މި ސީޒަނުގެ މިހާތަނަށް އައިއިރު ލިވަޕޫލަށް ކުޅެމުން އަންނަ މިސްރުގެ ފޯވާޑް މުހައްމަދު ސަލާހަށް ވުރެ މޮޅު ކުޅުމެއް ދައްކަމުން އަންނަނީ ބާސެލޯނާގެ ލިއޮނެލް މެސީ އަދި ރެއާލް މެޑްރިޑްގެ ފޯވާޑް ކްރިސްޓިއާނޯ ރޮނާލްޑޯ ކަމަށް ލިވަޕޫލްގެ ލެޖެންޑް އިއާން ރަޝް ބުނެފިއެވެ.

ރަޝްއަކީ އެއް ސީޒަނެއްގައި ލިވަޕޫލަށް އެންމެ ގިނަ ލަނޑު ޖަހައިދިން ކުޅުންތެރިޔާގެ ރެކޯޑު އޮންނަ ކުޅުންތެރިޔާއެވެ. އެހެން ނަމަވެސް މި ސީޒަނުގައި ސަލާހުގެ ފަރާތުން ފެންނަމުންދާ މޮޅު ކުޅުމާއި އޭނާ ޖަހަމުންދާ ލަނޑުގެ އަދަދުގެ ސަބަބުން 1984 ވަނަ އަހަރު ރަޝްގެ ރެކޯޑު ސަލާހު މުގުރާލާނެ ކަމަށް ގިނަ ބަޔަކު ގަބޫލުކުރެއެވެ. މިދިޔަ ހޫނު މޫސުމުގެ ޓްރާންސްފާ މާކެޓުގައި އިޓަލީގެ ރޯމާ ދޫކޮށް 36.9 މިލިއަން ޕައުންޑަށް ލިވަޕޫލަށް ބަދަލުވުމަށް ފަހު ސަލާހު ވަނީ މިހާތަނަށް އެ ޓީމަށް 36 ލަނޑު ޖަހައިދީފައެވެ. ރަޝްގެ ރެކޯޑު މުގުރާލުމަށް ސަލާހަށް ބާކީ 11 މެޗު އެބައޮތެވެ. މި މޮޅު ކުޅުމުގެ ސަބަބުން އޭނާ ހޯދުމަށް ރެއާލް އަދި ބާސާއިން މަސައްކަތްކުރަމުންދާ ކަމަށް ވެސް ރިޕޯޓުތައް ބުނެއެވެ.

ސްކައި ސްޕޯޓްސްއާ ވާހަކަ ދައްކަމުން ރަޝް ބުނީ ޕްރިމިއާ ލީގުގައި ލިވަޕޫލަށް ކުޅުނު އެންމެ ފޯވާޑުންގެ ތެރޭގައި ފެނާންޑޯ ޓޮރޭޒް އަދި ލުއިސް ސުއަރޭޒްގެ އިތުރުން ސަލާހު ވެސް މިހާރު އެ ލިސްޓުގައި ގުނާ ލެވޭނެ ކަމަށެވެ. އޭނާ ބުނީ މި ސީޒަނުގައި ސަލާހުގެ ފަރާތުން ފެންނަމުންދަނީ ތަފާތު ކުޅުމެއް ކަމަށާއި އޭނާގެ ހިތްތިރި ކަމަކީ ވެސް އަޖައިބުވާ ފަދަ ކަމެއް ކަމަށެވެ.

ރަޝް ބުނީ ވޮޓްފޯޑާ ދެކޮޅަށް ސަލާހު ކުޅުނު މެޗަކީ އޭނާގެ ފަރާތުން އެންމެ މޮޅު ކުޅުން މި ސީޒަނުގައި ފެނުނު މެޗު ކަމަށާއި އެ މެޗުގައި އޭނާ ހުރީ އެހެން ކުޅުންތެރިންނާއި މުޅިން ތަފާތު ލެވެލްއެއްގައި ކަމަށެވެ. އެ މެޗުގައި ސަލާހު ހަތަރު ލަނޑު ޖެހިކަން ފާހަގަކުރަމުން ރަޝް ބުނީ ހަތަރު ލަނޑު ޖެހުމުގެ އިތުރަށް ޓީމުގެ އެހެން ކުޅުންތެރިންނަށް ފުރުސަތު ތަނަވަސްކޮށްދިނުމަށް ވެސް ސަލާހު ބުރަ މަސައްކަތްތަކެއް ކުރި މަންޒަރު ފެނިގެންދިޔަ ކަމަށެވެ. އޭނާ ބުނީ އެ ފެންވަރުގައި މިހާރު ކުޅޭ މަންޒަރު ފެންނަނީ އެންމެ ދެ ކުޅުންތެރިން ކަމަށާއި އެއީ ރޮނާލްޑޯ އަދި މެސީ ކަމަށެވެ.

ސްކައި ސްޕޯޓްސްއާ ވާހަކަ ދައްކަމުން ރަޝް ވަނީ ސަލާހުގެ އިތުރުން ފިރްމީނޯއަށް ވެސް ތައުރީފުކޮށްފައެވެ. އޭނާ ބުނީ ފިރްމީނޯއަކީ އިތުބާރު ކުޅުންތެރިއެއް ކަމަށާއި ލިވަޕޫލްއަށް ލަނޑު ޖެހުމުގެ މައިގަނޑު ސިއްރަކީ ދަނޑުމަތީގައި ފިރްމީނޯ ކުރާ ބުރަ މަސައްކަތް ކަމަށެވެ. އޭނާއަކީ ސީޒަނެއްގައި 30 ލަނޑު ޖަހާ ކުޅުންތެރިއެއް ނޫން ކަމަށާއި އެހެން ނަމަވެސް ކޮންމެ ކޯޗަކު ވެސް ފިރްމީނޯ ފަދަ ކުޅުންތެރިއަކު ޓީމުގައި ބަހައްޓަން ބޭނުންވާނެ ކަމަށެވެ. އޭނާއަކީ ބްރެޒިލަށް އުފަން ތަފާތު ހުނަރުތަކެއް ލިބިފައިވާ ކުޅުންތެރިއެއް ކަމަށާއި ލިވަޕޫލްގައި އޭނާ ހުރުމަކީ އެ ޓީމަށް ލިބޭ ވަރަށް ބޮޑު އެޑްވާންޓޭޖެއް ކަމަށް ވެސް ރަޝް ބުނެފައިވެއެވެ.

ލިވަޕޫލްގެ ފޯވާޑް ލައިނުގައި އެންމެ ގިނަ ލަނޑު މި ސީޒަނުގައި ޖެހި ކުޅުންތެރިއަކީ ސަލާހު ކަމަށްވާއިރު އޭނާ އަންނަނީ އޭނާއާ އެކު އެ ޑިޕާޓްމެންޓުގައި ހަރަކާތްތެރިވާ އެހެން ކުޅުންތެރިންނަށް ވެސް ދަނޑުމަތީގައި އެހީތެރިކަން ފޯރުކޮށްދެމުންނެވެ. ސަލާހު އަދި ރޮބާޓޯ ފިރްމީނޯގެ އިތުރުން ސަދިއޯ މާނޭގެ މައްޗަށް އެކުލެވޭ ލިވަޕޫލްގެ ފޯވާޑް ލައިނުން ވަނީ މި ސީޒަނުގެ މިހާތަނަށް 73 ލަނޑު ޖަހާފައެވެ.