ފްލެޓް ލިބުނު ފަރާތް ނޫން އެހެން ފަރާތެއް ފްލެޓްގައި އުޅޭތީ އެ ފްލެޓް އަތުލުމަށް ހައުސިންގ މިނިސްޓްރީން ނިންމައިފި އެވެ.
ހައުސިންގ މިނިސްޓްރީން އެ ފްލެޓްގެ ވެރިފަރާތަށް ފޮނުވާފައިވާ "އެއްބަސްވުމާ ހިލާފުވެގެން ދެވޭ ނޯޓިސް"ގައި ވަނީ ހުޅުމާލޭގައި އިމާރާތް ކޮށްފައިވާ 704 ފްލެޓް ބޭނުން ކުރަމުންދާ ގޮތް ބެލުމަށް މި މަހުގެ 10 ވަނަ ދުވަހު ހައުސިންގ މިނިސްޓްރީން ކުރިއަށް ގެންދިޔަ ސާރވޭގައި އެ ފްލެޓްގައި ދިރިއުޅެމުން ގެންދަނީ ފްލެޓް ހަވާލު ކުރެވުނު ފަރާތާއި އެފަރާތުގެ އާއިލާ ނޫން އެހެން ފަރާތްތަކެއްކަން އެނގިފައިވާ ކަމަށެވެ.
އެހެންކަމުން އެ ފްލެޓް ވިއްކުމުގެ ގޮތުން މިނިސްޓްރީއާއި ފްލެޓް ލިބިފައިވާ ފަރާތާއި ވެވިފައިވާ އެއްބަސް ވުމާއި ފްލެޓް ލިބުނު ފަރާތުން ހިލާފް ވެފައިވާތީ، އެ އެއްބަސްވުން މިމަހުގެ 22 ވަނަ ދުވަހުން ފެށިގެން ބާތިލް ކޮށް، އަދި އެ ފަރާތުގެ ކިބައިން އެ ފްލެޓް ވަކިކުރުމަށް ނިންމާފައިވާ ކަމަށް ވެސް އެ ނޯޓިސްގައި ވެއެވެ.
މީގެ އިތުރުން އެ ނޯޓިސްގައި ވަނީ މިމަހުގެ 22 ވަނަ ދުވަހުން ފެށިގެން 30 ދުވަހުގެ ތެރޭގައި ފްލެޓް ހުސްކޮށް، ހައުސިންގ މިނިސްޓްރީއާ ހަވާލު ކުރުމަށް އަންގާފަ އެވެ. އަދި އެ މުއްދަތުގެ ތެރޭގައި ފްލެޓް ހަވާލު ނުކޮށްފިނަމަ، އެއްބަސް ވުމުގައިވާ ގޮތުގެ މަތިން މިނިސްޓްރީގެ ފަރާތުން ހުސްކުރާނެ ކަމަށާއި އަދި ހުސްކުރުމުގެ ތެރޭގައި ލިބޭ އެއްވެސް ގެއްލުމަކަށް ހައުސިންގ މިނިސްޓްރީ ޒިންމާ ނުވާނެ ކަމަށް ވެސް އެ ނޯޓިސްގައި ބުނެފައި ވެއެވެ.