ސައުދީ އަރަބިއްޔާ އަށް އެއް ބިލިއަން ޑޮލަރުގެ ހަތިޔާރު ވިއްކުމުގެ އެއްބަސްވުމަށް އެމެރިކާގެ ޚާރިޖިއްޔާ އިން ރުހުންދީފި

ސައުދީ އަރަބިއްޔާ އަށް އެއް ބިލިއަން ޑޮލަރުގެ ހަތިޔާރު ވިއްކުމުގެ އެއްބަސްވުމަށް އެމެރިކާގެ ޚާރިޖިއްޔާ އިން ރުހުންދީފިއެވެ.

އެމެރިކާ އިން ސައުދީ އަރަބިއްޔާ އަށް ހަތިޔާރު ވިއްކުމުގެ މިއެއްބަސްވުމުގެ ދަށުން ވިއްކާ ހަތިޔާރުގެ ޕެކޭޖްގައި 6600 ޓީއޯޑަބްލިއު އެންޓި-މިސައިލް ޓޭންކް ހިމެނޭއިރު، އޭގެ އަގަށް 670 މިލިއަން އެމެރިކާ ޑޮލަރު އަރައެވެ. މީގެ އިތުރުން ސައުދީ އަސްކަރިއްޔާގެ ހެލިކޮޕްޓަރުތައް މަރާމާތު ކުރުމަށް 106 މިލިއަން އެމެރިކާ ޑޮލަރުގެ އަގުހުރި ކޮންޓްރެކްޓެއް ހިމެނޭއިރު، އަސްކަރީ އުޅަނދުތަކުގެ ސްޕެއަރ ޕާޓްސް އަށް 300 މިލިއަން އެމެރިކާ ޑޮލަރު ހިމަނާފައިވާ ކަމަށް އެމެރިކާގެ ސްޓޭޓް ޑިޕާޓްމަންޓުން ބުރާސްފަތި ދުވަހު ނެރުނު ބަޔާނުގައި ވެއެވެ.

ސްޓޭޓް ޑިޕާޓްމަންޓް ނުވަތަ އެމެރިކާގެ ޚާރިޖީ ވުޒާރާ އިން ނެރުނު ބަޔާނުގައި ވަނީ، ސައުދީ އަށް ހަތިޔާރު ވިއްކުމުގެ އެއްބަސްވުމާ އެކު، ރަހުމަތްތެރި ގައުމެއްގެ ސަލާމަތީ ކަންކަން ވަރުގަދަ ވުމަކީ އެމެރިކާގެ ފޮރިން ޕޮލިސީ އަދި ގައުމީ ސަލާމަތާ ގުޅޭ ލަނޑުދަނޑިތައް ހާސިލް ކުރުމުގައި ފަސޭހަވެގެންދާނެ ކަމަށެވެ. އަދި ސައުދީ އަށް ހަތިޔާރު ވިއްކުމުގެ ޕްލޭނާ ގުޅޭ މައުލޫމާތު އެމެރިކާގެ ކޮންގްރެސްއާ ބުރާސްފަތި ދުވަހު ހިއްސާކޮށްފައިވާ ކަމަށް އެމެރިކާގެ ޚާރިޖިއްޔާ އިން ބުނެއެވެ.

އެމެރިކާ އިން ސައުދީ އަށް ހަތިޔާރު ވިއްކުމުގެ އެއްބަސްވުމަށް އެގައުމުގެ ހާރިޖިއްޔާ އިން ރުހުން ދީފައި ވަނީ ސައުދީ ވަލީއަހުދު މުޙައްމަދު ބިން ސަލްމާން އެމެރިކާ އަށް ވަޑައިގެން އުޅުއްވާ ދަނޑިވަޅެއްގައެވެ. ތިން ހަފްތާ އަށް ދެމިގެންދާ ވަލީއަހުދުގެ މިދަތުރުފުޅުގައި މިދިޔަ ބުދަ ދުވަހު އެމެރިކާގެ ރައީސް ޑޮނަލްޑް ޓްރަމްޕްއާ ބައްދަލު ކުރައްވާފައިވެއެވެ.

