މެސީއަށް ފާޑުނުކިޔޭނެ، އޭނާއަކީ އާޖެންޓީނާގެ އެންމެ މުހިންމު ކުޅުންތެރިޔާ: ޑިއޭގޯ ކޮސްޓާ

އާޖެންޓީނާގެ ފޯވާޑް ލިއޮނެލް މެސީއަށް ފާޑު ނުކިޔޭނެ ކަމަށާއި އޭނާއަކީ އެ ޓީމަށް އެންމެ މުހިންމު ކުޅުންތެރިޔާ ކަމަށް ސްޕެއިންގެ ފޯވާޑް ޑިއޭގޯ ކޮސްޓާ ބުނެފިއެވެ.

ކޮސްޓާ މިހެން ބުނެފައިވާއިރު އަމިއްލަ ގައުމުގައި އާޖެންޓީނާ އަތުން 6-1 ގެ ނަތީޖާއަކުން ސްޕެއިން މޮޅުވި މެޗުގައި އެ ޓީމުގެ ބެންޗުގައި ވެސް މެސީ ހިމަނާފައެއް ނުވެއެވެ. އޭނާއަށް މި މެޗުން ފުރުސަތު ދީފައި ނުވަނީ އަނިޔާއިން އެއްކޮށް ރަނގަޅުވެފައި ނުވާތީއެވެ. ބާސެލޯނާއާ އެކު ގިނަ ކާމިޔާބުތަކެއް މެސީ ހޯދި ނަމަވެސް އާޖެންޓީނާއާ އެކު އޭނާއަށް ކާމިޔާބު ނުހޯދޭތީ ގިނަ ބައެއްގެ ފާޑުކިޔުން އޭނާއަށް އަމާޒުވެއެވެ.

މިއަހަރުގެ ވޯލްޑް ކަޕަށް ވެސް އާޖެންޓީނާ ކޮލިފައިވީ އެ ޓީމު ކުޅުނު ކޮލިފައިންގެ އެންމެ ފަހު މެޗުގައި މެސީ ހެދި ހެޓްރިކާ އެކުއެވެ. މެސީއާ ގުޅޭ ގޮތުން ވާހަކަ ދައްކަމުން ކޮސްޓާ ބުނީ މެސީއާ އާޖެންޓީނާގެ ރައްޔިތުން ވެސް ވަރަށް ބޮޑަށް ފާޑުކިޔާ ކަމަށާއި މެސީއާ ނުލައި އެ ޓީމަކީ މާ ތަފާތު ޓީމެއް ކަމަށެވެ. އޭނާ ބުނީ ހުރިހާ ކަމެއް ވެސް ވަރަށް ރަނގަޅަށް ބަލަން ޖެހޭ ކަމަށާއި މެސީ ފަދަ ކުޅުންތެރިޔަކަށް ފާޑުކިޔަން ނުވާނެ ކަމަށެވެ. އޭނާ ބުނީ މެސީ ފަދަ ކުޅުންތެރިޔަކު ފުޓްބޯޅައިގެ ދުނިޔޭގައި ހުރުމަކީ އެކަމަކަށް އެންމެން ވެސް ޝުކުރުވެރިވާން ޖެހޭ ކަމެއް ކަމަށެވެ.

ނޫސްވެރިންނާއި ވާހަކަ ދައްކަމުން ކޮސްޓާ ބުނީ ގައުމީ ޓީމާއެކު ދަށް މެޗެއް މެސީ ކުޅުނު ކަމުގައި ވިޔަސް އޭނާ ދަނޑުމަތީގައި ހުރުމަކީ ވެސް ތަފާތު ދައްކާ ކަމެއް ކަމަށެވެ.

ކޮސްޓާއަކީ ބްރެޒިލްއަށް އުފަން ކުޅުންތެރިއެއް ކަމުގައި ވިޔަސް އޭނާ ބައިނަލްއަގްވާމީ ފުޓްބޯޅައިގައި ތަމްސީލުކުރަނީ ސްޕެއިންއެވެ. ޗެލްސީގެ ޓީމުން ފުރުސަތު ގެއްލުމާ އެކު ކޮސްޓާއަށް ވޯލްޑް ކަޕް ވެސް ގެއްލޭނެ ކަމަށް ގިނަ ބަޔަކު ހީކުރި ނަމަވެސް އޭނާ ވަނީ ފިނި މޫސުމުގެ ޓްރާންސްފާގައި އެޓްލެޓިކޯއަށް ބަދަލުވެ އަލުން އަނބުރާ ސްޕެއިންގެ ޓީމުން ޖާގަ ހޯދާފައެވެ.

އެކަމާ ގުޅޭ ގޮތުން ވާހަކަ ދައްކަމުން ކޮސްޓާ ބުނީ މިހާރު ސްޕެއިންގައި އޮތް ސްކޮޑަކީ ވޯލްޑް ކަޕް ކާމިޔާބުކުރެވޭނެ ފެންވަރުގެ ޓީމެއް ކަމަށާއި އަނެއްކާ ވެސް ވޯލްޑް ކަޕްގެ ތަށި ކާމިޔާބުކުރުމަށް ޓީމުން އުއްމީދުކުރާ ކަމަށެވެ. އޭނާ ބުނީ ހަ މަސް ދުވަހު ނުކުޅެ ހުރުމަށްފަހު އަލުން އަނބުރާ ގައުމީ ޓީމުން ފުރުސަތު ލިބުމާއެކު ވަރަށް އުފާވި ކަމަށާއި ގައުމީ ޓީމަށް ކުޅުމުގެ ފުރުސަތު ލިބުމަކީ ވަރަށް ހިތްހަމަޖެހޭ ކަމަށެވެ.

މެސީއާ ގުޅޭ ގޮތުން ކޮސްޓާ މިފަދައިން ވާހަކަ ދައްކާފައިވާއިރު މެސީގެ ކެޕްޓަން ކަމުގެ ދަށުން އާޖެންޓީނާ ވަނީ ޖެހިޖެހިގެން ތިން ބައިނަލްއަގްވާމީ މުބާރާތުގެ ފައިނަލްއިން ބަލިވެފައެވެ. އެގޮތުން 2014 ވަނަ އަހަރުގެ ވޯލްޑް ކަޕްގެ ފައިނަލުން ޖަރުމަނު އަތުން އެ ޓީމު ބަލިވިއިރު 2015 ވަނަ އަހަރުގެ ކޮޕާ އެމެރިކާ އަދި 2016 ވަނަ އަހަރުގެ ކޮޕާ އެމެރިކާ ފައިނަލްގައި އާޖެންޓީނާ ބަލިވީ ޗިލީ އަތުންނެވެ. މެސީއަކީ އާޖެންޓީނާގެ ގައުމީ ޓީމަށް އެންމެ ގިނަ ލަނޑު ޖަހައިދިން ކުޅުންތެރިޔާ ވެސްމެއެވެ.