ސިފައިންގެ ވެހިކަލަކުން ޖެހި ޒުވާނަކަށް ބޮޑެތި އަނިޔާތަކެއް!
21 މާރިޗު 2018 | ބުދަ 17:24އެކްސިޑެންޓްވި ޒުވާނާގެ އެތެރެ ހައްޓަށް އަނިޔާވެފައެއް ނުވޭ
ޒުވާނާއަށް ލިބިފައިވާ ބައެއް އަނިޔާތައް
މިއަދު ހިނގި ނުރައްކާތެރި އެކްސިޑެންޓެއްގައި ސިފައިންގެ ވެހިކަލަކުން ޖެހި ޒުވާނަކަށް ބޮޑެތި އަނިޔާތަކެއް ވެއްޖެއެވެ.
މި އެކްސިޑެންޓް ހިނގަން މެދުވެރިވެފައިވަނީ މާރުކޭޓް ސަރަހައްދުން ބޮޑުތަކުރުފާނު މަގުން ބާރު ސްޕީޑުގައި ދުއްވާފައި އައި ސިފައިންގެ ވެހިކަލެއް ކޮންޓްރޯލް ނުވެ ގޮސް ސައިކަލެއްގައި ޖެހިގެންނެވެ. ސައިކަލް ދުއްވަން އިން ޒުވާނާއަށް ބޮޑެތި އަނިޔާތަކެއް މި އެކްސިޑެންޓްގެ ސަބަބުން ވަނީ ލިބިފައެވެ.
ރާއްޖެއެމްވީއާ ވާހަކަ ދެއްކި ޒުވާނާގެ އާއިލާގެ މެމްބަރަކު ބުނި އެ ޒުވާނާގެ ބޮލަށް ވަރަށް ބޮޑަށް އަނިޔާވެފައިވާ ކަމަށާއި ލިބިފައިވަނީ ކިހާވަރެއްގެ އަނިޔާއެއްކަން ކަށަވަރުވާނީ ސްކޭންތަކެއް ފުރިހަމަ ކުރުމަށް ފަހު ކަމަށެވެ. މިހާތަނަށް ހެނދުނު ޓެސްޓްތަކުގެ ނަތީޖާތަކަށް ބަލާލާއިރު އެތެރެ ހައްޓަށް މާ ބޮޑު އަނިޔާތަކެއް ލިބިފައިނުވާ ކަމަށާއި އެހެން ނަމަވެސް ބޭރު ފުށުން ވަރަށް ބޮޑު އަނިޔާތަކެއް ވެފައިވާ ކަމަށް ޒުވާނާގެ އާއިލާއިން ބުނެފައިވެއެވެ.
ޒުވާނާގެ އާއިލާގެ ފަރާތުން މައުލޫމާތު ދީފައިވާ ގޮތުގައި އެކްސިޑެންޓްގެ ސަބަބުން ޒުވާނާއަށް ލިބުނު އަނިޔާތަކާއި އޭނާގެ ސައިކަލަށް ލިބުނު ގެއްލުމުގެ ހުރިހާ ހަރަދެއް ބަލަހައްޓާނެ ކަމުގެ ޔަގީންކަން ސިފައިން ދީފައިވާ ކަމަށެވެ. އެ ޔަގީންކަން ދީފައިވަނީ އަނގަބަހުން ކަމަށާއި މިހާތަނަށް އައިއިރު ލިޔުމުން ޔަގީންކަން ލިބިފައިނުވާ ކަމަށް އެ ޒުވާނާގެ އާއިލާއިން ބުނެފައިވެއެވެ. އެހެން ނަމަވެސް ޒުވާނާގެ ހާލަތު ބެލުމަށް ހޮސްޕިޓަލުގައި ސިފައިންގެ އޮފިސަރަކު ހުންނަ ކަމަށް ވެސް އާއިލާއިން ވަނީ ބުނެފައެވެ.
އެ ޒުވާނާއަށް އަންނަނީ އައިޖީއެމްއެޗް ހޮސްޕިޓަލުގައި ފަރުވާ ދެމުންނެވެ. މިކަމާއި ގުޅިގެން ފުލުހުން އަދި ސިފައިންގެ ބަހެއް ހޯދުމަށް ރާއްޖެއެމްވީއިން ކުރި މަސައްކަތްވަނީ ނާކާމިޔާބުވެފައެވެ.