އެމެރިކާގެ ރިޔާސީ ގަނޑުވަރު، ވައިޓްހައުސްގައި ސައުދީ ވަލީއަހުދު މުޙައްމަދު ބިން ސަލްމާންއާ އެކު ބޭއްވެވި ބައްދަލުވުމުގައި އެމެރިކާގެ ރައީސް ޑޮނަލްޑް ޓްރަމްޕް ވަނީ ސައުދީއަކީ މުއްސަނދި ގައުމެއް ކަމަށާއި، ސައުދީގެ މުއްސަނދިކަމުގެ ފައިދާ އެމެރިކާ އަށް ކުރާނެ ކަމަށް އުއްމީދު ކުރައްވާ ކަމަށް ވިދާޅުވެފައެވެ. އަދި އެމެރިކާގެ ރައްޔިތުންނަށް ވަޒީފާ ދީގެންނާއި އެމެރިކާގައި އުފައްދާ ހަތިޔާރާއި އަސްކަރީ ވަސީލަތްތަކުގެ ވިޔަފާރި ކޮށްގެން ސައުދީގެ މުއްސަނދި ކަމުން ބައެއް އެމެރިކާ އަށް ލިބޭނެ ކަމަށް ގަބޫލް ކުރައްވާ ކަމަށް އޭނާ ވިދާޅުވިއެވެ.

އެމެރިކާ އިން ސައުދީ އަށް ހަތިޔާރު ވިއްކުމުގެ އަގުބޮޑު އެއްބަސްވުމެއް ގާއިމް ކުރުމަށް ތައްޔާރު ވަމުންދާއިރު، އެމެރިކާގެ ގާނޫނު ހަދާ މަޖިލީހުގެ ބައެއް މެމްބަރުން ހިމެނޭ ގޮތަށް ބައިނަލްއަޤްވާމީ މުޖުތަމައު އިން ދަނީ ސައުދީ އަށް ހަތިޔާރު ވިއްކުން ހުއްޓާލުމަށް ނުވަތަ ހަތިޔާރު ވިއްކުން މަދު ކުރުމަށް ހުޅަނގުގެ ގައުމުތަކުގެ ސަރުކާރުތަކަށް ގޮވާލަމުންނެވެ. ސައުދީ އަށް ހަތިޔާރު ވިއްކުން މަނާ ކުރުން ނުވަތަ ހުއްޓާލުމަށް ހުޅަނގުގެ ސަރުކާރުތަކަށް ގޮވާލާ ބައިނަލްއަޤްވާމީ ކެމްޕެއިނެއް ފަށާފައި ވަނީ ޔަމަނުގެ ދާޚިލީ ހަނގުރާމާގައި ސައުދީގެ ބައިވެރިވުމާ ގުޅިގެންނެވެ.

ޔަމަނުގެ ދާޚިލީ ހަނގުރާމައިގެ ތެރެއަށް ސައުދީ އަރައްބިއްޔާ އިން 2015 ވަނަ އަހަރުގެ މާޗް މަހު ވަދެ އެގައުމުގެ އަސްކަރިއްޔާ އިން ފެށި އަސްކަރީ އޮޕަރޭޝަނުގައި މިހާތަނަށް ޔަމަނުގެ 10 ހާހަށް ވުރެ ގިނަ މީހުން މަރުވެފައިވެއެވެ. މީގެ އިތުރުން ސައުދީ އަސްކަރިއްޔާގެ އޮޕަރޭޝަނުގެ ސަބަބުން ޔަމަނުގެ 2 މިލިއަނަށް ވުރެ ގިނަ މީހުންގެ ގެދޮރު ގެއްލި އެހެން ސަރަހައްދުތަކަށް ބަދަލުވާން ޖެހިފައިވާއިރު، ޔަމަނުގައި ކޮލެރާގެ ނުރައްކާތެރި ބަލިމަޑުކަމެއް ފެތުރި، ކާބޯތަކެތީގެ ދަތިކަން ވަނީ ކުރިމަތިވެފައެވެ.

