ކަރެކްޝަނަލް ސަރވިސް ކުރިމަތިލައިގެން މިތިބީ ވަރަށް ހަލަބޮލި ދުވަސްކޮޅަކާ: ކޮމިޝަނަރ
27 މާރިޗު 2018 | އަންގާރަ 17:24ތަމްރީނުގައި ދަސްކުރި އެއްޗެއްގެ ބޭނުން އެންމެ ފުރިހަމަ ގޮތުގައި ހިފަންވާނެ
ކަރެކްޝަންގެ ސީޕީ ޝިހާން
މޯލްޑިވްސް ކަރެކްޝަނަލް ސަރވިސް ކުރިމަތިލައިގެން މިތިބީ ވަރަށް ހަލަބޮލި ދުވަސްކޮޅަކާ ކަމަށް ކޮމިޝަނަރ އޮފް ޕްރިޒަންސް އަޙްމަދު ޝިހާން ވިދާޅުވެއްޖެއެވެ.
ސީ.ޕީ ޝިހާން މިހެން ވިދާޅުވީ މާފުށީ ޖަލުގައި ހޯމަ ދުވަހު ބޭއްވި 21 ވަނަ އަސާސީ ތަމްރީނު ޕްރޮގްރާމް ފެށުމުގެ ރަސްމިއްޔާތު ޝަރަފްވެރިކޮށްދެއްވާ ވާހަކަ ދައްކަވަމުންނެވެ.
އެ ރަސްމިއްޔާތުގައި ކޮމިޝަނަރ ވިދާޅުވީ މިހާ ދަތި އުދަނގޫތަކާ ކުރިމަތިލަމުންދާ ދަނޑިވަޅެއްގައި މިފަދަ މުއައްސަސާއަކަށް އެ ހުރިހާ އޮފިސަރުން ކުރިމަތިލި ކަމަށްޓަކައި އެ އޮފިސަރުންނަށް މަރުހަބާ ދަންނަވާ ކަމަށެވެ. އަދި ހުރިހާ އޮފިސަރުން ވެސް ތަމްރީނު ފުރިހަމަކޮށް، މަސައްކަތުގެ މާޙައުލަށް ނުކުންނައިރު ތަމްރީނުގައި ދަސްކުރި އެއްޗެއްގެ ބޭނުން އެންމެ ފުރިހަމަ ގޮތުގައި ހިފަންވާނެ ކަމަށް ވިދާޅުވިއެވެ.
މި ތަމްރީނު ޕްރޮގްރާމް އެކުލަވާލި ގޮތުގެ މައްޗަށް އަލިއަޅުއްވާލައްވައި ކޮމިޝަނާ ޝިހާން ވިދާޅުވީ، ކުރީގައި އެ ސަރވިސްގައި ތިބި އޮފިސަރުންގެ ޖަލު ބެލެހެއްޓުމުގެ އެއްވެސް ތަމްރީނެއް ނެތުމުން ފުރަތަމަ ޕްރިޒަން އޮފިސަރުންނަށް ތަމްރީނު ޕްރޮގްރާމެއް ހިންގީ އެ ސަރވިސްގެ އޮފިސަރުން އޮސްޓްރޭލިޔާއަށް ފޮނުވައިގެން ކަމަށެވެ. އަދި މިއަދު އައިކޯސްޓް އަރާ އެހެރީ އެދުވަހު ކުރިމަސައްކަތުން ތަމްރީނުވި އޮފިސަރުން އެޅި ބިންގަލުގެމައްޗަށް ކަމަށެވެ.
މި ކޯހުގައި 29 ފިރިހެން ޕްރިޒަން އޮފިސަރުން ބައިވެރިވެފައިވެއެވެ. މި ކޯހަކީ 17 ހަފްތާގެ މުއްދަތަށް ކުރިއަށް ގެންދިއުމަށް ހަމަޖެހިފައިވާ ކޯހެކެވެ.
