ސްޕެއިންގެ ސަރުކާރުން ހައްޔަރު ކުރަން ބޭނުންވާ ކެޓަލޯނިއާގެ ކުރީގެ ވަޒީރަކު އަމިއްލައަށް ސްކޮޓްލެންޑްގެ ފުލުހުންނާއި ހަވާލުވެވަޑައިގަންނަވައިފި އެވެ.

ކެޓަލޯނިއާގެ ކުރީގެ ސަރުކާރުގެ ތައުލީމާއި ބެހޭ ވަޒީރު ކްލާރާ ޕޮންސާޓީގެ މައްޗަށް ސްޕެއިންގެ ސަރުކާރުން ވަނީ ބަޣާވާތް ކުރަން އުޅުމުގެ ތުހުމަތާއި ދައުލަތުގެ ފައިސާ ނަހަމަގޮތުގައި ބޭނުން ކުރުމުގެ ތުހުމަތު ކޮށްފައެވެ. އެ ތުހުމަތުތަކާއި ގުޅިގެން ޕޮންސާޓީ އަދި ކެޓަލޯނިއާގެ ކުރީގެ ސަރުކާރުގެ އިސް ބައެއް ބޭފުޅުން ހައްޔަރު ކުރުމަށް ސްޕެއިންގެ ސުޕްރީމް ކޯޓުން ވަނީ ޔޫރަޕިއަން އެރެސްޓް ވޮރަންޓެއް ނެރެފައެވެ.

ޔޫރަޕިއަން އެރެސްޓް ވޮރަންޓް ނެރެފައިވާ ގިނަ ބޭފުޅުންނަކީ ގައުމުން ބޭރުގައި ދިރިއުޅުއްވަމުން ގެންދަވާ ފަރާތްތައް ކަމުގައިވީނަމަވެސް، އެ އަމުރަށް އަމަލު ކުރުމަށް ޔޫރަޕްގެ ގައުމުތަކަށް ލާޒިމްވާނެ އެވެ.

ޕޮންސާޓީ ހައްޔަރު ކުރުމުގެ ކުރިން ސްކޮޓްލެންޑްގެ ފުލުހުންނާއި އަމިއްލަ އަށް ހަވާލުވެވަޑައިގެންފައި ވަނީ ބުދަ ދުވަހު ކަމަށް ރިޕޯޓްތައް ބުނެއެވެ.

ޕޮންސާޓީގެ ގާނޫނީ ވަކީލު އާމިރު އަންވަރު ވިދާޅުވީ، ޕޮންސާޓީގެ މައްޗަށް ކުރަނީ ސިޔާސީ ދައުވާއެއް ކަމަށް އެކަމަނާ ދެކިވަޑައިގަންނަވާ ކަމަށެވެ. ޕޮންސާޓީގެ މައްޗަށް ދައުވާ ކުރާ ކުށްތަކުގެ އަދަބުގެ ގޮތުގައި ގިނަވެގެން 25 އަހަރުގެ ޖަލު ހުކުމެއް އައުން އެކަށީގެންވެއެވެ.

އެހެން ނަމަވެސް ސްޕެއިންގެ ސަރުކާރުން ވަނީ، ވަކިވެގަތުމަށް މަސައްކަތްކުރާ ކެޓަލޯނިއާގެ އިސް ލީޑަރުންނާއި ދެކޮޅަށް ދައުވާ ކުރަނީ ސިޔާސީ މަޤްސަދެއްގައި ކަމަށް ބުނާ ބުނުމަށް ދެކޮޅު ހަދާފައެވެ. އަދި އެ ފަރާތްތަކުގެ މައްޗަށް ދައުވާ ކުރަނީ ސްޕެއިންގެ ޤާނޫނާއި ޚިލާފަށް ކޮށްފައިވާ އަމަލުތަކުގެ ސަބަބުން ކަމަށް ސްޕެއިންގެ ސަރުކާރުން ބުނެއެވެ.

ސްކޮޓްލެންޑްގެ ފުލުހުންނާއި ހަވާލުވުމާއެކު، ޕޮންސާޓީ ސްޕެއިން އަށް ބަދަލު ކުރުމުގެ މަސައްކަތް ކުރިއަށްދާނެ ކަމަށް ރިޕޯޓްތައް ބުނެއެވެ.