ސައުދީ ވަލީއަހުދު މުހައްމަދު ބިން ސަލްމާން ވަނީ ބުރާސްފަތި ދުވަހު އެމެރިކާގެ ދިފާއީ ވަޒީރު ޖިމް މެޓިސްއާ ބައްދަލުކުރައްވާފައެވެ. މިބައްދަލުވުމުގައި މެޓިސް ވަނީ ޔަމަނުގެ ހަނގުރާމަ އަށް ވީހާ ވެސް އަވަހަކަށް ސިޔާސީ ހައްލެއް ހޯދުމުގެ މުހިންމުކަން ފާހަގަ ކުރައްވާފައެވެ. އަދި ޔަމަނުގެ ހަނގުރާމަ އަށް ހައްލެއް ހޯދުމުގައި ސައުދީ އަރަބިއްޔާއަކީ އެ ހައްލުގެ ބައެއް ކަމަށް މެޓިސް ވިދާޅުވެފައިވެއެވެ.

އެމެރިކާގެ ސެނޭޓުން އަންގާރަ ދުވަހު ވަނީ، ޔަމަނުގެ ދާޚިލީ ހަނގުރާމައިގެ ތެރެއަށް ވަދެފައިވާ ސައުދީ ކޯލިޝަނަށް އެމެރިކާގެ އެހީ ކަނޑާލުމަށް ގޮވާލާ ގަރާރު ބޭރު ކޮށްލާފައެވެ. ޔަމަނުގެ ހަނގުރާމާގައި ބައިވެރިވާ ސައުދީ ކޯލިޝަނަށް އެމެރިކާ އިން އަސްކަރީ އެހީ ފޯރުކޮށްދިނުން ހުއްޓާލުމަށް ގޮވާލާ ގަރާރަށް އަންގާރަ ދުވަހު ސެނެޓުގައި ވޯޓަށް އެހުމުން ގަރާރަށް ތާއީދުކޮށް 44 މެމްބަރަކު ވޯޓު ދީފައިވާއިރު، ގަރާރާ ދެކޮޅަށް 55 މެމްބަރަކު ވޯޓު ދީފައިވެއެވެ.

އެމްނެސްޓީ އިންޓަނޭޝަނަލް އިން ހުކުރު ދުވަހު ނެރުނު ބަޔާނެއްގައި ވަނީ، ޔަމަނުގެ ހަނގުރާމާގައި ބައިވެރިވާ ސައުދީ އަސްކަރީ ކޯލިޝަނަށް ޒިންމާދާރު ނޫން ގޮތެއްގައި ހަތިޔާރު ފޯރުކޮށްދިނުމުގެ ސަބަބުން ޔަމަނުގެ އާއްމު ރައްޔިތުންނަށް ބޮޑެތި ގެއްލުންތަކެއް ވަމުންދާ ކަމުގެ ހެކި ލިބިފައިވާ ކަމަށެވެ. އަދި ޔަމަނުގެ ރައްޔިތުންނަށް ގެއްލުން ލިބުނު ނަމަވެސް، ސައުދީ ކޯލީޝަނަށް އެތައް ބިލިއަން ޑޮލަރެއްގެ ހަތިޔާރު ވިއްކުން ހުއްޓާނުލާ ކުރިއަށް ގެންދާތީ އެމެރިކާ، އިނގިރޭސިވިލާތް، ފްރާންސާއި ސްޕެއިން އަދި އިޓަލީގެ ނަން އެބަޔާނުގައި ފާހަގަ ކޮށްފައިވެއެވެ.