ޗެލްސީއަށް ކުޅެމުން އަންނަ ސްޕެއިންގެ ހުނަރުވެރި މިޑްފީލްޑަރު ސެސްކް ފެބްރިގާސް އަލުން އެނބުރި އާސެނަލްއަށް ބަދަލުވާން އުޅޭކަމުގެ އިޝާރާތެއް ދީފިއެވެ.

ބާސެލޯނާގެ މަޝްހޫރު "ލަ މާސިއާ" އެކަޑަމީގައި ފެބްރިގާސް ތަމްރީނުތައް ފުރިހަމަކުރަމުން ދަނިކޮށް އާސެނަލްއިން ވަނީ އޭނާ އެ ޓީމުގެ އެކަޑަމީއަށް ގެނެސްފައެވެ. އާސެނަލްގެ އެކަޑަމީގައި ތަމްރީނުތައް ފުރިހަމަކުރުމަށް ފަހު ފެބްރިގާސް ވަނީ އެ ޓީމަށް 303 މެޗު ކުޅެދީފައެވެ. އެ ޓީމުގެ ކެޕްޓަން ބޭންޑް ވެސް އަޅަމުން ދިޔަ ފެބްރިގާސް ވަނީ 2011 ވަނަ އަހަރު އަނެއްކާ ވެސް ބާސެލޯނާއަށް ބަދަލުވެފައެވެ.

މި ޓްރާންސްފާއާ ގުޅިގެން އޭނާއަށް ބޮޑެތި ފާޑުކިޔުންތަކެއް އަމާޒުވިއިރު 2014 ވަނަ އަހަރުގެ ވޯލްޑް ކަޕަށް ފަހު ފެބްރިގާސް ވަނީ ބާސެލޯނާ ދޫކޮށް ލަންޑަނުގެ އެހެން ކްލަބެއް ކަމަށްވާ އަދި އާސެނަލްގެ ވާދަވެރި ޗެލްސީއަށް ބަދަލުވެފައެވެ. ޗެލްސީއަށް ފެބްރިގާސް ބަދަލުވުމާއެކު އޭނާއަކީ އާސެނަލްގެ ހަތުރެއްގެ ގޮތުގައި އެ ޓީމުގެ ސަޕޯޓަރުން ދެކުނުއިރު އޭނާ ވަނީ ޗެލްސީއާއެކު ދެ ފަހަރެއްގެ މަތިން ޕްރިމިއާ ލީގު ކާމިޔާބުކޮށް އިނގިރޭސި ލީގު ކަޕެއްވެސް ކާމިޔާބުކޮށްފައެވެ.
އުމުރުން 30 އަހަރުގެ މިޑްފީލްޑަރު ޗެލްސީއާއެކު ހަދާފައިވާ ކޮންޓްރެކްޓްގެ މުއްދަތު ހަމަވާނީ 2019 ވަނަ އަހަރުގެ ނިޔަލަށެވެ. ޗެލްސީގެ ކޯޗު އެންޓޯނިއޯ ކޮންޓޭގެ ޕްލޭންތަކުގައި ފެބްރިގާސްއަކީ މުހިންމު ކުޅުންތެރިޔަކަށް ވުމާއެކު އޭނާއަށް އާ ކޮންޓްރެކްޓެއް ހުށަހެޅުމަށް ތައްޔާރުވަމުންދާ ކަމަށް ވެސް ބައެއް ރިޕޯޓުތައް ބުނެއެވެ.

އެހެން ނަމަވެސް ފެބްރިގާސް ވަނީ އަލުން އެނބުރި އާސެނަލްއަށް ގޮސްދާނެ ކަމުގެ އިޝާރާތެއް ކޮށްފައެވެ. އެގޮތުން ޓްވިޓާގައި އަލުން އެނބުރި އާސެނަލްއަށް ކޯޗެއްގެ މަގާމަށް ގޮސްދާނެތޯ މީހަކު ކުރި ސުވާލަކަށް ޖަވާބުދެމުން ފެބްރިގާސް ބުނެފައިވަނީ އެކަމާއި މެދު އެއްވެސް ވަރަކަށް ޝައްކު ނުކުރާނެ ކަމަށާއި އެފަދަ ފުރުސަތެއް ލިބިއްޖެނަމަ އޭގެ ބޭނުން ހިފާނެ ކަމަށެވެ.

ފެބްރިގާސް ވަނީ އާސެނަލްއާއެކު ތިން ތައްޓެއް ކާމިޔާބުކޮށް ޔުއެފާއިން ހޮވާ އަހަރުގެ އެންމެ މޮޅު ޓީމުގައި އާސެނަލްގެ ކުޅުންތެރިޔެއްގެ ގޮތުގައި ދެ ފަހަރު ހިމެނިފައެވެ. ހަމައެހެންމެ އެމިރޭޓްސްއިން ހޮވާ އާސެނަލްގެ އެންމެ މޮޅު ކުޅުންތެރިޔާގެ އެވޯޑު ވެސް އޭނާ ވަނީ ތިން ފަހަރެއްގެ މަތިން ހޯދާފައެވެ.