ހެޔޮއެދޭ މީހުންނާއި ގާތްތިމާގެ ކަމަކީ ކޮބައިކަން އޭގެ އެންމެ ފުރިހަމަ ގޮތުގައި ދަސްކޮށްދިނީ ޖަލުގެ ތޭރިތައް ކަމަށް ރާއްޖޭގައި ހިންގި އެންމެ ބޮޑު ކޮރަޕްޝަން ކަމަށްވާ އެމްއެމްޕީއާރުސީގެ ވައްކަމުގައި އަމަލީ ގޮތުން އެންމެ އިސް ދައުރެއް އަދާކުރެއްވުމާއި ރައީސް ޔާމީން އަވަހާރަ ކޮށްލަން ރޭވި ކަމުގެ ކުށުގައި ޖުމްލަ 33 އަހަރަށް ހުކުމް ކޮށްފައިވާ އަހުމަދު އަދީބު ވިދާޅުވެއްޖެއެވެ.

ޖަލުގައި ހުންނެވި  މިސަރުކާރުގެ ދެވަނަ ނައިބު ރައީސް އަހުމަދު އަދީބު ނެރުއްވާފައިވާ ބަޔާނެއްގައި ބުނެފައިވަނީ ޖަލުގެ ތޭރިތައް ބުނަމުންދާ ހަގީގަތަކީ "އޭނާ ދުށް ހަގީގަތަކީ ހަގީގަތެއްނޫން ކަމަށާއި ބެލި ރަނގަޅަކީ ރަނގަޅެއް ނޫން"ކަމަށެވެ. އަދި އެކުވެރިންނާއި އާއިލާއާއި ހެޔޮއެދޭ މީހުންނާއި، ގާތްތިމާގެކަމަކީ ކޮބައިކަން އޭގެ އެންމެ ފުރިހަމަ މާނައިގައި އެނގިލައްވައިފިކަމަށެވެ.

އެމަނިކުފާނު ޖަލުގައި ބަންދުކުރެވުނު ފަހުން ސިއްހީ އެތަކެއް މައްސަލަތަކެއް ދިމާވެއްޖެކަމަށާއި ރައްޔިތުންނާ ހަމައަށް އޭނާގެ ސިއްހީ ހާލަތު އާންމު ކުރަން މަޖުބޫރުވީ މިއަދުގެ ހާލަތު ހުރިގޮތުން ކަމަށް އަދީބު ވިދާޅުވިއެވެ. އަދީބު ވިދާޅުވީ އޭނާއަށް ދިމާވެފައިވާ ސިއްހީ މައްސަލަތަކުގެ ތެރޭގައި ކިޑްނީގައި ހިލަ ހުރުމާއި އިންޓާނަލް ސިސްޓް ހުރުމާއި، ލޮލުގެ ބައްޔެއްކަމުގައިވާ ގޮލޮކޮމާ ޖެހިފައިވާކަމަށެވެ. އަދި އެ ބަލިތަކަށް އެއްވެސް އެކަށީގެންވާ ފަރުވާއެއް ދީފައި ނުވާކަމަށް އަދީބު ވިދާޅުވިއެވެ.

އަދީބު ޖަލަށް ލީ ފަހުން ސިއްހީ ބޮޑެތި މައްސަލަތައް ދިމާވެފައިވާކަމަށް މިދިޔަ މެއި މަހުގެ 22 ވަނަ ދުވަހު އޭނާގެ އާއިލާއިން ނެރުނު ބަޔާނެއްގައިވެސް ވަނީ ބުނެފައެވެ.

އަދީބާއި މެދު ދިވެހިރައްޔިތުންގެ ހިތުގައި އުފެދިފައިވާ ކިލަނބުކަން ފިލުވުމަކީ އެމަނިކުފާނުގެ އާދޭހެއް ކަމަށާއި ކިތަންމެ ބޮޑު ތުހުމަތެއްގައި އެމަނިކުފާނު ހުންނެވި ކަމުގައި ވިއަސް އިންސާނީ ހައްގަށް ރައްޔިތުން ތާއީދު ކުރައްވާނެކަމަށް ގަބޫލުކުރައްވާކަމަށް އެމަނިކުފާނު ވިދާޅުވިއެވެ.

"އަޅުގަނޑާއި މެދު ތިޔައިގެ ތެރެއިން ވަރަށް ގިނަ ރައްޔިތުންގެ ހިތުގައި ހުރި ކިލަނބު ކަން ފިލުވުމަކީ އަޅުގަނޑޫގެ އާދޭހެކެވެ. އަޅުގަނޑަށް ޔަގީނެވެ. ތިޔައިގެ ތެރެއިން ގިނަ ބޭފުޅުންނަކީ އިންސާނީ ހައްގުތައް ލިބިދިނުމުގައި  ތަފާތު ކުރުމަށް ވަކާލާތު ކުރަމުންދާ ބޭފުޅުންނެއް ނޫނެވެ. ކޮންމެ ފަދަ ކުށެއްގެ ތުހުމަތުގައި ނަމަވެސް އިންސާނީ ހައްގުތަކަށް ހުރަސްއެޅިގެންދާނޭކަމަށް ތިބޭފުޅުން ގަބޫލުކުރައްވާނެއެވެ. އަޅުގަނޑަށް ކޮށްފައިވާ ތުހުމަތުކުރެވޭ އެއްވެސް ކުށެއްގެ އަދަބަކީ އެކަނިވެރިކަމާއިއެކު އޮވެ މަރުވުންކަމަށްވެސް ތިބޭފުޅުން ދެކެވަޑައިނުގަންނަވާނެއެވެ." އަދީބު ރައްޔިތުންނަށް ނެރެފައިވާ ބަޔާނުގައި ވިދާޅުވެފައިވެއެވެ.

 ޖަލުގައި ހޭދަވަމުންދާ ދުވަސްތަކުގެ ތެރޭގައި ރާއްޖޭގެ ސިޔާސީ މަސްރަހަށް ވަމުންދާގޮތް ބައްލަވަމުންދާކަމަށާއި ރާއްޖޭގެ ސިޔާސީ މަސްރަހު އޮތީ އަލުން ބިނާ ނުކުރެވޭނެފަދަ ހާލަތެއްގައި ނޫންކަމަށް އަދީބު ވިދާޅުވިއެވެ.

އެބަޔާން ނިންމަވާލައްވަމުން އަދީބު ވިދާޅުވީ އެމަނިކުފާނާއި މެދު ހިތް ނުބައި އެންމެނާއިމެދުވެސް ހިތް ހެޔޮކަމަށާއި އެދެނީ ރާއްޖެއަށް އަމާންކަމާއި ފާގަތިކަން ކަމަށެވެ.