ސްވިޑަންގެ ފޯވާޑް ލާޓަން އިބްރަހޮމިޗް ހުރުމަކީ ޓީމަށް ލިބިގެންދާނެ ބޮޑު ހިއްވަރެއް ކަމަށާއި، އޭނާ ހުރުމުން އިތުރު ކާމިޔާބީތަކަށް ވާސިލުވެވިދާނޭ ކަމަށް މެންޗެސްޓާ ޔުނައިޓެޑުގެ ކޯޗް ހޯޒޭ މޮރީނިއޯ ބުނެފިއެވެ.

ގޯލް ޑޮޓްކޮމްއާއި ވާހަކަދައްކަމުން މޮރީނިއޯ ބުނީ އިބްރަހިމޮވިޗް މެންޗެސްޓާއަށް ބަދަލުވުމަކީ އުފާކުރަން ޖެހޭ ކަމެއް ކަމަށާއި އެއީ މޮލޫ ކުޅުންތެރިއެއް ކަމަށެވެ. އިބުރަހިމޮވިޗްއަކީ ދުނިޔޭގެ ނިސްބަތުން ވަރަށް ހުނަރުވެރި މޮޅު ފޯވާޑެއް ކަމަށް ވެސް މޮރީނިއޯ ވަނީ ބުނެފައެވެ.

މޮރީނިއޯ ބުނީ އިބްރަހިމޮވިޗްއަކީ ޓީމު އިތުރަށް ވަރުގަކޮށް ޓީމު ބިނާކުރުމަށް މުހިންމު ކުޅުންތެރިއެއް ކަމަށާއި އޭނާގެ ތަޖުރިބާއަކީ އެކަމުގެ ހެއްކެއް ކަމަށެވެ. މޮރީނިއޯ ބުނީ އޭނާއަށް އިބްރަހިމޮވިޗް ވަރަށް ރަނގަޅަށް އެނގޭ ކަމަށާއި އެގޮތުން އޭނާއާ މެދު ވަރަށް އިތުބާރު ބޮޑު ކަމަށެވެ.

އަނިޔާގައި ހަތަރު މަސް ދުވަހު ހޭދަކުރުމަށް ފަހު އިބްރަހިމޮވިޗް ޔުނައިޓެޑާ އަލުން ގުޅިފައި ވަނީ ދާދި ފަހުންނެވެ. އަލުން އެނބުރި ޔުނައިޓެޑާ އިބްރަހިމޮވިޗް ގުޅުނު އިރު އޭނާއަކީ ނިމިގެން ދިޔަ ސީޒަނުގައި ޔުނައިޓެޑްގައި މޮޅު ކުޅުމެއް ދައްކާފައިވާ ކުޅުންތެރިއެކެވެ.

އިބްރަހިމޮވިޗް މިދިޔަ ސީޒަނުގައި ޔުނައިޓެޑްގައި މޮޅު ކުޅުމެއް ދައްކާފައިވާއިރު އޭނާއަށް އަނިޔާގެ މައްސަލަ ކުރިމަތިވީ ޔުރޮޕާ ލީގުގައި ބެލްޖިއަމްގެ އަންޑަލެކްޓާ ދެކޮޅަށް ކުޅުނު މެޗުގައެވެ. އެ މެޗުގައި އަނިޔާވެފައި ވަނީ އޭނާގެ ކަކުލުގެ ލިގަމެންޓަށެވެ.

ޔުނައިޓެޑާއި އޭނާއާ ދެމެދު ވެފައި އޮތް އެއްބަސްވުމުގެ މުއްދަތު ހަމަވުމުން އިބްރަހިމޮވިޗް ހުރީ އެއްވެސް ކްލަބަކަށް ނިސްބަތް ނުވާ ކުޅުންތެރިޔެއްގެ ގޮތުގައެވެ.

އެހެން ނަމަވެސް ހަތަރު މަސްދުވަހު އަނިޔާގައި ހުރުމަށް ފަހު އޭނާ ވަނީ އަލުން އަނބުރާ މެންޗެސްޓާ ޔުނައިޓެޑަށް ސޮއިކޮށްފައެވެ.

ކޮންޓްރެކްޓްގައި ސޮއި ކުރުމަށް ފަހު ވާހަކަ ދައްކަމުން އިބްރަހިމޮވިޗް ބުނީ އަލުން އަނބުރާ ކުޅުމުގެ ތެރެއަށް އައުމަށް ކެތްމަދުވެފައި ހުރި ކަމަށާއި އެހެން ނަމަވެސް އަނިޔާއިން މުޅިން ރަނގަޅުވުމަށް އަދިވެސް އިތުރު ވަގުތު ނަގާނެ ކަމަށެވެ. އަދި ކުރީގެ ފޯމު އަނބުރާ ހޯދުމަށް ގަދައަޅައި މަސައްކަތް ކުރާނެ ކަމަށް ވެސް އިބްރަހިމޮވިޗް ބުނެފައި ވެއެވެ.

ޔުނއިޓެޑުގެ ކޯޗު ހޯޒޭ މޮރީނިއޯ ބުނެފައި ވަނީ އިބްރަހިމޮވިޗް އަލުން އަނބުރާ ޓީމާ ގުޅުމަކީ ލިބުނު ކުރިއެރުމެއް ކަމަށާއި އޭނާގެ ތަޖުރިބާ އާއި ހުނަރަކީ މި ސީޒަނުގައި ތަށި ހޯދުމަށް ވަރަށް މުހިންމު އެއްޗެއް ކަމަށެވެ. ހަމަ އެހެންމެ މިދިޔަ ސީޒަނުގައި އޭނާގެ ފަރާތުން ފެނިގެންދިޔަ މޮޅު ކުޅުމާ އެކު އޭނާއަށް އާ އެއްބަސްވުމެއް ހައްގު ކަމަށް މޮރީނިއޯ ހާމަކުރިއެވެ.

މިދިޔަ ސީޒަނުގައި އިބްރަހިމޮވިޗް ބޭނުންކުރި 9 ނަމްބަރު ޖާޒީ މި ސީޒަނުގައި ބޭނުންކުރަނީ ޔުނައިޓެޑާ އަލަށް ގުޅުނު ފޯވާޑް ލުކާކޫއެވެ. އިބްރަހިމޮވިޗް މި ސީޒަނުގައި ބޭނުންކުރާނީ 10 ނަމްބަރު ޖާޒީއެވެ.

އިބްރަހިމްއޮވިޗް ވަނީ މިދިޔަ ސީޒަނުގައި ޔުނައިޓެޑުގައި މޮޅުކުޅުމެއް ދައްކާފައެވެ. އެގޮތުން ޔުނައިޓެޑަށް ކުޅެދިން 28 މެޗުގައި އޭނާ ވަނީ 17 ގޯލް ކާމިޔާބު ކޮށްދީފައެވެ.