ކެޓަލޯނިއާގެ ކުރީގެ ރައީސް ކާލްސް ޕުއިޖެމޮންޓް ވަނީ މިދިޔަ އާދީއްތަ ދުވަހު ޖަރުމަނުން ހައްޔަރުކޮށްފައެވެ. ޕުއިޖެމޮންޓްގެ މައްޗަށްވެސް ސްޕެއިން ސަރުކާރުން ވަނީ ބަޣާވާތް ކުރަން އުޅުމުގެ ދައުވާ އަދި ދައުލަތުގެ ފައިސާ ނަހަމަގޮތުގައި ބޭނުން ކުރުމުގެ ދައުވާ އުފުލާފައެވެ.

ޕުއިޖެމޮންޓްގެ ސަރުކާރުގެ ތައުލީމާއި ބެހޭ ވަޒީރުގެ މަގާމް އަދާކުރެއްވި ޕޮންސާޓީ އަކީ ސްކޮޓްލެންޑްގެ ޔުނިވަރސިޓީ އޮފް ސެއިންޓް އެންޑްރޫސްގެ ޕްރޮފެސަރެކެވެ. ސްޕެއިންގެ ކިބައިން މިނިވަންވުމަށް މިދިޔަ އޮކްޓޯބަރު މަހު ނެގި ފެންނަ ނުފެންނަ ވޯޓާއި، ކެޓަލޯނިއާގެ ގާނޫނު ހަދާ މަޖިލީހުން މިނިވަންކަން އިއުލާން ކުރުމާއެކު ސްޕެއިންގެ މައި ސަރުކާރުން ވަނީ ކެޓަލޯނިއާގެ ސަރަހައްދީ ސަރުކާރު އުވާލާފައެވެ. އެނިންމުމާއި ގުޅިގެން ޕުއިޖެމޮންޓް އާއެކު މިދިޔަ ނޮވެމްބަރު މަހު ސްޕެއިން ދޫކުރައްވާ ވަޑައިގެންނެވި ވަޒީރުންގެ ތެރޭގައި ޕޮންސާޓީ ހިމެނިވަޑައިގަންނަވައެވެ.

ޕޮންސާޓީ ފުލުހުންނާއި ހަވާލުވެވަޑައިގަތުމާއެކު އެކަމަނާ ހައްޔަރުކުރި ނަމަވެސް، އެޑިންބާގް ޝެރިފް ކޯޓުން ވަނީ ކަފާލާތުގެ ދަށުން ޕޮންސާޓީ މިނިވަންކޮށްފައެވެ.

ޕޮންސާޓީ ސްޕެއިންގެ ސަރުކާރާއި ހަވާލު ކުރުމާއިމެދު ގޮތެއް ނިންމުމަށް ބާއްވާ އަޑުއެހުމެއް ދެން އޮންނާނީ އޭޕްރީލް މަހުގެ 12 ވަނަ ދުވަހު އެވެ.

ސްކޮޓްލެންޑްގެ ޔުނިވަރސިޓީ އޮފް ސެއިންޓް އެންޑްރޫސް އިން ވަނީ، ޕޮންސާޓީ ސްޕެއިންގެ ސަރުކާރާއި ހަވާލުކޮށްފާނެތީ އެކަމާއި ކަންބޮޑުވުން ފާޅު ކޮށްފައެވެ.

ސްކޮޓްލެންޑްގެ ފަސްޓް މިނިސްޓަރ ނިކޮލާ ސްޓަރގަން ވަނީ، އެކަމަނާގެ ސަރުކާރުން ސްޕެއިންގެ ސަރުކާރަށް އެއްބާރުލުން ދެއްވާނެ ކަމަށާއި އެހެންނަމަވެސް ކެޓަލޯނިއާގެ ރައްޔިތުންނަށް އެމީހުންގެ ކުރިމަގާއިމެދު ގޮތް ނިންމުމުގެ ހައްގަށް ތާއީދު ކުރައްވާ ކަމަށް ވިދާޅުވެފައެވެ.