ކުރީގެ ނައިބުރައީސް އަޙުމަދު އަދީބުގެ ލޮލުގެ ފަރުވާ ލަސްވަމުންދަނީ އެމަނިކުފާނު ލޮލުގެ ޑޮކްޓަރަކަށް ދެއްކުމަށް ކަރެކްޝަންސްއަށް އެޕޮއިންޓްމަންޓެއް ނުހޯދިގެން ކަމަށް ވާނަމަ، އެޕޮއިންޓްމަންޓެއް ހޯދުމުގެ މަސައްކަތް އާއިލާ އާއި ހަވާލުކުރުމަށް އާއިލާއިން އެދިއްޖެއެވެ.

އަދީބުގެ އަނބިކަނބަލުން މަރިޔަމް ނަޝްވާ، ކޮމިޝަނަރ އޮފް ޕްރިޒަންސް އަޙުމަދު ޝިހާންއަށް ފޮނުއްވެވި ސިޓީއެއްގައި ވިދާޅުވީ، ކަރެކްޝަންސްގެ ބެލުމުގެ ދަށުން އަދީބު ޑޮކްޓަރަށް ދެއްކުމުން، ރާއްޖެއިން ބޭރުން ފަރުވާ ހޯދުމަށް ޑޮކްޓަރު ލަފާ ދެއްވާފައިވާ ކަމަށާއި، އަދި އެކަމާއި ގުޅޭ ލިޔުންވެސް ކަރެކްޝަންސްގައި ވާނެ ކަމަށެވެ.

އެހެންކަމުން ފަރުވާއަށް އަދީބު ރާއްޖެއިން ބޭރަށް ފޮނުވުމަށް ފުރިހަމަކުރަންޖެހޭ އިޖުރާޢަތްތައް ފުރިހަމަކުރުމަކީ ކަރެކްޝަންސްގެ ޒިންމާއެއް ނަމަވެސް، އެކަން ލަސްވަމުންދާކަން ނަޝްވާ ވަނީ ފާހަގަކުރައްވާފައެވެ.

އެގޮތުން، އަދީބުގެ މައްސަލަ މެޑިކަލް ބޯޑަށް ހުށަހެޅުން ލަސްވެގެން ދަނީ، އެ ބޯޑަށް މައްސަލަ ހުށަހެޅުމުގެ ކުރިން އިތުރު ޑޮކްޓަރެއްގެ ލަފާ ހޯދަން ޖެހޭއިރު، އިތުރު ޑޮކްޓަރަކަށް ދެއްކުމަށް އެޕޮއިންޓްމަންޓެއް ހަމަނުޖެހިގެން ކަމަށް ކަރެކްޝަނުން އަންގާފައިވާ ކަމަށް ވެސް ނަޝްވާގެ ސިޓީގައި ވެއެވެ. އަދި ކަރެކްޝަންސްއިން އެގޮތަށް އަންގާފައިވަނީ މި އަހަރުގެ ފެބްރުއަރީ މަހުގެ 15 ވަނަ ދުވަހު ކަމާއި، އޭގެ ފަހުން މަހަކަށް ވުރެ ގިނަ ދުވަސް ފާއިތުވެދިޔައިރުވެސް ކަރެކްޝަންސްއިން އަދީބުގެ ފަރުވާ ލަސްކުރުމަށް ދައްކަމުންދަނީ ހަމަ އެ އުޒުރުކަން ނަޝްވާ ވަނީ ފާހަގަކުރައްވާފައެވެ.

އެހެންކަމުން، އެކަން އަވަސްކޮށްދިނުމަށާއި، އެޕޮއިންޓްމަންޓް ހޯދުމަށް ކަރެކްޝަންސްއަށް ދަތިތަކެއް ހުރިނަމަ، އެޕޮއިންޓްމަންޓް ހޯދުމުގެ މަސައްކަތް އާއިލާ އާއި ހަވާލު ކޮށްދިނުމަށް ނަޝްވާ ވަނީ އެދިވަޑައިގެންފައެވެ.

އަދީބު ބޭސްފަރުވާއަށް ރާއްޖެއިން ބޭރަށް ފޮނުވުން ލަސްވުމުގެ ސަބަބުން ލިބިގެންދާނެ އެންމެހާ ގެއްލުމަށް ޤާނޫނީ ގޮތުން ޒިންމާވާންޖެހޭނީ ކަރެކްޝަންސްއިންކަން ހަނދާން ކޮށްދެއްވައި ނަޝްވާގެ ސިޓީގައި ވަނީ އެ ސަބަބަށްޓަކައިވެސް ބޭސްފަރުވާ އަވަސްކޮށްދިނުމަށް އެދިލައްވާ ކަމަށެވެ.

އަދީބުގެ ލޮލުގެ ހާލަތު ވަރަށް ބޮޑަށް ގޯސްވާތީ ރާއްޖެ އިން ބޭރަށް ގޮސް ގްލްކޯމާ ސްޕެޝަލިސްޓަކަށް ދައްކައި އޮޕްރޭޝަނެއް ކުރުމަށް ޑޮކްޓަރު ވަނީ ލަފާދެއްވާފައެވެ.

ވީ އެންމެ އަވަހަކަށް ލޮލުގެ އޮޕްރޭޝަނެއް ކުރުމަށް އަދީބަށް ޑޮކްޓަރުން ލަފާ ދެއްވާފައިވާއިރު، އަދީބުގެ އެތެރެހަށީގައި އުފެދިފައިވާ ސިސްޓްތައް ކެންސަރަށް ބަދަލުވެދާނެ ކަމުގެ ބިރު އޮތުމުން، ކެންސަރަށް ސްކްރީން ކުރުމަށް ވެސް ޑޮކްޓަރުން ވަނީ ލަފާ ދެއްވާފައެވެ. މީގެ ދެ އަހަރު ކުރިން ދެއްވި އެ ލަފައާ އެއްގޮތަށް އަދި މިހާތަނަށް އަދީބު ކެންސަރަށް ސްކްރީން ކުރުމުގެ ފުރުސަތު ސަރުކާރުން ދީފައެއް ނުވެއެވެ.

ބޭސްފަރުވާއަށް އަދީބު ރާއްޖެ އިން ބޭރަށް ފޮނުވުމަށް ސަރުކާރުން ދަނީ ދެކޮޅު ހަދަމުންނެވެ. ސަރުކާރުން ބުނަމުންދަނީ، އަދީބު ބޭރަށް ފޮނުވައިފި ނަމަ ފިއްލަވާފާނެ ކަމަށާއި އެމަނިކުފާނު ފިއްލަވައިފި ނަމަ ދައުލަތަށް ލިބެންޖެހޭ އެތައް މިލިއަން ރުފިޔާއެއް ނުލިބޭނެ ކަމަށެވެ.

އަދީބުގެ ވަކީލުން ވިދާޅުވަމުން ގެންދަވަނީ، ބޭސްފަރުވާ ކުރުމުގެ ހައްގަކީ، ސަރުކާރަށް ހީވާހީވުމެއްގެ މައްޗަށް ހިފަހެއްޓޭނެ ހައްގެއް ނޫން ކަމަށެވެ. އަދި، ޖަލު ހުކުމް ތަންފީޒު ކުރަމުންދާ އެހެނިހެން ފަރާތްތައް ބޭސްފަރުވާއަށް ފޮނުވާ އުސޫލުން އަދީބަށް ވެސް އެ ފުރުސަތު ދޭންޖެހޭނެ ކަމަށް ވަކީލުން ދަނީ ވިދާޅުވަމުންނެވެ.