އިޓަލީ އާ ދެކޮޅަށް އިނގިރޭސިލާތުން ކުޅޭ ބައިނަލްއަޤްވާމީ ރަހުމަތްތެރިކަމުގެ މެޗުގައި އާސެނަލްގެ މިޑްފީލްޑަރ ޖެކް ވިލްޝެއަރ ނުކުޅޭނެ ކަމަށް އިނގިރޭސިވިލާތުގެ ކޯޗު ގެރެތު ސައުތުގޭޓް ބުނެފި އެވެ.

އިޓަލީ އާ އިނގިރޭސިވިލާތް ބައްދަލުކުރާ ބައިނަލްއަޤްވާމީ ރަހުމަތްތެރިކަމުގެ މެޗު ކުޅޭނީ އަންނަ އަންގާރަ ދުވަހު، ލަންޑަންގެ ވެމްބްލީ ސްޓޭޑިއަމްގައެވެ.

މިމެޗަށް ނެގި އިނގިރޭސި ސްކޮޑުގައި ވިލްޝެއަރ ހިމަނާފައިނުވާއިރު، މިދިޔަ ހުކުރު ދުވަހު ނެދަލެންޑްސް އާ ދެކޮޅަށް ރަށުން ބޭރުގައި ކުޅުނު މެޗުވެސް ވިލްޝެއަރ އަށް ގެއްލުނެވެ.

ހުކުރު ދުވަހު އެމްސްޓަޑަމްގައި ނެދަލެންޑްސް އަތުން 1-0 ން މޮޅުވި މެޗު ވިލްޝެއަރ އަށް ގެއްލުނީ ކަކުލަށް ލިބުނު ކުޑަ އަނިޔާ އަކާއި ގުޅިގެންނެވެ.

2016 ވަނަ އަހަރުގެ ޔޫރޯ ފުޓްބޯޅަ މުބާރާތުގެ ދެވަނަ ބުރުގައި އައިސްލެންޑް އަތުން ބަލިވެ އިނގިރޭސިވިލާތް އެމުބާރާތުން ވަކިވާން ޖެހުނުއިރު، އައިސްލެންޑާއި ދެކޮޅަށް ކުޅުނު މެޗުގެ ފަހުން ވިލްޝެއަރ ގައުމީ ޓީމަށް މެޗެއް ކުޅެފައެއްނުވެއެވެ.

ވިލްޝެއަރ ސްކޮޑުގައި ނުހިމެނުނު ނަމަވެސް، ހުކުރު ދުވަހު ނެދަލެންޑްސް އާ ދެކޮޅަށް ކުޅުނު މެޗުގައި އަނިޔާވި ލިވަޕޫލްގެ ޒުވާން ޑިފެންޑަރ ޖޮއެ ޖޯމޭޒް ސްކޮޑުން ބާކީކޮށްފައެއްނުވެއެވެ.

ނެދަލެންޑްސް އާ ދެކޮޅަށް ކުޅުނު މެޗު ފެށިގެން 10 ވަނަ މިނިޓުގައި ލިބުނު އަނިޔާ އަކާއި ގުޅިގެން 20 އަހަރުގެ ޑިފެންޑަރު ބަދަލުކޮށްފައިވެއެވެ.

އިނގިރޭސި ގައުމީ ކޯޗު ގެރެތު ސައުތުގޭޓް ވަނީ، ގޯމޭޒް އަށް ލިބިފައިވާ އަނިޔާ އާ ގުޅިގެން އިތުރު ޓެސްޓަކެއް ހަދާނެ ކަމަށް ބުނެފައެވެ.