ހައިރައިޒްގެ އެފްއެންޑްބީ ޝޯ މި އަހަރުގެ މެއި މަހު ބާއްވަނީ

ހައިރައިޒް ކުންފުނީގެ ފަރާތުން އިންތިޒާމްކޮށްގެން ބާއްވަމުން އަންނަ ފުޑް އެންޑް ބެވަރޭޖެސް ޝޯ (އެފްއެންބީ ޝޯ) މި އަހަރުގެ މެއި މަހު ބާއްވަން އެ ކުންފުނިން ނިންމައިފިއެވެ.

އެފްއެންބީ ޝޯ ބޭއްވުމަށް ހަމަޖެހިފައި ވަނީ މެއި މަހުގެ ތިން ވަނަ ދުވަހުން ފެށިގެން ފަސް ވަނަ ދުވަހަށް ނެޝެނަލް އާރޓް ގެލަރީގައެވެ.

ކާބޯތަކެތީގެ ބާވަތްތައް ޝޯކޭސް ކުރުމަށް ބާއްވާ އެ ޝޯގައި ބައިވެރިވުމުގެ ފުރުސަތު ރާއްޖޭގެ އެފްއެންޑްބީގެ އުފެއްދުންތައް ޑިސްޓްރިބިއުޓްކުރާ ފަރާތްތަކަށް ހުޅުވާލައިފަވާ ކަމަށް ހައިރައިޒުން ބުނެއެވެ.

މިދިޔަ އަހަރު 15 ކުންފުންޏެއް ވަނީ އެފްއެންޑްބީ ޝޯގައި ބައިވެރިވެފައެވެ. އަދި އެ ޝޯ ތަފާތު އެކި ހަރަކާތްތަކާ އެކު ކުރިއަށް ގެންގޮސްފައިވާއިރު ޒިޔާރަތް ކުރި ފަރާތްތަކަށް އަގުހުރި އެކި އިނާމުތައް ވަނީ ހަވާލުކޮށްފައެވެ.

މިއީ ހައިރައިޒް ކުންފުނީގެ ފަރާތުން ބާއްވާ ތިން ވަނަ އެފްއެންޑްބީ ޝޯއެވެ.

އެ ކުންފުނިން އެންމެ ފުރަތަމަ އެފްއެންޑްވީ ޝޯ ބޭއްވީ 2016 ވަނަ އަހަރުގައެވެ.